Зы имыуасэ гъатхэпэ зэIущIэхэр

ЩIымахуэ зыгъэпсэхугъуэхэмрэ зыгъэсэныгъэхэмрэ командэхэм яухри Урысей Федерацэм футболымкIэ и етIуанэ дивизионым и Япэ гупым щекIуэкI зэхьэзэхуэм и гъатхэ-гъэмахуэ лъэхъэнэм зэIущIэхэм мазэ ипэкIэ щIадзэжащ.  Абы хыхьэу Къэбэрдей-Балъкъэрым и футбол командэ нэхъыщхьэм гъатхэпэ мазэм къриубыдэу зэIущIищ иригъэкIуэкIащ икIи дэтхэнэ зыри арэзы укъэзымыщI бжыгъэкIэ иухащ.

Зыгъэпсэхугъуэ нэужьым япэу «Спартак-Налшыкыр» ЕсэнтIыгу къалэм щыIущIащ щIыпIэ командэм. Зэман кIыхькIэ официальнэ зэIущIэхэр езымыгъэкIуэкIа футболистхэм щтэIэщтаблэу зэпэщIэтыныгъэр ирагъэжьащ. ПэщIэдзэ дакъикъэхэм джэгум и нэхъыбэ зэманыр щекIуэкIыр губгъуэм икурт – футболеплъхэм я фIэщ хъуну хуейт щIалэхэр хуэмурэ зэхьэзэхуэм хэзэгъэжу. АрщхьэкIэ дэнэт?! ЗэIущIэм и япэ Iыхьэр зэрыщIидзам хуэдэ дыдэу налшыкдэсхэм я жыджэрагъыншэкIэ ар иухащ.

Джэгум и етIуанэ Iыхьэми «Спартак-Налшыкым» ущIыщытхъун джэгукIэ къигъэлъэгъуауэ пхужыIэнукъым. Шынагъуэншэ ебгъэрыкIуэныгъэ закъуэтIакъуэкIэ зэхъуэж мыхъумэ, зэпэщIэтыныгъэм и нэхъыбэр щекIуэкIыр аргуэру джэгупIэ губгъуэм икурт. Апхуэдэу, бжыгъэр къызэIуамыхауэ иухащ гъатхэ-гъэмахуэ лъэхъэнэм и япэ зэIущIэр.

Къыхэдгъэщынщи, а махуэм ди щIалэхэм хьэрхуэрэгъу къахуэхъуар зэIущIэ пщыкIуийм иужькIэ очкоиплI фIэкIа имыIэу зэхьэзэхуэм и турнир таблицэм и иужьрей увыпIэм щыт командэращ. «ЕсэнтIыгум» и дежкIэ ар къыкIэлъыкIуэ текIуэныгъэ мащIэу къэплъытэ хъунуми, «Спартак-Налшыкыр» тафэм къыщытридза зэIущIэу къыщIэкIащ ар.

КъыкIэлъыкIуэ зэIущIэр налшыкдэсхэм Мэхъэчкъалэ и «Легион Динамо»-м драгъэкIуэкIащ. Япэр зыгъэпсэхугъуэ нэужьым иджыри я джэгукIэр зэрызэтемывэужам хуахьамэ, иджырейр Iэмал имыIэу «Спартак-Налшыкым» и очко бжыгъэхэм щыхигъэхъуэн зэIущIэ хъуну ди футболеплъхэр щыгугъырт. АрщхьэкIэ...

ЗэIущIэм и пэщIэдзэ дакъикъэхэр жыджэрагъкIэ езыгъэжьа налшыкдэсхэм я мурад псори икIэщIыпIэкIэ къызэтекъута хъуащ епщыкIубланэ дакъикъэр екIуэкIыу. А лъэхъэнэм «Легион Динамо»-м гупышхуэу ебгъэрыкIуэныгъэ шынагъуэ къызэригъэпэщащ. Топыр зыIыгъа Удунян ар «Спартак-Налшыкым» и штрафнойм ит Саадуевым и лъэныкъуэмкIэ къыхитащ. Ди гъуащхьэхъумэхэм топым кърагъэгъэзащ, арщхьэкIэ аргуэру мэхъэчкъалэдэсхэм къаIэрыхьэжащ. КъекIуэкIыу Курбновымрэ Удунянрэ зэIэпаха топыр Саадуевым къылъысажащ икIи ар лъэщу зэуа топыр хьэщIэхэм я гъуащхьэтетым пэжыжьэ штангэм техуэри, гъуэм дыхьащ – 1:0.

Абы зи лъэр щIиуда ди щIалэхэм къызэрагъэпэщ ебгъэрыкIуэныгъэхэм хуэфэщэн кIэух ирагъэгъуэтыфыртэкъым. Ахэр «Легион Динамо»-м и гъуащхьэхъумэхэм къызэпаудырт е «Спартак-Налшыкым» и футболистхэм я щыуагъэкIэ топыр яфIэкIуэдырт.

Куэдрэ зыпигъэплъакъым зэIущIэм щыдагъэкIа етIуанэ топми. Мэхъэчкъалэдэсхэм я зи чэзу ебгъэрыкIуэныгъэм и кIэухыу топыр ди щIалэхэм угловойм ягъэкIуащ. Саадуевым къыхита иужькIэ топыр къызыIэрыхьа Вагабовым зэIущIэм и бжыгъэр игъэбэгъуащ – 2:0.

