Гъэ еджэгъуэщIэм хуэхьэзыру IуощIэ

 Урысей Федерацэм и Правительствэм и УнафэщIым и къуэдзэ Чернышенкэ Дмитрий иджыблагъэ иригъэкIуэкIащ къэралым и егъэджэныгъэ IэнатIэр гъэ еджэгъуэщIэм зэрыхуэхьэзырым теухуа зэIущIэ. Iуэхур зыIутым теухуауэ абы къыщыпсэлъахэщ УФ-м Егъэджэныгъэмрэ щIэныгъэмкIэ, Узыншагъэр хъумэнымкIэ и министерствэхэм, Рособрнадзорым, Роспотребнадзорым, МЧС-м, ФСБ-м, МФД-м, Урысей гвардием я лIыкIуэхэр.
Гъэ еджэгъуэщIэм зэрыхуэхьэзырым теухуауэ зэIущIэм щхьэхуэу къыщыпсэлъащ гулъытэ хэха нобэ хуэныкъуэ щIыналъищым – Курск, Белгород, Брянск областхэм я лIыкIуэхэр. Апхуэдэуи я Iуэхухэр зыIутым къызэхуэсахэр щагъэгъуэзащ Луганск республикэм, Астрахань областым, Приморскэ крайм къикIахэми. 
Чернышенкэ Дмитрий зэIущIэм къыщыхигъэщащ зэхуагъэувыжа къалэнхэм тету егъэджэныгъэ системэм пыщIа IуэхущIапIэхэр гъэ еджэгъуэщIэм зэрыхуэхьэзырым щыхьэт техъуэ дэфтэрхэр зэрыратар, къэралым и щIыналъэ зыбжанэм щытыкIэ гугъухэр зэрыщыIэм, дунейм и къэхъукъащIэ къызэрымыкIуэхэми емылъытауэ. 
«Сабийхэр тыншу, гупсэхуу еджэн папщIэ егъэджэныгъэ IухущIапIэу мин 80-м щIигъур къызыхуэтыншэу гъэ еджэгъуэщIэм хуэдгъэхьэзыращ. Абы и фIыгъэкIэ школхэм, университетхэм кIуэнущ еджакIуэрэ студенту цIыху мелуан 26,8-рэ, абыхэм ящыщу мелуан 1,8-р япэ классхэм щIэтIысхьахэрщ», - жиIащ Чернышенкэ Дмитрий.
Мы гъэм Къэбэрдей-Балъкъэрым и еджакIуэ мини 123-р партэхэм дэтIысхьэжынущ, абыхэм ящыщу школ пщIантIэм япэу дыхьэнущ сабий мин 13,7-рэ. Нэгъабэ щыIа бжыгъэхэм нэхърэ ар мин 1,5-кIэ нэхъыбэщ.
2018 гъэм щегъэжьауэ республикэм курыт еджапIэу 15 щаухуащ, иджыри 6 мыгувэу абыхэм къахэхъуэнущ, нэгъуэщIхэри яухуэ. Къызыхуэтыншэу школ 65-рэ зэрагъэпэщыжащ, дызыхуэкIуэ илъэсищым апхуэдэ лэжьыгъэхэр иджыри школ 57-м щрагъэкIуэкIынущ. Сабий саду 55-рэ яухуащ.