ФIагъым и лъагапIэ-2025

Мы махуэхэм ЩIалэгъуалэм я унэм щызэхэт «ФIагъым и лъагапIэ-2025» II Кавказ Ищхъэрэ конференцым хэтхэм зэрызы­хуигъазэ тхыгъэ яхуигъэхьащ КъБР-м и Iэтащхьэ КIуэкIуэ Казбек. Абы къеджащ КъБР-м Iэтащхьэм и Администрацэм и УнафэщI Къуэдзокъуэ Му­хьэ­мэд.

Тхыгъэм къыщыгъэлъэ­гъуащ Налшык иджы етIуанэу мыхьэнэшхуэ зиIэ а зэIущIэр зэрыщызэхашэр, узыншагъэр ­хъумэнымкIэ IэнатIэм щрагъэ­кIуэкI Iуэхухэр фIагъ пылъу къызэгъэпэщынымкIэ лэжьыгъэ и пIалъэкIэ, щIэныгъэкIэ абдеж зэрыщызэхъуажэр.
- А Iуэхум къызэщIеубыдэ ди Президент Путин Владимир къигъэува пщэрылъхэр: Урысейм и жылагъуэм хэгъэхъуэныр, цIыху­хэм я узыншагъэр егъэфIэ­кIуэныр, гъащIэ кIыхь къагъэщIэнымкIэ дэIэпыкъуэгъу ­хъуныр. Ахэр зэдгъэхъулIэным­-кIэ мыхьэнэшхуэ иIэщ узын­шагъэр хъумэнымкIэ IэнатIэм зегъэу­жьыным, медицинэм и фIагъымрэ шынагъуэншагъэмрэ къызэгъэпэщыным, - къыхигъэщащ республикэм и Унафэ­-щIым.
КIуэкIуэ Казбек жиIащ фIагъымкIэ медицинэ IэщIагъэлI пажэхэм зэгъусэу ирагъэкIуэкI лэжьыгъэр Къэбэрдей-Балъкъэр Республикэм, Кавказ Ищхъэрэм, Урысей псом я медицинэм зиужьынымкIэ хэлъхьэныгъэшхуэ зэрыхъунур. Москва, Красно­ярск, Къэзан, Уфа, Новгород ­Ищхъэрэ, Екатеринбург, Улан-Удэ, Благовещенск, Кавказ Ищхъэрэм къикIа IэщIагъэлIхэр я щIэныгъэкIэ, зэфIэкIкIэ ядогуа­шэ щIыналъэм и медицинэ лэжьакIуэхэм.
Конференцыр къызэрагъэпэщащ КъБР-м Узыншагъэр хъу­мэнымкIэ и министерствэм, Медицинэ техникэмкIэ щIэныгъэ-къэхутакIуэ икIи гъэунэхуныгъэ урысей институтым, «Росздрав­надзор»-м ФIагъымкIэ и лъэпкъ институтым.
Зэхыхьэм хэтхэм «Росздрав­надзор»-м и унафэщI Самойловэ Аллэ къыбгъэдэкI фIэхъускIэ захуигъэзащ IуэхущIапIэм медицинэ дэIэпыкъуныгъэр зэры­хуащIэмкIэ къэрал кIэлъыплъы­ныгъэр къызэзыгъэгъэпэщ и къудамэм и унафэщI Федосеевэ Оксанэ. Апхуэдэу конференцыр къыщызэIуахым къэпсэлъащ УФ-м и Къэрал Думэм Узыншагъэр хъумэнымкIэ и комитетым и унафэщIым и къуэдзэ Башанкаев Бадмэ.
Абдежым къыщызэIуахащ ­Хэку зауэшхуэм и зэманым лIы­хъу­жьыгъэ къэзыгъэлъэгъуа медицинэ лэжьакIуэхэм ятеухуа сурэт гъэлъэгъуэныгъэр, апхуэ­дэуи ­гъуазджэмкIэ IэщIагъэлIхэм я IэдакъэщIэкIхэр щагъэлъагъуэ.