Сабийхэм я нэкIэ

Къэбэрдей-Балъкъэрым наIуэ щыхъуащ художественнэ творчествэмкIэ зэпеуэм, «Участковэр - сабийхэм я нэкIэ» зыфIащам, и пэщIэдзэ Iыхьэм щытекIуахэр.

 Зэхьэзэхуэм и комиссэм къагъэхьат республикэм и районхэм щыщ сабийхэм я лэжьыгъэу 30-м нэблагъэ.

Жюрим хэтащ КъБР-м щыIэ МВД-м жылагъуэ хабзэр хъумэнымкIэ и полицэм и унафэщIым и къуэдзэ, полицэм и полковник КIэрэф Робертрэ ведомствэм и IэнатIэхэм я лэжьакIуэхэмрэ.

Зэпеуэр я ныбжь елъытауэ Iыхьищу гуэшауэ ирагъэкIуэкIащ: илъэси 6 - 8, илъэси 9 - 11, илъэс 12 - 14.

Я IэдакъэщIэкIхэм абыхэм къыщагъэсэбэпащ къэрэндащхэр, краскэхэмрэ фломастерхэмрэ, сурэтхэр ятеухуат полицэм и участковэ уполномоченнэхэм.

Жюрим къыхихащ конкурсым щытекIуахэр: Тембот Даянэ (илъэси 8, СОШ №21, Налшык къ.), Малкандуевэ Юлие (илъэс 11, гимназие №5, Тырныауз къ.), Шал Илонэ (илъэс 14, Бэшорэ Хь. и цIэр зезыхьэ СОШ №1, Къэрэгъэш къу.).

ЕтIуанэ увыпIэхэр къахьащ Дал Амалие (илъэси 7, Нарткъалэ дэт лицей №1), Къашырокъуэ Камиллэ (илъэс 9, прогимназие №5, Налшык къ.), Аппаевэ Элинэ (илъэс 13, СОШ, Бабугент къу.).

Ещанэ увыпIэхэр ялъысащ Хъандэхъу Ибрэхьим (илъэси 6, СОШ №3, Бахъсэненкэ къу.), ГъукIэ Иринэ (илъэс 11, Бахъсэн районым Сабий творчествэмкIэ и центр), Засылкин Давид (илъэс 14, Прохладнэ районым Сабий творчествэмкIэ и район центр).

Зэпеуэм къыщыхаха лэжьыгъэ нэхъыфIхэр щагъэлъэгъуэнущ «Участковэр - сабийхэм я нэкIэ» зэпеуэм и кIэух Iыхьэм.