ЛъагапIэщIэхэр зи гугъапIэ Хьэпэ Заур

Урысей Федерацэм и премьер-лигэм и медалхэм щIэбэн Мэзкуу и «Локомотив»-м зэхъуэкIыныгъэщIэхэр щекIуэкIащ.  Мэзкуудэсхэм я тренер нэхъыщхьэ къалэныр къыхуагъэфэщащ ди лъэпкъэгъу Хьэпэ Заур.

Иджырей тренер зэхъуэкIыныгъэр клубым и дежкIэ ещанэ хъуащ мы джэгъугъуэ лъэхьэнэр зэрыщIидзэрэ. Япэр къыщыхъуар 2021 гъэм и жэпуэгъуэрщ, серб Николич Марко и пIэкIэ командэр игъэсэн щIидзащ нэмыцэ тренер Гисдоль Маркус. АрщхьэкIэ «Локомотив»-м абы и гъусэу къэралым и чемпионатым зэIущIи 8 къудей щригъэкIуэкIауэ аращ. ЩIы-махуэ зыгъэпсэхугъуэр зэриухыу Урысей Федерацэм Украинэм щригъэ-кIуэкI къалэн щхьэхуэ зиIэ дзэ операцэм къыхэкIыу, хамэ къэрал щыщ нэгъуэщI спорт IэщIагъэлIхэми хуэдэу, Гисдоль мэзкуудэсхэр къигъэнащ.

Абы лъандэрэ командэм и тренер нэхъыщхьэм и къалэнхэр игъэзэ-щIащ нэхъапэм «Локомотив»-м щыджэгуу щыта Лоськов Дмитрий. Ауэ ар а къулыкъум зэрытетар гупым и зэIущIиплI къудейщ. Абыхэм ящыщу «гъущIгъуэгум и лэжьакIуэхэм» текIуэныгъищ, «Химки»-м, «Ахмат»-м, «Спартак»-м къыщыфIахьащ. ТхьэмахуиплIым къриубыдэ лъэхъэнэм къы-щыхэзыгъэщIар ЦСКА-м и закъуэщ. Иужьрей мазэхэм елъытауэ «Локо-мотив»-м зэхьэзэхуэм и турнир таблицэм щиIыгъ увыпIэр Iей-къым – ет-хуанэу къыщыкIуэ пэтми ещанэ увыпIэр зыIыгъ ЦСКА-м очкоих къудей-кIэ къыкIэрыхуу аращ икIи зы джэгугъуэкIэ нэхъ мащIэ иригъэкIуэкIащ. 

Мэлыжьыхьым и 4-м «Локомотив»-м и тренер нэхъыщхьэ къалэныр игъэзэщIэну и пщэ къыдалъхьащ гъуащхьэтет цIырыIуэ, топ джэгун щигъэта нэужь тренер лэжьыгъэм зезыпщыта Хьэпэ Заур. Ди лъэпкъэгъум и гъэсэныгъэр иджыри къэс зыхуэгъэзар гъуащхьэтетхэрат. 2016 гъэм къыщыщIэдзауэ а лэжьыгъэращ Заур «Локомотив»-ми щигъэзэщIар.

Мэзкуу и «Локомотив» и тренер нэхъыщхьэу нэхъапэм щыта Сёмин Юрий къыхигъэщащ командэм и тренер нэхъыщхьэ къулыкъур къызыхуагъэфэща Хьэпэм ехъулIэныгъэщIэхэр зыIэригъэхьэну Iэмал псори зэрыбгъэдэлъыр. «Заур футболым опыт ин щызиIэ цIыхущ, футболистуи тренеруи зыбжанэрэ Урысейм  и чемпионатым щытекIуащ, - жиIащ Сёминым. – Медалхэм щIэбэна командэм  хэту сытым щыгъуи лэжьащ. ЕхъулIэныгъэкIэ дохъуэхъу».

 Хьэпэ Заур топ джэгуныр къыщыщIидзар Налшык и «Спартак»-рщ, I98I гъэм. Налшыкдэсхэм я гъуащхьэтет Кокорин Николай сымаджэ зэрыхъуам къыхэкIыу Заур гъуэм дагъэувэн хуей хъуат абы щыгъуэм. Зи джэгукIэр куэдым ягу дыхьа адыгэ щIалэщIэр 1986 гъэм Мэзкуу и «Спартак»-м ирагъэблэгъащ. Абы иужькIэ ди лъэпкъэгъур хэтащ Ярославль и «Шинник»-м. 1989 - 1990 гъэхэм Тбилиси и «Динамо»-м и гъуэм дэтащ икIи Куржым и чемпионатым и дыщэ медалыр къихьащ.

Хьэпэ Заур и ехъулIэныгъэ нэхъ ин дыдэхэр щызыIэригъэхьар Владикавказ и «Спартак-Алания»-м щыщыIа 1991-1999 гъэхэрщ. Осетие Ищхъэрэ-Аланием и футбол командэ нэхъыщхьэм хэту 1995 гъэм ар Урысей Федерацэм и чемпион хъуащ, 1992, I996 гъэхэм дыжьын медалхэр зыIэригъэхьащ, къэралым и командэ къыхэхам 1994 гъэм хагъэхьащ.

2000 гъэхэм Хьэпэ Заур Мэзкуу и «Локомотив»-м ирагъэблэгъащ. Илъэс зыбжанэкIэ зыхэта командэ цIэрыIуэм аргуэру тIэунейрэ къэралым и чемпион щыхъуащ, Урысей Федерацэм и кубокыр къихьащ. Урысей Федерацэм и командэ къыхэхам хэту Заур Чемпионхэм я лигэм, УЕФА-м и Кубокым и саугъэт нэхъыщхьэхэм щIэбэнащ.
Топ джэгуныр иуха иужькIэ Хьэпэ Заур «Локомотив»-м и тренер хъуащ, Пермь и «Амкар»-м, Мэхъэчкъалэ и «Анжи»-м, «Спартак-Налшыкым» я гъуащхьэтетхэр         игъэсащ.

2016 гъэм къыщыщIэдзауэ 2022 гъэ пщIондэ Мэзкуу и «Локомотив»-м и гъуащхьэтетхэм я тренеру лэжьащ. Мы гъэр къызэрихьэрэ клубым футболистхэр къыщыхах и къудамэм хэтащ.

Ди гуапэщ Хьэпэ Заур и къулыкъущIэр ехъулIэныгъэкIэ ирихьэкIыну, лъэгапIэщIэхэр къызэринэкIыну!