Зэчэнджэщащ, зэкъуэуващ

Урысейм и Журналистхэм я зэгухьэныгъэм и Федеративнэ советым и зэIущIэ екIуэкIащ. Абы хэтхэр иджы щызэхуэсар Москвакъым, атIэ мы гъэм зи ныбжьыр илъэс 650-рэ зэрырикъур зыгъэлъапIэ Киров къалэ жыжьэрщ.

БлэкIа лъэхъэнэм зэгухьэныгъэм иригъэ­кIуэкIа лэжьыгъэм теухуауэ доклад ищIащ абы и правленэм и унафэщI Соловьёв Вла­димир. Къэпсалъэм ягу къигъэкIыжащ Сою­зым нэхъ гу зылъытапхъэу зэфIигъэкIа Iуэху­хэр. Къэбгъэлъагъуэмэ, абыхэм ящыщщ иджырей журналистикэм и «Урысейпсо-2024» форуму Сочи къалэм щрагъэкIуэкIар, хэ­кIуэда журналистхэм я фэеплъым и махуэу илъэс къэс дыгъэгъазэм и 15-м ягъэлъапIэр, «Дыщэ къэлэм» журналист дамыгъэ нэхъыщ­хьэхэр зэрыратым иращIылIа гуфIэ­гъуэр, «Дыщэ стратегие» зэпеуэр, «ЩытыкIэщIэ» документальнэ кином и фестивалу Желез­новодск къалэм щызэхагъэхьар, зэгухьэныгъэм и «Инфорум» егъэджэныгъэ проектхэр зэрагъэзащIэр. «Илъэсым и пэщIэдзэм, - къыхигъэщхьэхукIащ Соловьёв Владимир, - Урысейм и Журналистхэм я зэгухьэныгъэм хузэфIэкIащ тыкуэнышхуэхэм газетхэмрэ жур­налхэмрэ щащэ щIыпIэр хухахыным теу­хуауэ къыхилъхьа жэрдэмыр Урысейм и Правительствэм щыпхигъэкIын».
УнафэщIым гулъытэшхуэ хуищIащ жур­налистхэм хабзэ и лъэныкъуэкIэ къащхьэ­щыжынымкIэ центру езы Союзым и нэIэ тету лажьэм зэфIигъэкIхэм. Дунейпсо утыкум и ­гугъу щищIым Соловьёв Владимир къыхи­гъэбелджылыкIащ Китай ЦIыхубэ Республикэм хуаIэ пыщIэныгъэхэм зэрызаубгъур. Ар тепсэлъыхьащ Союзым и секретариатым ­игъэува наградэщIэхэм. Ахэр «ЩIыхь, пщIэ, IэщIагъэ куу», «ИIэ фIыщIэхэм папщIэ», «Жур­налистикэм и ветеран», «ЦIыхухэм зэ­радэIэпыкъуам папщIэ», «Прессэр зэрыди­Iыгъым папщIэ», «Мышынэу къызэрыщIэ­-кIам папщIэ» медалхэр.
Зэгухьэныгъэм мылъкум ехьэлIауэ иригъэ­кIуэкIа лэжьыгъэм и гугъу ищIащ абы и сек­ретариатым и унафэщI Токарский Денис.
Федеративнэ советым и етIуанэ Iыхьэм ­утыкур иратащ щIыналъэ къудамэхэм я Iэтащхьэхэм. ИрагъэкIуэкI лэжьыгъэм зэры­теп­сэлъыхьам къыдэкIуэу абыхэм жэрдэм зыбжанэ къыхалъхьащ а лэжьыгъэр нэхъыфIу зэфIэха зэрыхъунум хуэгъэзауэ.
ЗэIущIэр щызэхуищIыжым Урысейм и Журналистхэм я зэгухьэныгъэм и унафэщI Со­ловьёв Владимир къызэхуэсахэм фIыщIэ ­яхуищIащ жыджэру зэрылэжьам къыхэкIыу.
- Союзым и Федеративнэ советым хохьэ щIыналъэ къудамэхэм я унафэщI псори икIи ар илъэс къэс зэ зэхуос абы и Iэтащхьэмрэ ­секретариатым и унафэщIымрэ я отчётхэм едэIуэн папщIэ, - къыджиIащ Къэбэрдей-­Балъкъэрым и Журналистхэм я союзым и унафэщI Жыласэ Заурбэч. - Дэ Iэмал догъуэт къэралым и нэгъуэщI щIыналъэхэм ящыщ ди лэжьэгъухэм дахуэзэну, депсэлъэну, ды­зэчэнджэщыну, ди мурадхэр зэхуэтIуэтэну. Абы къыдэкIуэу ЦIыхубэ информацэм и IэнатIэхэм, театрым, кином я «Iуащхьиблым тету. Вятка-2024» медиафорумым дыхэтащ. Ки-ров щыпсэухэр дэ хуабжьу къытщыгуфIы-кIыу драгъэблэгъащ, езыхэм зэрыгушхуэ щIы­пIэхэр дагъэлъэгъуащ. Дэ дыщыIащ ­Циолковский К. Э. и цIэр зезыхьэу авиацэм-рэ космонавтикэмрэ я музейм, «Зэманым и псыежэх» скверым, сабийхэр зэрыджэгу хьэп­шыпхэр щащI «Гъатхэ» фабрикэм, «Вятка» ГТРК-м и телеканалым, «АКТВ» ме­диахолдингым, щIыпIэ типографием, лъэсу къы­щыткIухьащ Вяткэ псым и Iуфэм.