Спорт

Карате

Къэрал кIуэцI IуэхухэмкIэ органхэм я лэжьакIуэхэу зи къалэн зыгъэзащIэу хэкIуэдахэм я фэеплъ махуэм ирихьэлIэу Тырныауз къалэм щекIуэкIащ щIыналъэхэм каратэмкIэ я зэхьэзэхуэ. Абы щызэпеуащ Кавказ Ищхъэрэм и спортсмен ныбжьыщIэу, щIалэхэри хъыджэбзхэри зэхэту, 300-м щIигъу.

Къэбэрдей-Балъкъэрым и командэм медаль 23-рэ зэхьэзэхуэм къыщихьащ, абы щыщу 8-р дыщэу, 7-р дыжьыну, 8-р домбеякъыу.

Урысей Федерацэм атлетикэ хьэлъэмкIэ пашэныгъэр къыщыхьыным хуэунэтIа зэхьэзэхуэ махуибгъукIэ щекIуэкIащ Иркутск къалэм и «Байкал-Арена» спорт комплексым. ТекIуэныгъэ Иныр мы гъэм илъэс 80, Урысейм атлетикэ хьэлъэ спорт лIэужьыгъуэр къызэрыщызэрагъэпэщрэ илъэси 140-рэ зэрырикъухэм теухуауэ щытащ ар. Абы щызэпеуащ УФ-м и щIыналъэхэм ящыщу 54-м я спортсмен, щIалэхэри хъыджэбзхэри зэхэту, 500-м щIигъу, я ныбжькIэ илъэс 15 - 20-хэм щIимыгъуауэ.

Ставрополь крайм и Кубокыр кикбоксингымкIэ къэхьыным хуэунэтIа зэхьэзэхуэ Нартсанэ (Кисловодск) къалэм щекIуэкIащ. Хэгъэрейхэм нэмыщI, абы щызэпеуащ Краснодар крайм, КъБР-м, КъШР-м, Осетие Ищхъэрэ - Аланием я спортсмен, щIалэхэри хъыджэбзхэри зэгъусэу, 450-м щIигъу, я ныбжькIэ илъэси 8-м къыщыщIэдзауэ нэхъыжьхэмрэ.

Къэрал кIуэцI IуэхухэмкIэ органхэм я лэжьакIуэхэу зи къалэн зыгъэзащIэу хэкIуэдахэм я фэеплъ махуэм ирихьэлIэу Шэджэм къалэм и спорт комплексым щекIуэкIащ Шэджэм щIыналъэм сумомкIэ и зэхьэзэхуэ зэIуха. 

«Спортыр терроризмэм и бийщ» фIэщыгъэр зэрихьэу, къэрал кIуэцI IуэхухэмкIэ органхэм я лэжьакIуэхэу зи къалэн зыгъэзащIэу 2005 гъэм жэпуэгъуэм и 13-м хэкIуэдахэм я фэеплъу, дзюдомкIэ зэхьэзэхуэ Налшык къалэм и «Гладиатор» спорт комплексым иджыблагъэ щекIуэкIащ. Абы щызэпеуащ республикэм и бэнакIуэ 200-м щIигъу. 

Кубокыр Бахъсэн макIуэ

КъБР-м и Кубокыр футболымкIэ къэхьыным хуэунэтIауэ ветеранхэм ирагъэкIуэкI зэпеуэм и кIэух зэхьэзэхуэр Налшык къалэм и «Спартак» стадионым щызэхэтащ. Абы щызэхуэзащ Бахъсэн къалэм и «Старая крепость» командэмрэ Дзэлыкъуэ районым и Псынэдахэ къуажэм и «Родник» клубымрэ. 

   Дунейпсо Адыгэ Хасэм и унафэкIэ жэпуэгъуэм и япэ щэбэтыр Адыгэшым и махуэу ягъэувауэ щытащ 20I9 гъэм. Абы техуэуи нэхъ гувауи, адыгэхэр щыпсэу республикэхэм шы гъэхъуным епха гъэлъэныгъуэхэр, зэхьэзэхуэхэр щрагъэкIуэкI. Къэрэшей-Шэрджэсым щылажьэ Шууей Хасэм и жэрдэмкIэ, ВакIуэ-Жылэ къуажэм «Шуджэгу» зэхьэзэхуэ щызэхэтащ жэпуэгъуэм и 10-11-хэм. 

Урыс Мухьэмэд дуней псом и чемпионщ

Сербием и Нови-Сад къалэм щекIуэкIащ грэпплингымкIэ («Grappling Gi», «Grappling No-Gi» унэтIыныгъэхэмкIэ) дунейпсо чемпионат. Абы щызэпеуащ къэрал куэдым я спортсмен лъэщхэр, УФ-м и командэри яхэту. Урысейм хузэфIэкIащ дыщэ медалу 11 абы къыщихьын.

Къэбэрдей-Балъкъэрым шахмат къызэрыгуэкIымкIэ, псынщIэмкIэ, блицымкIэ пашэныгъэр къыщыхьыным хуэунэтIа зэхьэзэхуэхэр Налшык къалэм и «КАИССА» клубым щекIуэкIащ. Абы щызэпеуахэр гупитIу гуэшауэ щытащ: япэм хэтахэр илъэси 9 - I3, етIуанэм – илъэс 15 - 19 зи ныбжьхэрщ.