ГъащIэ
Адэ-анэм нэхърэ нэхъ лъапIэ мы дунейм тету къыщIэкIынкъым. Бынымрэ ар къэзылъхуамрэ къуэпс быдэкIэ зэпхащ. Абыхэм я зэпыщIэныгъэр зэпыча щыхъуам и деж сабийм и псэр гугъу йохь. Апхуэдэ гуныкъуэгъуэ зиIахэм ящыщщ 1937 гъэм Нартан къуажэм къыщалъхуа Зэхъуэхъу Назифэ.
1944 гъэр екIуэкIырт. Бынхэм я нэхъыщIэ Назифэ, хъыджэбзищрэ зы щIалэрэ хъухэрт, Лэскэн дэс и адэ къуэшым деж хьэщIапIэ щыIэт.
- Къэралым дежкIэ икъукIэ зэман хьэлъэт ар, щхьэкъэIэт ямыIэу ди цIыхухэр губгъуэм илэжьыхьырт. «Гущэр тхущIэбупскIэнщ», - жаIэри сашат, - игу къегъэкIыж нанэм. – Репрессием и гуащIэгъуэт. Абы и жьы гущIэгъуншэр зыщIихуахэм ди унагъуэри хэхуащ…
Iыхьлым я деж щыIэ хъыджэбз цIыкIур къанэри, и унагъуэр Хэкум ирашащ. Апхуэдэу зэкъуэча хъуа унагъуэм я гугъуехьыр тIууащIэ хъуат. Абы щыгъуэ а сабийм и гум щыщIар, адэ-анэм я псэм игъэвар хэт ищIэн?! Илъэс куэдкIэ нэпс щIигъэкIыу псэуащ хъыджэбз цIыкIур. Пэжщ, и адэ къуэшыр къыхуэгумащIэт, и бын дыдэм хуэдэу къыхущытащ, зыми иримыгъэхъуапсэу къигъэхъуащ. ЕджапIэми щIигъэтIысхьэри, иригъэджащ. И унагъуэм пызыщIэу иIэр письмохэрати, щIэх-щIэхыурэ ахэр Джамбул иригъэхьырт. Жэщ-махуэ имыIэу Назифэ Тхьэшхуэм щIелъэIур зыт - и адэ-анэм, къыдалъхуахэм зэ яIуплъэжынырт.
1956 гъэм Назифэ и адэм Хэкум къакIуэу кIуэжыну хуитыныгъэ къратри, и пхъур къыздищтэжауэ щытащ. Зы илъэс дэкIри, я щIыналъэм къагъэзэжыну хуитыныгъэ къратащ. Назифэ и адэ-анэри, и шыпхъухэри щIыгъуу хэкум къихьэжащ. Я щIалэ закъуэр Джамбул щыщIалъхьэжащ.
Гуауэ куэд и нэгу щIэкIами, Назифэ Тхьэм фIыуэ илъэгъуа цIыхуу зыкъелъытэж. Илъэс бжыгъэкIэ зыпэIэщIэу псэуа и унагъуэр и гъусэу хэкур псэупIэ зэрахуэхъужар абы фIыгъуэшхуэу къелъытэ. ИужькIи Назифэ унагъуэ дахэ хъужащ. И щхьэгъусэмрэ абырэ бынибл зэдапIащ.
