Хьэрхуэрэгъухэм къызэранэкI

ЩIымахуэ Олимп джэгухэм и епщыкIузанэ махуэр Урысейм и командэ къыхэхамрэ абы къыдэщIхэмрэ я дежкIэ тыншакъым. Пэжщ, медаль бжыгъэхэм тIукIэ хэхъуащ, ауэ яIэщIэкIа Iэмалымрэ иужькIэ къызыхуэнамрэ зэплъытмэ, къахуихьар гукъеуэу жыпIэ хъунущ.

Халили Саид, Логинов Александр, Цветков Михаил, Латыпов Эдуард сымэ зыхэта биатлонымкIэ эстафетэм дыщэ медалым пэгъунэгъу дыдэ хуэхъуат ди щIалэхэр.  Къызэдэжэм и япэ дакъикъэм къыщыщIэдзауэ пашэныгъэр зыубыда Латыповым ар зыIэщIигъэкIащ. Хэгужьеихьщ, гузавэм зэщIищтэри, хуэмыфащэ щыуагъэ куэд къыIэщIэщIащ. Иужьрей къэувыIэпIэм нэщанэхэм щеуэм тхуэнейрэ блэцIэфтащ. Олимп джэгухэм домбеякъ медаль къыщыпхьыныр ехъулIэныгъэщ, ауэ дыщэр уи Iэрылъхьэу къэплъытэу абы укъыщыхуэнэжым и дежщ, шэч хэмылъу гущIыхьэщ.

 Япэрейм зыгуэркIэ ещхь хъуащ ЛъэрыжэкIэ къызэдэжэмкIэ зэхьэзэхуэр. ЩIэдзэкIэфI дыдэ къэзыгъэлъэгъуа Алдошкин Даниил, Трофимов Сергей, Захаров Руслан сымэ США-р хьэрхуэрэгъу къащыхуэхъуа финал ныкъуэ зэпеуэм олимп рекордрэ мылыджэ захуэхэм я дунейпсо рекордрэ щагъэуващ. Ауэ дыщэм щыщIэбэным къару яхурикъужакъым. Норвегием драгъэкIуэкIа финал къызэдэжэм Урысей Федерацэм и командэ къыхэхам зы Iэмали иIакъым пашэныгъэр иубыдыну.  Апхуэдэ дыдэу, мыпхуэдэ зэхьэзэхуэхуэшхуэхэм дыжьын медаль къэпхьауэ укъыхэкIыныр фIы дыдэщ, ауэ дыщэри гъунэгъу дыдэт.

БобслеимкIэ зэпеуэми ди къэралым и атлетхэм медалхэр щызыIэщIагъэкIащ. Зэхьэзэхуэм и етIуанэ махуэр Гайтюкевич Ростислав и экипажым ещанэ увыпIэм щыту къыщIидзащ, арщхьэкIэ еянэм къекIуэтэхауэ и кIэм нагъэсащ. Япэ увыпIэр къэзыхьахэм ди щIалэхэр секунд 2,42-кIэ къакIэрыхуащ.

Урысей фристайлисткэ Таталинэ Анастасие Пекин щекIуэкI Олимпиадэм дунейпсо чемпионрэ зыкъыщигъэлъагъуэ спорт лIэужьыгъуэм щынэхъ лъэщ спортсмену кIуат. Абы сытым дежи нэхъыфIу къехъулIэ «биг эйр»-м и Iуэхур щыдэкIакъым, иужькIэ слоупстайлым еплIанэ  щыхъуащ. Езы спортсменкэми, а спорт лIэужьыгъуэм и щIэныгъэлIхэми къызэралъытэмкIэ, Анастасие текIуэныгъэ къэзыхьахэм ефIэкIащ, арщхьэкIэ судьяхэр абы зэреплъар нэгъуэщIущ.

Дыгъуасэ екIуэкIащ биатлонымкIэ километрих къыщызэранэкIа цIыхубзхэм я эстафетэр. Казакевич Иринэ, Резцовэ Кристинэ, Мироновэ Светланэ, Нигматулинэ Юлианнэ сымэ абы дыжьын медалыр къыщахьащ. Ди спортсменхэр секунд 12-кIэ къакIэрыхуащ дыщэ медалхэр зыIэрызыгъэхьа Швецием и командэ къыхэхам. Германием и биатлонистхэр ещанэщ.

Дыщэр яIэщIэкIащ ди щIалэхэм дыгъуаси. Пекин щекIуэкI Олимп джэгухэм тIэунейрэ и чемпион щыхъуа икIи дыжьын медалыр щызыIэрызыгъэхьа Большунов Александррэ Терентьев Александррэ лыжэкIэ спринтым къыщызэдэжэм ещанэу къэсауэ аращ, пашэхэм ящыщу къэкIуа пэтми. Ступак Юлиерэ Непряевэ Натальери яхузэфIэкIар ардыдэращ.

Официальнэу щымыт гуп зэхьэзэхуэм дыщэ медаль 13 иIэу Мазаем и 17-м ирихьэлIэу пашэныгъэр щиубыдащ Норвегием и командэ къыхэхам. Абы къакIэлъокIуэ бжьыпэр пщIэнейрэ зыубыда Германием и спортсменхэр. НэхъыфIищым яхэтщ дыщэ медалу 8 зыIэрызыгъэхьа Америкэм и Штат Зэгуэтхэм я командэ къыхэхар. Урысей Федерацэм и Олимп комитетым и атлетхэр ебгъуанэ увыпIэм щытщ. Ди къэралым къихьащ дыщэ медалу 4, дыжьыну  8, домбеякъыу 11-рэ. Псори зэхэту медаль бжыгъэхэмкIэ япэ итщ дыщэхэмкIи пашэ Норвегиер - 28-рэ. Урысей Федерацэм Олимп джэгухэр зэрыщIидзэрэ медаль зэмылIэужьыгъуэу 23-рэ къихьащ. Германием и спортсменхэм медаль 20 яIэщ.