Ди джэдуужьыр(Сабийхэм папщIэ хъыбар) - Ей, мы ди джэдуужьри, мы ди джэдуужьыр, кхъуэр благъэжу яукIым хуэдэщ, - мэхъущIэ дадэ пэшым къыщIыхьэжауэ. - А, зи унэр бэгъуэн, къаруи псэруи къыхуигъэнакъым хьэжь тхьэмыщкIэм! - Сыт - на, джэдуужьым абы ирищIэфынур? - егъэщIагъуэ нанэ. - ИрищIэфынур жи! ИримыщIэр сыт жыпIэмэ, нэхъ тыншщ. Си тхьэкIумэр тезгъэхуауэ дадэ жиIэхэм содаIуэ. КъызэрыщIэкIымкIэ, си мызакъуэу, дади гу лъитат ди джэдуужьыр зэрыбзаджэм, псэхугъуэ иримыту ди хьэжьым и фэр зэрырихым. … Дыгъэм и гуащIэгъуэ дыдэм, хуабэм зэпкърихауэ хьэжьыр жыг щIагъым щIэгъуэлъхьауэ зыщигъэпсэхум иригъэхьэлIэрти, джэдум абы зыблригъэхырт, зыкъыблригъэхыжырт. Гу къылъимытамэ, зигъэIэуэлъауэрт. Модрейм, джэдур зэрилъагъуу, къыхуэнэжа къару тIэкIур зэхуихьэсыжырт, къыщылъэтырти, джэдур ирихужьэрт. Зыкъомрэ къригъэжыхьырт - къригъэжыхьырт хьэжьми, езыр жыгым дэжейрт. Дэжейрти, зыри къэмыхъуам хуэдэу, тест хьэжьым къыхуеплъыхрэ, тIэкIуи ауан къищIу. Хьэжьри зыкъомрэ абы худэплъейуэ щытт - щытти, кIуэрти жыг жьауэм щIэгъуэлъхьэжырт. Хьэжьыр жейм хилъэфэжу зэрыхуежьэу, джэдуужьыр жыгым къелъэрти, псори щIэрыпсу къыщIидзэжырт. Хьэжьри къыщылъэтырти, джэдур аргуэру ирихужьэрт. Апхуэдэт махуэ псом. Абыхэм я зэхущытыкIэм къытригъэхъеикIри, дадэ хъыбар гъэщIэгъуэн Iэджэ жиIэжащ хьэмрэ джэдумрэ фIыуэ зэрызэрымылъагъум теухуауэ. Нанэ цIыкIуу къыIэрыхьэу ипIа и джэдур фIэгуэныхь хъуурэ, абы къыщхьэщож, щотхъу. Ар дадэ идэркъым. - Къемэт махуэм, - жеIэ дадэ, - цIыхум фIыуэ илэжьамрэ Iейуэ ищIамрэ щызэхагъэкIым и деж, сэрор абыхэм къоупщI: - И чэзум вгъэшха, лей къывахакъэ? Хьэм занщIэу жэуап ет: - Зэи сагъэмэжэлIакъым, езыхэр Iэнэм къызэрыбгъэдэкIыу си Iыхьэр къысхуахьырт. Зэи сащыгъупщэртэкъым. Джэдуужьыр щытщ, цIутI жимыIэу, лъэныкъуэкIэ йоплъэкIри. - Уэ - щэ? - зыкъыхуагъазэ джэдум. Абы и нэхэр еуфIыцIри, сщIэркъым жыхуиIэу, и щхьэр егъэкIэрахъуэ. Хьэр къогубжь: - Сэ пщIантIэм сыдэс пэтрэ сащыгъупщэртэкъым, уэ я Iэнэ щIагъым ущIэсщ… СщIэркъым жыхуиIэу аргуэру джэдум и щхьэр егъэкIэрахъуэ, и нэхэри къызэтрихыркъым. Хьэр къогубжьыпэри, джэдур ирехужьэ, ирехужьэри кърехуэкI, щIым ирихужыным хуэдизу. Джэдур жыгым дожейри, зыри къэмыхъуам хуэдэу тесщ, хьэжьым къыхуоплъыхри. Апхуэдэщ игъащIэ псом.
Поделиться:
Читать также:
17.05.2024 - 11:18 →
Къахьар Сосрыкъуэ ихьыжащ
16.05.2024 - 16:28 →
Бзэ тыншкIэ тхэуэ щытащ
15.05.2024 - 15:00 →
Я Лъахэ цIыкIу - «Прометей и лъахэ»
15.05.2024 - 12:44 →
ФIыуэ флъагъухэм закъевгъащIэ!
08.05.2024 - 13:05 →
ЩIэныгъэлI усакIуэхэр
|