Чувашхэм я зэхыхьэ

Къэбэрдей-Балъкъэрым и лIыкIуэхэр хэтащ Чебоксары къалэм дэт Чуваш драмэ театрым чуваш лъэпкъым и зэхуэсышхуэ щекIуэкIам.
Абы ирагъэблэгъахэм ящыщащ Урысейм и щэнхабзэ лъэпкъ центрхэм я лIыкIуэхэр, Къэбэрдей-Балъкъэрым щыпсэу чувашхэм я «Нарспи» лъэпкъ центрым и унафэщI Черновэ Алёнэрэ а зэгухьэныгъэм хэтхэмрэ.
Илъэсым зэфIагъэкIахэм теухуауэ зэхыхьэм къыщыпсэлъащ Чуваш лъэпкъ щэнхабзэ центрым и унафэщI, а республикэм щIыхь зиIэ и артист Клементьев Валерэ.
Черновэ Алёнэ ди щIыналъэм исхэм къабгъэдэкIыу фIэхъус ярихащ икIи «Нарспи» центрым и лэжьыгъэм къытеувыIащ. Абы Клементьев Валерэ тыгъэ хуищIащ щIакIуэрэ щхьэрыпхъуэнрэ.

КъыжыIапхъэщ, Чуваш лъэпкъ центрым Урысеймрэ нэгъуэщI щIыналъэхэмрэ щыпсэу чувашхэр зэрызэкъуигъэувэр. Урысейм чуваш лъэпкъ щэнхабзэ зэгухьэныгъэу 100-м нэблагъэ щыIэщ. Беларуссиер, Къэзахъстаныр, Эстониер зи хэщIапIэ чувашхэм абыхэми щаIэщ я зэгухьэныгъэхэр. Абы я къалэн нэхъыщхьэр чуваш щэнхабзэр, хабзэр, тхыбзэр яхъумэнырщ. Къэхутэныгъэхэм къызэригъэлъэгъуамкIэ, Урысейм щыпсэу лъэпкъхэм я бжыгъэкIэ етхуанэ увыпIэр зыIыгъыр ахэращ. Къэбэрдей-Балъкъэрыр къапщтэмэ, чуваш 60 щопсэу.