- КъэгъэувыIэ, сыкъэсащ! – бжэкъум Iэбэурэ, зегъэмакъ гъум КхъуэпIащэм. Дыгъужьым зэуэ гулъэф иритри, машинэр къигъэувыIащ. Жэщ ныкъуэ хъуху къезышэкIам фIэмыIуэхуу сомитху хуидзри, ПIащэжь бжэр ину иридзылIэжащ.
- Нэпсеижь лъапсэ! – губжьауэ кIэлъыджащ абы Дыгъужьыр. Машинэр абы гаражым игъэувыжын зэрыхуейри зэманыфI дэкIат. Ар ищIэжырти, шэрхъитIым щIым лъэмыIэсу игъэшыжри щIэпхъуэжащ. ЗэрылъэкIкIэ трикъузауэ здэжэм, япэ къит машинэхэм гъуэгубгъум зракъузылIэ. Машинэзехуэхэм, зыкърашиикIыурэ, IэштIым къыхуащI. АрщхьэкIэ Дыгъужьыр абыхэм еплъыххэркъым. Гъуэгу зэхэкIыпIэм тет пкъоужьым и пэ плъыжьыр къригъэжа щхьэкIэ, мыдрейм ейр иуфIыцIри, къызэтемыувыIэу блэжащ. И нэхэр къызэрыплъэжу Дыгъужьыр Iуплъащ баш къуэлэныр къэзышия Бажэм – фыррр-фыррр – тхьэкIумэIупсыр иричырт абы и кIэфийм.
- Дэнэ мыгъуэм укъиукIт! – гулъэфым трикъузэри машинэжьыр, тхьэусыхафэр зэрихьэу, къигъэувыIащ.
- Япэрауэ, плъыжьыр блэуэ укъыблэжащ. ЕтIуанэрауэ, хуабжьу уокIуэ. – Бажэм и пыIэ плъыжьыр къригъэкIуэтэхри къуаншагъэ зылэжьам къыбгъурыхутащ. Дыгъужьыр зэремыфар нэрылъагъут. – Сомитху! – абдж бжьамий цIыкIу къигъэхьэзырар игъэтIылъыжри талон плIимэр къыхуишиящ.
- Уи талони сыхуейкъым, мэ сомитхури, Iиман уиIэмэ, сыутIыпщ! – А дакъикъэм Бажэм и гуфIакIэм къыдэIукIащ псалъэмакъ шынагъуэ, «щэрэ тIощIрэ еплIанэм и деж зэжьэхэуэ ин къэхъуащ, псынщIэу укъызэрысын» жиIэу. Бажэм «Жигули» гъуэжьым зридзэри, макIуэ-мэлъей, ежьэжащ.
ФIатхьэкъуа сомитхур и гум къыщIитхъыу, и щхьэм хуэтхьэусыхэжу щхъуэжьи къежьэжащ. Куэдрэ къэкIуа, мащIэрэ къэкIуа, Бажэр иджыри къыбгъэдэс и гугъэжу зэ къыщеплъэкIым къелъагъу машинэм къина кIэфиймрэ баш къуэлэн цIыкIумрэ. «ЛIо сщIэнур? - йогупсыс Дыгъужьыр. – Згъэзэжу естыжын? Уэлэхьи, сымыгъэзэжын икIи езмытыжын!»
Гъуэгум дидзыхри, Дыгъужьым и машинэр жыг къуагъым къуигъэуващ. ПIащIэу къигъуэта хъыдан кIапэр и Iэблэм ирищIэри, кIэфийр зыIуригъэсащ. Баш къуэлэныр и Iэпэхэм пигъэджэгукIыурэ, машинэм къелъэри гъуэгукум иуващ. Плъэмэ, къелъагъу: чэтэныщхьэ «Запорожец» къажэрт, гъэщIэрэщIарэ тхьэкIумэкIыхь гъэпща и пэм тесу, исхэри къэжэнарэ уэрэдыжьыр кърашу.
- Ахьа! Сымыгъуэту къэзгъуэта! – Фыр-ррррр – епщащ зэрыхулъэкIкIэ кIэфийм, баш къуэлэныр и блэгущIэм щIилъхьэри. Машинэр апхуэдизкIэ псынщIэу къэувыIати, рулыр зыIыгъ ТхьэкIумэкIыхь назэр натIэкIэ абджым къеуащ. «Чэфщ», - егупсысащ Дыгъужьыр. Щым хъуа машинэм къиIукIащ: - «Зы ети куэдщ» - жиIэу. «Еплъ ахэр, къагъуэтаи дыгъужь делэ, зы мыгъуэр сэ фэ фэзгъэщIынщ». Абы хэту Мыщэжьыр машинэм къибэкъукIащ. Абы зы кхъуэщын гуэри IэщIэтт икIи зыIурыбзаерт. Ар щхъуэжь къыжьэхэкIуэтащи, ней-нейуэ къызэпеплъыхь.
- ЕпIэщIэкIыт, епIэщIэкIыт, Мыщэжь! – къогуоукI ТхьэкIумэкIыхь назэр машинэм. – ХьэгъуэлIыгъуэр къызэрыдэжьэр пщыгъупщэжа?
Мыщэжьыр кIэкуакуэу щыт Дыгъужьым еуэри тIэрабгъуу къриудащ.
«А зымкIэ зэфIэкIауэ Тхьэм къыщIигъэкI!» - егупсысырт зи дунейр пшагъуэ къэхъуауэ щылъ Дыгъужьыжьыр. Машинэм и ежьэж макъым Дыгъужьым и псэр къыдыхыхьэжащ. Псэууэ къызэрынам щыгуфIыкIыжу ар щылът, къэтэджыжыну дзыхь имыщIу, тIэрабгъуу къизыудар Мыщэжьыр арами, ТхьэкIумэкIыхьым хуэдзэлашхэу...
