Ди лъэпкъэгъухэм я зэпэщIэтыныгъэ

Урысей Федерацэм щIыхь зиIэ и ухуакIуэ Фёдоров Юрий и фэ­еплъу Челябинск къалэм щекIуэкIащ дзюдомкIэ къэралпсо зэхьэзэхуэхэр. Абы и саугъэт нэхъыщхьэхэм щIэбэнащ Урысейм и щIыналъэ 15-м къикIа зи ныбжьыр илъэс 13 - 15-м ит спортсмен ныбжьыщIэ 350-м нэблагъэ.

ЗэпэщIэтыныгъэ гуащIэхэм Къэбэрдей-Балъкъэрым и командэ къыхэхам медаль зэмылIэужьыгъуи 4 къыщихьащ.
Зи хьэлъагъыр килограмм 55-м нэблагъэхэм я финал зэIущIэм щызэхуэзащ командэм къызэдыхэт БищIо Атхъэнрэ Къардэн Амиррэ. БищIом дыщэ медалыр зыIэригъэхьащ, Къардэныр етIуанэщ.
Ди командэм иджыри зы дыжьын медаль къыхуихьащ зи хьэлъагъыр килограмм 60-м нэблагъэхэм я гупым щыбэна Iэпыч Мухьэмэд.
Килограмм 42-м нэблагъэхэм я деж ещанэ щыхъуащ Срыкъуэ Ибрэхьим.
Урысейпсо зэхьэзэхуэхэм я хьэщIэ лъапIэу щыта къэралым спор-тым щIыхь зиIэ и мастер, Рио-де-Жанейрэ щекIуэкIа Олимп джэгу-хэм я чемпион Мудрэн Беслъэн Челябинск дэт дзюдомкIэ секцэхэм я гъэсэн ныбжьыщIэхэм мастер-классхэр ядригъэкIуэкIащ.