Ди щIалэхэр Къэзан къыщыхожаныкI

Мы махуэхэм йокIуэкI Урысей Федерацэм и щIыналъэхэм зэдай гъэмахуэ спорт лIэужьыгъуэхэм я I Спартакиадэ. Дзюдоитсхэм я зэпэщIэтыныгъэ япэ махуэм Къэбэрдей-Балъкъэрым и спортсменхэм абы медалитI къыщахьащ. Псори зэхэту саугъэт нэхъыщхьэхэм спартакиадэм щыщIобэн дзюдоист 325-рэ (цIыхухъурэ цIыхубзу).

Зи хьэлъагъыр килограмм 66-м нэблагъэхэм я зэпэщIэтыныгъэм хьэрхуэрэгъу къыщыхуэхъуа псоми шэч къызытумыхьэн текIуэныгъэ къафIихьри ди республикэм и медалхэм хэлъхьэныгъэшхуэ хуищIащ Мисиров Исмэхьил. ЗымащIэкIэ командэ къыхэхам къыдыхэтым и ехъулIэныгъэм нэсакъым Блий Iэюб. Килограмм 60-м нэблагъэхэм я гупым и финал зэIущIэм ди лъэпкъэгъур къыщыхагъэщIащ икIи дыжьын медалыр къыхуагъэфэщащ.

Спортсменхэр ягъэхьэзыр Емкъуж Мухьэмэдрэ Гъэунэ Анзоррэ.

Дзюдом къищынэмыщIауэ, ди щIалэхэм ехъулIэныгъэ щызыIэрагъэхьащ алыдж-урым бэнэкIэми. Абы щызэхьэзэхуэхуащ дэтхэнэ хьэлъагъми къэралым щынэхъ лъэщ бэнакIуэ I6. ЗэпэщIэтыныгъэхэм Къэбэрдей-Балъкъэрым и лIыкIуэхэм медаль зэмылIэужьыгъуищ къыщахьащ.

Килограмм 63-м нэблагъэ зи хьэлъагъхэм я гупым и кIэух зэIущIэм нэса Локьяев Жамболэт иужьрей зэпэщIэтыныгъэм къыщыхагъэщIащ, абы дыжьын медалыр къихьащ. ХъуэкIуэн Альбертрэ (кг 55-рэ) КIэмпIарэ Маратрэ (кг 130-рэ) ещанэ увыпIэр яубыдащ.

Мы махуэхэм бэнэкIэ хуитымкIэ зэхьэзэхуэхэр Къэзан щызэхэтынущ.