«Бгы къабзэ»

Апхуэдэ фIэщыгъэм щIэту «Iуащхьэмахуэ» зыгъэпсэхупIэм щекIуэкIащ макъамэ фестиваль. Абы хэтащ Урысеймрэ Кавказ Ищхъэрэм и щIыналъэхэмрэ къикIа волонтёр 800-м нэблагъэ. Пщыхьэщхьэ концертым еплъыну зезыгъэтхахэри куэд хъурт.
Щэбэт щIыхьэхум хэтхэр, езыхэр зэрыIэбэну Iэмэпсымэхэр яIыгъыу, кIапсэ гъуэгумкIэ дэкIри, Азау удзыпцIэм къыщыщIэдзауэ «Гарабаши» станцым нэс зэщIакъуащ. Къурш джабэр зыхуей хуэзыгъэзэну ежьахэм ящIыгъуащ къегъэлакIуэхэмрэ тэрмэшхэмрэ.
- Iуащхьэмахуэ зыщызыплъыхьыну къакIуэхэм я бжыгъэм хэхъуэ зэпытщи, а щIыпIэхэр къабзэу щытын зэрыхуейр гурыIуэгъуэщ. Къапщтэмэ, иджы ещанэрэ едгъэкIуэкI мыпхуэдэ фестивалхэм я фIыгъэкIэ кIэрыхубжьэрыху тонн 60 зэщIакъуащ. Туристхэм фIыуэ къагуроIуэ зыплъыхьыпIэхэр къабзэу зехьэн зэрыхуейр икIи шэч къытетхьэркъым кIэрыхубжьэрыхухэр къызэзынэкIхэр кIуэ пэтми нэхъ мащIэ зэрыхъунум. ЦIыхухэм я зэхэщIыкIым фIы и лъэныкъуэкIэ нэрылъагъуу зэрызихъуэжыр щIыуэпсымкIэ псом ящхьэщ, - жиIащ Iуэхум и къызэгъэпэщакIуэ, «УФ. Кавказ» IуэхущIапIэм и унафэщI Беккаев Хьисэ.
Мы зи чэзу фестивалым зыкъыщагъэлъэгъуащ урысей уэрэджыIакIуэхэм, лъэпкъ къафэхэмкIэ гупхэп, сабийхэм папщIэ мультфильмхэр ягъэлъэгъуащ, мастер-классхэр ирагъэкIуэкIащ. ИужькIэ зэхэтащ жармыкIэ. Дауэдапщэм хэтхэм папщIэ пщафIэхэм ягъэхьэзыращ плов килограмм 400.