СПОРТ ХЪЫБАРХЭР

ТIуми медаль зырыз

БэнакIуэ цIэрыIуэу щыта Алиев Алий и цIэр зэрихьэу Дагъыстэным и Каспийск къалэм дэт, ЩIалэгъуалэм я спорт уардэунэм щекIуэкIащ УФ-м тэмэму зэхэзымыххэм алыдж-урым бэнэкIэмкIэ я чемпионат. Абы щызэпеуащ къэралым и щIыналъэхэм ящыщу 28-м я бэнакIуэ 76-рэ, я ныбжькIэ илъэс 21-м щIимыгъуауэ.

Къэбэрдей-Балъкъэрым и лIыкIуэу зэпеуэм хэтащ КIыщ Аслъэнбэчрэ Мудрэн Азрэтрэ икIи, ди гуапэ зэрыхъущи, Iыхьэншэ хъуахэкъым. Килограмм 72-рэ зи хьэлъагъхэм я деж щобанэ щIалэхэри, КIыщым дыжьын, Мудрэным домбеякъ медалхэр къахьащ.

Ди щIалэхэр зэхьэзэхуэм хуагъэхьэзыращ Елчэпар Мурат, Темырчы Темырлан, Къардэн Анзор, КIыщ Мурат сымэ.

Гупхэм я зэпеуэм Мэзкуу къалэм и командэм япэ увыпIэр иубыдащ, Владимир областым етIуанэр, Тамбов областым ещанэр.

Iэдэм зэкIэ ещанэщ

Урысей Федерацэм ММА-мкIэ и чемпионат Самарэ къалэм иджыблагъэ щекIуэкIащ. Абы щызэпеуащ къэралым и щIыналъэхэм я зэуакIуэ лъэщу 100-м щIигъу. Зэпеуэм щытекIуахэм Iэмал ягъуэтащ мы гъэм шыщхьэуIум Калугэ къалэм щызэхашэну дунейпсо зэхьэзэхуэм УФ-м и командэ къыхэхам хэту я зэфIэкIхэр щагъэлъэгъуэну.

Къэбэрдей-Балъкъэрым и щIыхьыр иIэту зэхьэзэхуэм хэтащ Алий Iэдэм. НыбжьыщIэм япэ зэIущIэхэр хъарзынэу иригъэкIуэкIащ, текIуэныгъэр абы къыщыхуэхьынуи щытащ. Килограмм 65-рэ зи хьэлъагъхэм я деж щызауэ Iэдэм финалым и Iыхьэ ныкъуэм нэсауэ зы тэлайкIэ теплъэкъукIри, къыхагъэщIащ икIи домбеякъ медалым нэхъыщхьэ къыхуэхьакъым.

ЩIалэр зыгъасэр Хьэщыкъуей Артурщ.

Сабийхэр хъумэным и махуэр ягъэлъапIэу

КъБР-м Эстетикэ гимнастикэмкIэ и федерацэм и Кубокыр къэхьыным хуэунэтIа зэхьэзэхуэ Налшык къалэм щекIуэкIащ. Абы щызэпеуащ спортсмен 285-рэ, 47-р ди республикэм щыщу. Псалъэм къыдэкIуэу, КъБР-м и командитху зэпеуэм хэтащ. Зэхьэзэхуэр теухуауэ щытащ Сабийхэр хъумэным я дунейпсо махуэр гъэлъэпIэным.

Гуп зэхьэзэхуэм етIуанэ увыпIэр къыщихьащ Къэбэрдей-Балъкъэрым СпортымкIэ и министерствэм и спорт еджапIэм и «Олимпия» командэм. Абы хэтащ Ажэгъуей Эмилие, Нартокъуэ Лянэ, Скосоревэ Софие, Жашуевэ Аланэ, Поповэ Ренатэ, Тенджыз Сабинэ, ПщыукI Дисанэ, Талъостэн Данэ, Чеченовэ Саидэ сымэ. Хъыджэбзхэм я ныбжьыр илъэс 14 - 16 хъууэ аращ.

Командэм дэлажьэр Шыгъушэ Татьянэщ.

Къэжэр Амир етIуанэщ

«ВТБ Лига гимнастики» фIэщыгъэр зэрихьэу Сочэ къалэм щыIэ «Сириус» щIыналъэм щрагъэкIуэкIащ сабийхэм спорт гимнастикэмкIэ я зэхьэзэхуэ. Абы хэтащ къэралым и щIыналъэ куэдым я спортсмен 1500-м щIигъу.

Къэбэрдей-Балъкъэрым икIауэ зэпеуэм хэтащ Бахъсэн къалэм и спорт еджапIэм и гъэсэнхэу Сидров Таир, КIыщ Азэмэт, Къэжэр Амир, Артюхов Богдан сымэ икIи гупхэм я зэпеуэм ещанэ увыпIэр щаубыдащ.

Щхьэзакъуэ зэпеуэхэм къыщыхэжаныкIащ Къэжэр Амир икIи дыжьын медаль абы къыщихьащ. ЩIалэ цIыкIум и тренерыр Апатьевэ Маринэщ.