Хэкур зыхъумэу хэкIуэдахэм я фэеплъу

Къэбэрдей-Балъкъэрым и полицейхэр, ветеранхэмрэ жылагъуэ лэжьакIуэхэмрэ хэтащ «Фэеплъым и нэху уэздыгъэ» урысейпсо акцэм.

Налшык щекIуэкIащ Фэеплъымрэ щыгъуэмрэ теухуа «Фэеплъ уэздыгъэ» хэкупсэ акцэ. Абы зэхуишэсат КъБР-м щыIэ МВД-м и унафэщIхэр, ветеранхэмрэ жылагъуэм щыщхэмрэ, Хэкум и хуитыныгъэмрэ мамырыгъэмрэ папщIэ зи гъащIэр зытахэм я фэеплъым пщIэ хуащIыну. 
Къызэхуэсахэм яхэтащ КъБР-м къэрал кIуэцI IуэхухэмкIэ и органхэм яветеранхэм я щIыналъэ жылагъуэ IуэхущIапIэм и унафэщI Пыхъ МуIэед, КъБР-м щыIэ МВД-м лэлажьэ Жылагъуэ советым и тхьэмадэ Мэкъушэ Руслан, КъБР-м и Муслъымэнхэм и управленэм и унафэщIым и къуэдзэ Сыжажэ Алимрэ Псыхуабэ, Черкесск щIыналъэ¬хэм я архиепископ феофилакт, Налшык къалэ округым и благочиннэ Бобылёв Валентин, апхуэдэуи полицэм и кадет классхэм щеджэхэр. 
Iуэхур щекIуэкIа, Милицэм и скверым деж къыщыпсэлъахэм и гугъу ящIащ Хэку зауэшхуэм щыщIидза зэманым къэралыр зэрыта щытыкIэм, абы цIыхухэм къахуихьа гузэвэгъуэм.. Къыхагъэщащ аржэщ–махуэ I4I8-кIэ зэрекIуэкIар ди щхьэщыгум мамырыгъэ щыIэным. Илъэс 85-рэ дэкIами, лIыхъужьхэм я щIэблэм зыщагъэгъупщэркъым я адэшхуэхэм къагъэлъэгъуа лIыхъукжьыгъэр, зауэ шынагъуэм ТекIуэныгъэ Иныр къызэрахьар. 
 - Ди нобэ зэманми апхуэдэу дыщIобэн ди къэкIуэнум. Дзэ Iуэху хэхам хэтхэр, ди зауэлI псори Хэку зауэшхуэм и лIыхъужьхэм, Урысейр зыхъумэхэм къатепщIыкIыжахэрщ. Зэкъуэтыныгъэр, гъунэгъум худиIэ гуапагъэмрэ лъагъуныгъэмрэ, лIэщIыгъэгъуэ куэд хъуауэ ди лъэпкъхэм тхэлъхэр адэкIи хуэщхьэпэнущ цIыхубэ фэеплъыр тхъумэнымрэ сыт хуэдэ шынагъуэми дыпэщIэтынымкIэ.
Мыхьэнэшхуэ иIэщ щIэблэщIэм Хэку зауэшхуэм и фэеплъыр яхъумэным, къэкIуэнумкIэ фIэщхъуныгъэ яхэлъынымди мамыр псэукIэр зи фIыщIэр ящIэным, - къыхигъэщащ къэрал кIуэцI IуэхухэмкIэ министру КъБР-м щыIэм и къалэнхэр пIалъэкIэ зыгъэзащIэ Мамхэгъ Назир. 
ХэкIуэда лIыхъужьхэм я фэеплъым пщIэ хуащIу дакъикъэкIэ щымри, зи къалэн ягъэзащIэу зи псэр зыта хабзэхъумэ зауэлIхэм я фэеплъым деж удз гъэгъахэр ягъэтIылъащ.