Спорт хъыбархэр

Медалибгъу къахь

«Асатрян Арарат и фэеплъ Кубок» фIэщыгъэр зэрихьэу кудомкIэ щIыналъэхэм я зэхьэзэхуэ Ставрополь къалэм щекIуэкIащ. Хэгъэрейхэм нэмыщI, абы щызэпеуащ Луганск областым, Дон Iус Ростов къалэм, Къэбэрдей-Балъкъэрым, Дагъыстэным, нэгъуэщIхэми я спортсмену 200-м щIигъу.

Ди республикэм и лIыкIуэхэм зэфIэкIыфIхэр зэпеуэм къыщагъэлъэгъуащ икIи медалибгъу абы къыщахьащ. Я хьэлъагъ елъытауэ зыхэта гупхэм щытекIуащ ХьэтIэхъу Къантемыр, Мэлъкъуэнды Елдар, Лобжанидзе Дамир, КIурашын Андемыркъан, Маргъущ Алихъан сымэ.

Зэхьэзэхуэм япэ увыпIэр къыщихьащ икIи техникэфI игъэлъэгъуахэм щхьэкIэ саугъэт лъапIэ щхьэхуэу къратащ Мэлъкъуэнды Имран.

Дыжьын медалхэр къахьащ Къулътырбей Амиррэ Къардэн Дамиррэ. Елбэрд Айдэмир ещанэ хъуащ.

Спортсменхэр зэхьэзэхуэм хуагъэхьэзыращ Мэремыкъуэ Казбекрэ Щоджэн Аслъэнрэ.

Дыщэ медалу тIурэ зы домбеякърэ

УФ-м бэнэкIэ хуитымкIэ пашэныгъэр къыщыхьыным хуэунэтIауэ Иркутск къалэм и «Байкал-Арена»-м иджыблагъэ щекIуэкIа зэхьэзэхуэм дыщэ медалитI щызэIэрагъэхьащ Къэбэрдей-Балъкъэрым и бэнакIуахэм.

Я хьэлъагъ елъытауэ зыхэта гупхэм япэ увыпIэхэр щаубыдащ Елмэс Къантемыррэ (кг 80) Энеев Марсуррэ (кг 60) икIи абыхэм Iэмал ягъуэтащ мы гъэм Азербайджаным и къалащхьэ Баку щызэхашэну дунейпсо зэIущIэм я зэфIэкIхэр щагъэлъэгъуэну.

Ди щIалэхэм ящыщу зэхьэзэхуэм иджыри къыщыхэжаныкIащ Даур Амир. Абы къихьащ домбеякъ медаль.

Къыхэдгъэщынщи, иджы екIуэкIа зэхьэзэхуэм щызэпеуащ ди къэралым и щIыналъэхэм ящыщу 70-м я бэнакIуэ 500-м нэблагъэ.

Одинцовэрэ Екатеринбугрэ къащыпоплъэ

Кавказ Ищхъэрэм кикбоксингымкIэ пашэныгъэр къыщыхьыным хуэунэтIа зэхьэзэхуэ Дэгъыстаным и Каспийск къалэм щекIуэкIащ. Абы щызэпеуащ спортсмену 1000-м щIигъу, щIалэхэри хъыджэбзхэри зэхэту, я ныбжькIэ илъэси 10-м къыщыщIэдзауэ 40-м нэсыху.

Къэбэрдей-Балъкъэрым и лIыкIуэу зэхьэзэхуэм спортсмени 115-рэ хэтащ икIи медаль зэхуэмыдэу 63-рэ къахьащ, абыхэм щыщу 18-р дыщэу.

Илъэси 10 -12 зи ныбжь хъыджэбз цIыкIухэм ирагъэкIуэкIа зэпеуэм Макаевэ Ясминэ япэ увыпIэр къыщихьащ, илъэс 13 -14 зи ныбжьхэм я деж щытекIуащ Бекъул Ирадэ, Жэрыщты Миланэ, КIарэ Асалинэ сымэ.

Илъэс 13 -14 зи ныбжь щIалэ цIыкIухэм я деж Захаров Кирилл, Курбанов Рэмэзан, Бэгъуэт Имир, Сындыкъу Iэдэм сымэ япэ щыхъуащ. Илъэс 15 -16 хъухэм я деж щытекIуащ Куэший Ислъамрэ ХьэщIэлI Iэдэмрэ.

Илъэс 17-18 зи ныбжь хъыджэбзхэм ирагъэкIуэкIа зэпеуэм ГуIэтыж Дианэрэ Шуваловэ Каринэрэ дыщэ медалхэр къыщахьащ, щIалэхэм я деж а ныбжь дыдэм япэ щыхъуащ ХъутIэ Адэлбийрэ Джангуразов Щамилрэ.

ЦIыху балигъхэм я зэхьэзэхуэм Гъубжокъуэ Рустам, Блашэ Темырлан, Дамалей Вадим сымэ щыпашащ, цIыхубзхэм – Ржевская Еленэ.

Зэпеуэхэм япэ увыпIитIыр щызубыдахэр хэтынущ УФ-м пашэныгъэр къыщыхьыным хуэунэтIауэ мы гъэм накъыгъэм и 19 - 24-хэм Мэзкуу областым и Одинцовэ къалэм щрагъэкIуэкIыну зэIущIэмрэ УФ-м и чемпионату щэкIуэгъуэм и 24 - 29-м Екатеринбург къалэм щызэхашэну зэхьэзэхуэмрэ.

         Ди командэм и тренерхэр Саралидзе Айдин, Сасыкъ Анзор, Боллоев Аслъэн, БейцIыкIу Ибрэхьим, ДыщэкI Аслъэнбэч, Куэшмэн Рустам, Къудейхэ Алимрэ Залымрэ сымэ.