ГъуэгуфIхэм къахохъуэ

Шэджэм щIыналъэм хыхьэ Шэджэм ЕтIуанэ къуажэмрэ «Шэджэм цIыкIу» хьэблэмрэ я зэхуакум дэлъ, километри 3,5-рэ зи кIыхьагъ автомобиль гъуэгур иджырей мардэм къитIасэу зэрагъэпэщыжынущ. Р-217 федерал гъуэгум къыщыщIедзэри, Лениным и цIэр зезыхьэ уэрамым и кIыхьагъкIэ ирокIуэ ар.

Социальнэ мыхьэнэшхуэ иIэщ а гъуэгум. Ар йокIуалIэ курыт еджапIищым, сабий садитIым, администрацэм и унэм, полицэм и хэщIапIэм, поликлиникэм, нэгъуэщIхэми.
УхуакIуэхэм къапэщылъщ гъуэгум зрагъэубгъуну, асфальтрэ бетонрэ зэхэлъу тралъхьэну, зэхыхьэпIэ-зэхэкIыпIэхэр, бжэIупэ IухьэпIэхэр къыхагъэкIыну. Апхуэдэуи машинэ гъэувыпIэхэр, къэувыIэпIэхэр къыхагъэщхьэхукIынущ, цIыхухэм я шынагъуэншагъэр къызэгъэпэщным хуэщIа гъуэгу дамыгъэхэр ягъэувынущ.
Лэжьыгъэхэр ирагъэкIуэкIынущ «ГъуэгуфI шынагъуэншэхэр» лъэпкъ пэхуэщIэм ипкъ иткIэ икIи гъэмахуэм ирихьэлIэу къанэ щымыIэу зэфIагъэкIынущ.