Зэман кIэщIым къриубыдэу топитI зэрыдагъэкIам жан къищIа «Легион Динамо»-м тепщэныгъэр иубыдыпащ икIи щIэх-щIэхыурэ налшыкдэсхэм я гъуэм ебгъэрыкIуэрт. Уеблэмэ топ дагъэкIынуи Iэмал зыбжанэ яIащ.

Джэгугъуэ лъэхъэнэр зэрыщIидзэжрэ «Спартак-Налшыкым» зы очко фIэкI къыхуэмыхьауэ Мэхъэчкъалэ щригъэкIуэкIа зэIущIэри хэщIыныгъэкIэ иухащ.

Япэ зэIущIитIыр нэгъуэщI къалэхэм щезыгъэкIэкIыу очокитху зыфIэкIуэда Къэбэрдей-Балъкъэрым и футбол командэ нэхъыщхьэм ещанэр и унэ щригъэкIуэкIырт. «Уи унэ и блынхэри сэбэп къыпхуохъу» псалъэжьым тету Налшык щызэхэта зэIущIэм хэгъэрейхэм я текIуэныгъэкIэ фIэкIа зыри дыпэплъатэкъым. 

Джэгум и япэ Iыхьэм я гугъэхэм щыщ куэдыр игъэкIуэдыжащ – мазэм нэблэгъэ ипэкIэ официальнэ зэIущIэхэм щIэзыдзэжа «Спартак-Налшыкым» и джэгукIэр икъукIэ арэзы укъэзымыщIт.  Япэ дакъикъэхэм щегъэжьауэ зэIущIэм тепщэныгъэр щызыIыгъар Псыхуабэ къикIа футболистхэрат. Абыхэм я щыуагъэкIэ топыр яфIэкIуэд хъурэ ди щIалэхэм къаIэрыхьэмэ, апхуэдэхэмт сэбэпынагъ къыхахыфыртэкъым. Налшыкдэсхэм я контратакэхэр «Мэшыкъуэ-КМВ»-м и гъуащхьэхъумэхэм къызэпаудырт е «Спартак-Налшыкым» и ебгъэрыкIуэныгъэхэм хэтхэм я щыуагъэкIэ топыр яфIэкIуэдырт.

«Топыр домыгъэкIым, уэ къыпхудагъэкIынущ», - жаIэ хабзэщ  футболым дихьэххэм. Ар къащыщIащ ди щIалэхэм. Загъэпсэхуу къихьэжа нэужькIэ «Мэшыкъуэ-КМВ»-м и ебгъэрыкIуэныгъэхэм пищащ. Зэпыу имыIэу ипэкIэ кIуатэ хьэщIэхэм икIэм-икIэжым я гугъуехьым ехъулIэныгъэ къахуихьащ. Штрафнойм щихьэм псыхуабэдэсхэм ящыщ зыр зэуа топыр «Спартак-Налшыкым» и гъуащхьэхъумэм и Iэм техуащ – пенальти.  Ар хьэщIэхэм Iэзэу ягъэзэщIащ – 0:1.

НэгъуэщI къалэ щыIэу япэ зэрищам «Мэшыкъуэ-КМВ»-р нэхъ жан къищIат икIи я тегуплIэныгъэр нэхъ иныж хъуат. Ди хьэрхуэрэгъухэм ягъэзэщIа къыкIэлъыкIуэ штрафнойм етIуанэ топри къахуихьащ - 0:2.

Ещанэ топми куэдрэ зыпигъэплъакъым футболеплъхэр. Псыхуабэ къикIа командэм и ебгъэрыкIуэныгъэм хэту ар къызыIэрыхьа джэгум къыхыхьагъащIэ Мавляновым къыхита топым бжыгъэр къызэIузыха Кучиевыр кIэлъеуэжащ – 0:3.

Абы иужькIэ «Спартак-Налшыкым» джэгупIэ губгъуэр хуит къыхуэхъуащ - арэзы къэзыщI бжыгъэр яхъумэн папщIэ хьэщIэхэр я лъэныкъуэмкIэ зыщагъэбыдат. Арати, ди щIалэхэм я ебгъэрыкIуэныгъэми хагъэхъуащ.

Зэман нэхъыщхьэр иухыным дакъикъитху фIэкIа къэмынэжауэ джэгум и кIыхьагъкIэ налшыкдэсхэм нэхъ къащыхэжаныкIа Хьэшырым и насып къикIащ. ХьэщIэхэм я гъуащхьэхъумэхэм яIэщIэкIауэ гъуэм хуэкIуэ Алан штрафнойм щихьэм хабзэм къемызэгъыу къагъэувыIащ! Езым къилэжьа пенальтир «Спартак-Налшыкым» и гъуащхьауэ нэхъыфIым Iэзэу игъэзэщIэжащ икIи кIэух бжыгъэр 1:3-м хуэзыгъэкIуэжа топыр дигъэкIащ.

Мы гъэм иригъэкIуэкIа зэIущIищым зы очко закъуэ фIэкIа къыщамыхьауэ икIи я хьэрхуэрэгъухэм я гъуэм зы топ нэхъыбэ дэзымыгъэкIыфа «Спартак-Налшыкым» икIэщIыпэкIэ и джэгукIэм зэхъуэкIыныгъэ химылъхьэмэ, турнир таблицэм ищхьэкIэ къыщытет командэхэм ядригъэкIуэкIыну зэIущIэхэм кърикIуэнур наIуэщ. Дыщыгугъынщ, гъатхэпэ зэIущIэхэм къащыIэщIэщIа щыуагъэхэм ириплъэжу мэлыжьыхьыр текIуэныгъэкIэ ирагъэжьэну.

 

Жыласэ Замир.
Поделиться:

Читать также: