Спорт хъыбархэр

 Къущхьэ Iэмин дыщэ медаль къехь
Совет Союзым и ЛIыхъужь Ливенцев Виктор боксымкIэ и фэеплъ дунейпсо зэхьэзэхуэм, Белоруссием и къалащхьэ Минск щекIуэкIам, япэ увыпIэр къыщихьащ Къэбэрдей-Балъкъэрым щыщ спортсмен Къущхьэ Iэмин. 
Зэхьэзэхуэм хэтащ къэрали 10-м я боксери 100-м нэблагъэ, я ныбжькIэ илъэс 19-м къыщыщIэдзауэ 40-м нэсыху. Урысей Федерацэм и командэ къыхэхам хэту абы щызэуащ ди республикэм и лIыкIуэ Къущхьэ Iэмин икIи килограмм 75-рэ зи хьэлъагъхэм я деж дыщэ медаль къыщихьащ. Апхуэдэуи ди щIалэм абы щигъэзэщIащ УФ-м дунейпсо классымкIэ спортым и мастер цIэ лъапIэм къигъэув мардэхэр. 

Псэун Станислав ещанэщ
Ямало-Ненецкэ автономнэ округым и губернаторым и саугъэтыр алыдж-урым бэнэкIэмкIэ къэхьыным хуэунэтIа дунейпсо зэхьэзэхуэ Тарко-Сале къалэм иджыблагъэ щекIуэкIащ. Абы хэтащ ди къэралым и щIыналъэхэм ящыщу 20-мрэ Белоруссием, Къэзахъстаным, Азербайджаным я спортсмену 120-м нэблагъэ, гупипщIу гуэшауэ.
Къэбэрдей-Балъкъэрым и пщIэр иIэту зэхьэзэхуэм щыбэнащ Псэун Станислав икIи килограмм 82-рэ зи хьэлъагъхэм я деж ещанэ увыпIэр къыщихьащ. Ди щIалэр зыгъасэр Къурмэн Муратрэ Хъуран Муратрэщ.

КIыщ Аслъэнбэч и зэфIэкIыр
Мы гъэм япэу Калининград къалэм щекIуэкIащ бэнэкIэ хуитымрэ алыдж-урым бэнэкIэмкIэ Урысейм и Кубокыр къэхьыным хуэунэтIа, тэмэму зэхэзымых спортсменхэм я лъэпкъ зэхьэзэхуэхэр. Абы щызэпеуащ къэралым и щIыналъэхэм ящыщу 20-м я бэнакIуи 100-м нэблагъэ.
Къэбэрдей-Балъкъэрым и лIыкIуэу зэпеуэхэм хэтащ КIыщ Аслъэнбэч икIи хузэфIэкIащ ещанэ увыпIэр абы щиубыдын. Ди щIалэр щыбанэр килограмм 72-рэ зи хьэлъагъхэм я дежщ, и тренерхэр КIыщ Муратрэ Къардэн Анзоррэщ. 

Владикавказ зыхуагъэхьэзыру
Къэбэрдей-Балъкъэрым IэпщэкIэ зэпекъунымкIэ (армреслингымкIэ) и чемпионатрэ пашэныгъэр къэхьыным хуэунэтIа зэхьэзэхуэрэ «Налшык» спорт комплексым иджыблагъэ щекIуэкIащ. Абы хэтащ цIыху 250-рэ икIи я хьэлъагъ елъытауэ ахэр гуп 30-у гуэшауэ щытащ. 
ЗэIущIэхэр къызэрыхах зэхьэзэхуэу ирагъэкIуэкIащ икIи абы щытекIуахэм Iэмал ягъуэтащ Кавказ Ищхъэрэм армреслингымкIэ и чемпионатымрэ щIыналъэм пашэныгъэр къыщыхьыным хуэунэтIа зэпеуэхэмрэ хэтыну. ДызыхуэкIуэ илъэсым щIышылэм и 9 - 15-хэм Владикавказ къалэм ар щызэхэтынущ.
Налшык иджы щекIуэкIа зэIущIэхэм я хьэлъагърэ я ныбжьрэ елъытауэ зыкъыщагъэлъэгъуа гупхэм дыщэ медалу 29-рэ ди спортсменхэм къыщахьащ.