«ГъащIэм хуэщIа инфраструктурэ» лъэпкъ пэхуэщIэм ипкъ иткIэ еджапIэхэмрэ сабийхэм я нэгузегъэужьыпIэхэмрэ ухуэзышэ автомобиль гъуэгуу километр мини 3-м щIигъу 2025 гъэм зыхуей щыхуагъэзэнущ ди къэралым. УФ-м и Правительствэм и УнафэщIым и къуэдзэ Хуснуллин Марат ар щыжиIащ иджы иригъэкIуэкIа зэIущIэм.
Лэжьыгъэ зэхаублэнухэм я къалэн нэхъыщхьэу щытынур сабийхэм, адэ-анэхэм, егъэджакIуэхэм я шынагъуэншагъэр къызэгъэпэщынырщ, гъуэгухэм тыншу ахэр щызегъэкIуэнырщ икIи, абы ипкъ иткIэ, сабий садхэм, курыт еджапIэхэм, вузхэм, нэгузегъэужьыпIэ IуэхущIапIэхэм екIуалIэ автомобиль гъуэгухэр зэIузэпэщ ящIынущ, зэрагъэпэщыжынущ е щIэуэ яухуэнущ. Лэжьыгъэхэм я нэхъыбэр мы гъэ еджэгъуэщIэм ирихьэлIэу зэфIагъэкIын хуейщ.
«Сабий садхэм, школхэмрэ вузхэмрэ ухуэзышэ гъуэгухэр шынагъуэншэу щытыныр мыхьэнэшхуэ зиIэ Iуэхущ абыхэм щызекIуэ дэтхэнэ зыми и дежкIэ. Гъуэгухэм тралъхьэ асфальтыфIхэм, ягъэува дамыгъэхэм, къыхагъэщхьэхукIа зэхыхьэпIэ-зэхэкIыпIэхэм, щыпадзэ иджырей уэздыгъэхэм куэдкIэ елъытащ абы щызекIуэхэр насыпыншагъэм щыхъума хъуныр. Абы нэмыщI, школ автобусхэм я лэжьыгъэри нэхъ тынш ещI. «ГъащIэм хуэщIа инфраструктурэ» лъэпкъ пэхуэщIэм ипкъ иткIэ, щыIэ мардэм мы гъэм къидгъэтIэсэжынущ школхэмрэ вузхэмрэ ухуэзышэ автомобиль гъуэгуу 854-рэ е псори зэхэту километр мини 3-м щIигъу», - жиIащ Хуснуллин Марат.
УФ-м транспортымкIэ и министр Старовойт Роман къыщыпсалъэм къыхигъэщащ гъуэгуфIхэр къызэрызэрагъэпэщынум къыдэкIуэу машинэхэм псынщIэу къыщамыжыхьын папщIэ IэрыщI быркъуэшыркъуэхэр тралъхьэнущ, къэухьхэр щагъэувынущ, гъуэгу зэпрыкIыпIэхэр наIуэу къыхагъэщхьэхукIынущ.
Иджы ирагъэкIуэкIыну лэжьыгъэхэр зэрыщхьэпэр къагъэлъэгъуащ 2024 гъэм щыIа ехъулIэныгъэхэм. Псалъэм къыдэкIуэу, «ГъуэгуфI шынагъуэншэхэр» лъэпкъ пэхуэщIэм и фIыгъэкIэ еджапIэхэм ухуэзышэ автомобиль гъуэгуу 920-м щIигъу зэIузэпэщ ящIащ е псори зэхэту километр мини 3,1-м щIигъу икIи гъуэгум къыщхъу насыпыншагъэхэм я бжыгъэм къапщIэу кIэрыхуащ. Къэбгъэлъагъуэмэ, лъэпкъ пэхуэщIэм лэжьэн зэрыщIидзэрэ къэралым и школхэм, вузхэм, сабий садхэм, н.къ. екIуалIэ, псори зэхэту километр мини 5-м щIигъу зи кIыхьагъ автомобиль гъуэгухэр зыхуей хуагъэзащ.
Къэбэрдей-Балъкъэрым апхуэдэ Iуэхугъуэхэр щIыпIэ 44-м нобэкIэ щрагъэкIуэкI, псори зэхэту километр 80-м нэблагъэ абыхэм я кIыхьагъщ. Республикэм и щIыналъэ гъуэгухэр иджыпсту зэIузэпэщ щащI къуажэ-жылэ 15-м. Абыхэм нэмыщI, лэжьыгъэхэм дэщIыгъуу, псори зэхэту километри 5 зи кIыхьагъ гъуэгухэр иджыри щIыпIищым щызэрагъэпэщыжынущ.
Зыхуей хуагъазэ автомобиль гъуэгухэм я фIыгъэкIэ цIыхухэм Iэмал яIэнущ сымаджэщхэм, еджапIэхэм, щэнхабзэ, спорт ухуэныгъэхэм нэхъ тыншу екIуэлIэну, абыхэм къадэкIуэу муниципалитетхэри зэпащIэну.
2026 гъэм, псори зэхэту километри 100-м нэблагъэ зи кIыхьагъ, щIыналъэм и автомобиль гъуэгухэр зэрагъэпэщыжынущ. Иужьрей илъэсихым къриубыдэу республикэм зыхуей щыхуагъэзащ автомобиль гъуэгуу псори зэхэту километр 1118-рэ, иджырей уэздыгъэхэр щыпадзащ километр 380-м.
НобэкIэ щIыналъэм и автомобиль гъуэгум и процент 74,8-р абыхэм ехьэлIауэ щыIа мардэхэм къотIасэ.
