ГуфIэгъуэри гуIэгъуэри зэпэжыжьэкъым

Пекин щекIуэкI ХХIV ЩIымахуэ Олимп джэгухэм Урысей Федерацэм и атлетхэм иджы­ри медаль зыбжанэ щызыIэрагъэ­хьащ. 

Домбеякъ медалхэкIэ щхьэ­закъуэ пашэныгъэр зыIыгъ ди къэралым иджыри зы къыхуихьащ фристайл-акробатикэм зыкъыщызыгъэлъэгъуа Буров Илья. Абы и закъуэщ цIыхуих зыхэт суперфиналым Урысей Федерацэм щыщу нэсыфар. Иужьрей увыпIэм щыту къекIуэкI Буровыр кIэух пкIэгъуэм зэфIэкI лъагэ къигъэлъэгъуащ икIи домбеякъым нэс дрихьеящ. Илья къефIэ­кIащ чемпион хъуа Китайм и лIыкIуэмрэ Украинэм щыщ спортсменымрэ. 
Олимпиадэм и епщыкIущанэ махуэм Урысей Федерацэм и командэ къыхэхам медалитI къыхуихьащ. ТыгъитIри ди спортсменхэм щызыIэрагъэ­хьар фигурнэу къэжыхьынымкIэ зэпеуэрщ. Программэ кIэщIхэм иужькIэ пашэныгъэр иIыгъыу кIэух зэпэщIэтыныгъэхэм ирихьэлIа, Олимп ­джэ­гу­хэм и етIуанэ махуэм щыщIэ­дзауэ гукъеуэм къыхэ­мыкI Валиевэ Камилэ а спорт лIэужьы­гъуэм дихьэххэр куэдкIэ щыгугът. 
Ди къэралым и спортсменхэм ящыщу япэу мылым къы­техьа Трусовэ Александрэ и гъащIэм спортым щиIа нэхъыфI дыдэ ехъулIэныгъэр ­къехъулIащ. Фигурнэу къэжы­хьы­нымкIэ лIэужьыгъуэм япэу абы щигъэзэщIа пкъыгъуэхэм хуэдэ нэгъуэщIым хузэфIэкIы­ныр фIэщщIыгъуейщ. Александрэ къыкIэлъыкIуэу утыкум ­къи­хьащ Щербаковэ Аннэ. Апхуэдэ дыдэу фIыщэу зыкъэзыгъэлъэгъуа ди спортсменыр судьяхэм ягу дыхьащ икIи балл бжыгъэ хуагъэувахэм япкъ иткIэ Олимп джэгухэм я чемпион хъуащ. Трусовэ Александрэ етIуанэщ. Домбеякъ медалыр зыIэригъэ­хьащ Японием и лIыкIуэм. 
Программэ кIэщIхэм япэ увыпIэр къыщызыхьа Валиевэм иужьрей къэжыхьыгъуэм щыуагъэ зыбжанэ щыIэ­щIэщIэри медалыншэ еплIанэ увыпIэм къыщыувыIащ. Камилэ хуабжьу дамыгъэ лъапIэм хущIэкъуащ, ар мылым къы­зэрытехьа къудейр лIыхъужьыгъэу къэп­лъытэ хъунущ. Ауэ мы Олимпиадэм абы къытепсыхьа гугъуе­хьхэр, шэч хэлътэкъым и зэ­фIэкIым зэран зэрахуэхъунур. Апхуэдэуи къэхъуащ. Иджы дытемыпыIэу дыпэп­лъэнщ Дунейпсо Олимп Комитетым и унафэм.
А махуэм зэхэта зэхьэзэхуэхэм ди спортсменхэм нэгъуэщI медаль зыри къыщахьакъым. Лъэ­рыжэкIэ метр 1000-м къы­щызэдэжэнымкIэ зэпеуэм еп­лIанэ увыпIэр къыщихьащ Голиковэ Ангелинэ. Домбеякъ медалыр зыIэрызыгъэхьа Америкэм и Штат Зэгуэтхэм къикIа Боуи Бриттани Ангелинэ къы­зэрыкIэрыхуар секунд 0,1-кIэщ. 
ЩIымахуэ Олимп джэгухэм ски-кроссымкIэ финалышхуэр дыгъуасэ Пекин щекIуэкIащ. Абы домбеякъ медалыр къыщихьащ Урысейм и командэ къыхэхам и атлет Риздик ­Сергей. Иджырейр абы Олимпиадэхэм щызыIэригъэхьа ­етIуанэ медалщ – илъэсиплI ипэкIэ Пхёнчхан ар ещанэ щыхъуауэ щытащ. 
Официальнэу щымыт гуп зэпеуэм я пашэныгъэр щагъэбыдащ Китайм щекIуэкI Олимпиадэм дыщэ медалу 15 къы­щызыхьа Норвегием и спортсменхэм. Абыхэм тхукIэ къакIэроху нэмыцэхэр. Америкэм и Штат Зэгуэтхэмрэ хэгъэрейхэмрэ олимп чемпионхэр дэтхэнэми спорт лIэужьы­гъуи 8-кIэ зыIэригъэхьащ. ­Урысейм и Олимп комитетыр зэ­­рыеб­гъуанэщ, ещанэ, еп- лIанэ увы­пIэ­хэмкIэ псоми ефIэкIыу.