Санкт-Петербург къикIа хьэщIэхэр

          Сэральп Мадинэ и арт-центрым щекIуэкIащ «Кавказ в XXI веке. Народный костюм в контексте культурного кода: традиции и современность» зэIущIэ щхьэпэр.

         Налшык и хьэщIащ цIыхубэ фэилъхьэгъуэхэр Санкт-Петербург щызыд дизайнер цIэрыIуэхэр. Ахэр Урысейм и мызакъуэу, нэгъуэщI щIыналъэхэми щыцIэрыIуэщ. Урысейм IуэрыIуатэмкIэ и музейм и къудамэм и унафэщI, культурологиемкIэ доктор, профессор, УФ-м щIэныгъэхэмкIэ щIыхь  зиIэ и лэжьакIуэ, УФ-м и СурэтыщIхэм я зэгухьэныгъэм хэт, УФ-м щэнхабзэ лъапIэныгъэхэмкIэ и эксперт Калашниковэ Наталье зэIущIэм хэтхэр хигъэгъуэзащ «Традиционный костюм народов России в собрании Российского этнографического музея» и лэжьыгъэм. Къэрал Эрмитажым и къудамэм и унафэщI, искусствоведенэмкIэ кандидат, Санкт-Петербург къэрал университетым Промышленнэ технологиемрэ дизайнымкIэ и кафедрэм и доцент, Штиглиц А. и цIэр зезыхьэ художественно-промышленнэ академием и «Художественнэ текстиль» кафедрэм егъэщIылIауэ ягъэхьэзыр диплом лэжьыгъэхэм я рецензент, УФ-м и СурэтыщIхэм я зэгухьэныгъэм хэт Блюмин Маринэ тепсэлъыхьащ «Костюм в структуре музейных коллекций Государственного Эрмитажа» лэжьыгъэм.

         Зэхыхьэм хэтащ дизайнер, IуэрыIуатэдж цIэрыIуэхэр. Апхуэдэщ искусствоведенэмкIэ кандидат, Мейкъуапэ и къэрал технологие университетым и доцент КIэдыкIуей Нафисэт, КъБКъУ-м архитектурэмкIэ, ухуэныгъэмрэ дизайнымкIэ и институтым и унафэщIым и къуэдзэ, «Архитектура и дизайн» кафедрэм и профессор, искусствоведенэмкIэ доктор, доцент Къанокъуэ ФатIимэ, Адыгэ Республикэм гъуазджэхэмкIэ щIыхь зиIэ и лэжьакIуэ, Адыгэ Республикэм ГъуазджэхэмкIэ и колледжым, Тхьэбысым Умар и цIэр зезыхьэм, и егъэджакIуэ Щхьэлахъуэ Светланэ, УФ-мрэ Осетие Ищхъэрэ Республикэмрэ щэнхабзэмкIэ щIыхь зиIэ я лэжьакIуэ, лъэпкъ фэилъхьэгъуэхэр гъэхьэзырынымкIэ творческэ мастерскойм и унафэщI Гогичаевэ Изольдэ, Грознэ къалэм щыIэ дахагъэмкIэ FIRDAWS унэм и дизайнер Усмановэ Селимэ, Владикавказ щыщ художник-модельер Габарати Лизэ.

         Зэхыхьэр щIэщыгъуэ хъуащ. Шэшэным къикIа хьэщIэхэм я хэдыкI телъыджэхэр ягъэлъэгъуащ. А лэжьыгъэхэр зылъэгъуа Блюмин Маринэ щIэупщIащ Париж абы зыщыхуагъэсарэ зыщыхуамыгъэсарэ. Къанокъуэ ФатIимэ игъэлъэгъуащ дэфтэр сурэтхэмкIэ щIэгъэбыдэжа нэгъуей бгъэIулъхэр. Профессор Щхьэлахъуэ Светланэ игъэлъэгъуащ театр утыкухэм къыщагъэсэбэп фэилъхьэгъуэхэм я тхыдэр.

         ЗэIущIэм къыщыпсэлъащ «Институт культурного наследия и развития» жылагъуэ зэгухьэныгъэм и унафэщI, художник-модельер Сэральп Мадинэ. 1945 гъэм траха сурэтыр я тегъэщIапIэу, абы къыщыхьа лъэпкъ фащэр ядыну къазэремыхъулIар жиIащ. Ар щыхьэт тохъуэ зэманыр кIуэтэху цIыхухэм я щэнхабзэ еплъыкIэм, псэукIэм зэхъуэкIыныгъэхэр зэрагъуэтам. ЦIыхубз бгъэIулъым игъуэта зэхъуэкIыныгъэхэм, XXI лIэщIыгъуэм ар къызэрагъэсэбэпым къытеувыIащ. Зэхуэсахэр я Iуэху еплъыкIэхэмкIэ зэхъуэжащ. Сэралъп Мадинэрэ ипхъухэмрэ ягъэхьэзыра лъэпкъ фэилъхьэгъуэхэм, абы кIэрылъ цIугъэнэхэм щыщ  хьэщIэхэм щатIэгъащ.

ТЕКIУЖЬ Заретэ.