ГъащIэ цIэрыIуэ (абы щыгъуэми мытынш)

УФ-м и Къэрал саугъэтым и лауреат, Къэбэрдей-Балъкъэрым и цIыхубэ сурэтыщI, Европэм гъуазджэхэмкIэ и академик, Сан-Францискэ къалэм дэт университетым щIыхь зиIэ и доктор, ЩIэныгъэхэмкIэ Нью-Йорк академием хэт Шемякин Михаил Михаил и къуэр Къардэн лъэпкъым къызэрыхэкIар куэд щIауэ зэхыдох.

И адэр пасэу зеиншэ щыхъум, Хужьыдзэм и зы урыс офицерым ар ипIыну къищтат. Офицерыр Граждан зауэм хэкIуадэри, Михаил (нэхъыжьыр) илъэс 13-м Бэракъ Плъыжьым и орден япэу зратахэм ящыщ хъуащ. Художникым и анэр урыс актрисэ Предтеченская Юлиещ. Шемякиным и сабиигъуэр Германиерщ нэхъыбэу щигъэкIуар.

Михаил СССР-м 1957 гъэм къигъэзэжащ. А илъэсым къыщыщIэдзауэ 1961 гъэ пщIондэ ар щеджащ ЖивописымкIэ, скульптурэмрэ архитектурэмкIэ Репин И. Е. и цIэр зезыхьэ институтым епхауэ лажьэ художественнэ школым. А курыт еджапIэм Михаил къыщIадзыжауэ щытащ зэманым къемызэгъыу ялъыта и гупсысэхэм щхьэкIэ.

1959 - 1971 гъэхэм ар пощтзехьэщ, вахтерщ, иужькIэ илъэситхукIэ Эрмитажым и такелажникщ. 1962 гъэм «Звезда» журналым и клубым Шемякиным и япэ гъэлъэгъуэныгъэр къыщызэIуихащ. 1967 гъэм къызэригъэпэщащ «Санкт-Петербург» сурэтыщI гуп.

И гъащIэр «зэхэзэрыхьауэ» ирихьэкIащ мы художникым, и гъэлъэгъуэныгъэхэм, лэжьыгъэхэм гъуэгу зэрырамытым и мызакъуэу, психиатр сымаджэщым зы зэман щаIыгъащ. Псом я нэхъыкIэжырти, 1971 гъэм ар Хэкум ирагъэкIащ. Езым, иужькIэ къызэриIуэтэжамкIэ, а IуэхухэмкIэ къуаншагъэ зыбгъэдэлъар властыртэкъым, атIэ СССР-м и СурэтыщIхэм я зэгухьэныгъэрт…

ЗэманкIэ Шемякин Михаил Париж дэсащ, щIэх-щIэхыурэ и гъэлъэгъуэныгъэхэр а къалэм щригъэкIуэкIыу. 1974 гъэм япэ дыдэу абы игъэлъэгъуащ цIэрыIуэ зэрыхъуа «Петербургский карнавал» выставкэр. 1981 гъэм ар Нью-Йорк Iэпхъуащ.

1960 гъэхэм Шемякиным гъуазджэм и лъэхъэнэ псори иджыу щIедзэ икIи тхыдэмрэ философиемрэ я лъабжьэу сурэт бжыгъэншэхэр къегъэщI. А лэжьыгъэхэм къапэкIуащ щIыхь зиIэ доктор нагъыщэу 5.

1989 гъэм Шемякиным и IэдакъэщIэкIхэр Совет Союзым щагъэлъэгъуэн щIадзэжащ. 1990 гъэхэм къыщыщIэдзауэ куэдым къацIыхуащ и скульптурэхэмкIэ. Псалъэм папщIэ, Санкт-Петербург къалэм Шемякин Михаил и скульптурэу щы щагъэуващ. Ахэр - Петр Езанэм, политикэ залымыгъэр зыгъэвахэм, Санкт-Петербург зыухуа япэ архитекторхэм фэеплъ яхуищIахэрщ. Петр Езанэм и фэеплъым къытращIыкIам Нормандиеми ущыхуэзэнущ. Москва дэтщ Михаил «Дети – жертвы пороков взрослых» зыфIища и скульптурэхэри. Владикавказ щагъэуващ «Террорым ихьахэм я фэеплъу» лэжьыгъэр. НэгъуэщI скульптурэ гъэщIэгъуэн куэди щIыпIэ зэмылIэужьыгъуэхэм щыIэщ.

2002 - 2003 гъэхэм художникым «Культура» урысей каналым хуигъэхьэзырауэ щытащ Хадсон къалэм езым къыщызэригъэпэща «Воображаемый музей Михаила Шемякина» IуэхущIапIэм теухуа нэтын 21-рэ.

Шемякиным и ныбжьэгъуфIу къыдэгъуэгурыкIуащ урысей уэрэджыIакIуэ Высоцкий Владимир. Владимир игъэзащIэхэм я гупсысэр абы сурэткIэ къигъэлъагъуэрт, езы Высоцкэм и уэрэдхэр сурэтыщIым фэеплъ къыхуищIырт. УэрэджыIакIуэр дунейм ехыжа нэужь, Михаил абы фэеплъ мывэ хуищIауэ щытащ. Ар Самарэ дэтщ.

Шемякин Михаил щхьэгъусэ тIэу къишащ. Япэр сурэтыщI, скульптор Ревеккэ Модлинэщ, абыхэм япхъу Доротеи сурэтыщI гъуазджэм хэпщIа бзылъхугъэ IэпщIэлъапщIэщ (Алыджым щопсэу). И етIуанэ щхьэгъусэм зэреджэр Сарэ де Кэйщ. Шемякин зэщхьэгъусэхэр Франджым щопсэу, XVII лIэщIыгъуэм икIэхэм XIX л1эщ1ыгъуэм и пэщIэдзэхэм ящIауэ щыта уардэунэм щIэсу. И лъэщапIэхэм абы студентхэр ирегъэблагъэ, щIэблэм я къэкIуэну дахэм и гуащIэ ирехьэлIэ.

Шемякин Михаил IущIахэм, зыцIыхухэм къыхагъэщ зэпытщ ар зэрылэжьакIуэшхуэр. Зэман зэхуэмыдэхэм абы и гъащIэмрэ лэжьыгъэмрэ фильмхэр траухуащ. Абыхэм ящыщщ Цинеман Аркадий, Малкин Анатолий сымэ я документальнэ фильмхэр. КъищынэмыщIауэ, Петряков Александр 2015 гъэм къыдигъэкIащ «Михаил Шемякин. Зазеркалье мастера» тхылъыр.