Чемпионым и саугъэтыр къахь

Дон Iус Ростов къалэм дэт «Динамо» спорт комплексым мы гъэм ещанэу махуищкIэ щекIуэкIащ иджырей пятиборьемкIэ Олимп джэгухэм я чемпион Моисеев Андрей и саугъэтыр къэхьыным хуэунэтIа урысейпсо зэхьэзэхуэ. Абы хэтащ къэралым и щIыналъэхэм ящыщу 8-м я спортсмен, щIалэхэри хъыджэбзхэри зэгъусэу, 200-м щIигъу, я ныбжькIэ илъэс 14-м щIимыгъуахэу. 
ГуащIэу икIи удэзыхьэхыу екIуэкIа щхьэзакъуэ зэIущIэхэм Калабековэ Азизэ дыщэ медалыр къыфIихьащ Краснодар крайм щыщ Жабкинэ Софие. Ди хъыджэбзыр абы текIуащ псы есынымкIи къызэдэжэнымкIи. 
Зэхьэзэхуэм хъарзынэу зыкъыщигъэлъэгъуащ Хьэкъул Тимури, ауэ япэ увыпIэр абы IэщIихащ УФ-м и чемпион Сидоренкэ Александр. Апхуэдэуи дыжьын медалхэр къахьащ Глигорие Арианнэ, Къардэн Софие, КIуж Эллинэ, Мирюков Юрэ, Хачуев Темырлан, Остриков Влад сымэ. 
Гупхэм я зэпеуэм Къэбэрдей-Балъкъэрым и командэм етIуанэ увыпIэр къыщихьащ.
Зэхьэзэхуэм къыщыхэжаныкIахэм медалхэр, щIыхь тхылъхэр, фэеплъ саугъэтхэр яритащ Олимп джэгухэм я чемпион Моисеев Андрей.