Хабзэм и нэIэ щIэту

КъБР-м и Iэтащхьэ КIуэкIуэ Казбек «муниципальнэ сыхьэт» жыпхъэм иту, район, къалэ администрацэхэм я унафэщIхэм зэIущIэ ядригъэкIуэ-кIащ.
 
ЗэIущIэм гулъытэ нэхъыбэ щыхуа­щIащ республикэм щызэхаублэ къэ- рал къэпщытэныгъэхэм. Мы гъэм Зыуэ щыт къэрал экзаменыр ятынущ ныбжьыщIэ мини 5-м. 
«Балл куэд къэзыхьхэм я бжыгъэр иужьрей илъэсхэм нэхъыбэ зэрыхъуар къыхэзгъэщыну сыхуейщ, - иритхащ КIуэкIуэ Казбек и телеграм-каналым. - Мы гъэми нагъыщэфIхэм дапоплъэ. Накъыгъэм и 23-м тхыдэмкIэ, литературэмкIэ, химиемкIэ ятыну къэпщытэ­ныгъэхэмкIэ сабийхэм я щIэныгъэр ягъэунэхужынущ. ЩIыпIэ администрацэхэм я унафэщIхэр набдзэгубдзап-лъэу хущытын хуейщ экзамен щат щIыпIэхэм, сабийхэр абыхэм и чэзум нэсыным, Iэгъуэблагъэм макъышхуэ къэзыгъэIу лэжьыгъэ щрамыгъэкIуэ­кIыным, шынагъуэншагъэм». 
КъинэмыщIауэ, зэIущIэм щытеп­сэ­лъыхьащ накъыгъэм и 1-м яубла егъэ­джэныгъэ IэмалыщIэу Iуэхугъуэ ­щхьэ­хуэм хуэунэтIам. Республикэр зы-хуэ­ныкъуэ егъэджакIуэ бжыгъэр иры­рагъэкъун папщIэ, а Iэмалыр къа­гъэщ­­хьэпэну я мурадщ. ЩIэуэ къежьа хабзэм ипкъ иткIэ, муниципалитетхэр ­хуитщ зыхуэныкъуэ лэжьакIуэ бжыгъэр къагъэлъэгъуэну. Ахэр «Урысейм щыIэ лэжьыгъэр» платформэм иратхэри, еджапIэ нэхъыщхьэхэм хъыбар ира­гъащIэ. ЕджапIэ къэзыухам IэщIагъэмрэ IэнатIэмрэ къыхех, лэжьапIэ ­зыгъэувым зэгурыIуэныгъэ дещI. Еджэн иуха нэужь, IэщIагъэ зэзыгъэ­гъуэтагъащIэр къыхуагъэува пIалъэм къриубыдэу мэлажьэ. «Урысейм щыIэ лэжьыгъэр» платформэм нобэрей Iуэ­хукIэ IэнатIи 116-м егъэджакIуэ къыщы­хуалъыхъуэ. 
ЗэIущIэм къыщыпсэлъащ лэжьыгъэмрэ социальнэ дэIэпыкъуныгъэмкIэ министрыр. Ар тепсэлъыхьащ щэхуу IэнатIэ Iутхэр гъэмэщIэн, лэжьыгъэ къызэгъэпэщыкIэр зытетыпхъэм тетын зэрыхуейм. 
Iуэхур здынэсыпхъэм нагъэсын папщIэ, щIыпIэ администрацэхэм лэ­жьакIуэ гупхэр къыщызэрагъэпэщ. Щэхуу IэнатIэ Iут цIыхур къэралым ­кърит шэсыпIэхэм хокIыж: зыгъэпсэхугъуэм, сымаджэгъуэм пэкIуэм, пенсэу кърат ахъшэм, медицинэ страхова- нэм, къинэмыщI зыщIэгъэкъуэныгъэхэм. Илъэс блэкIам хабзэкIэ IэнатIэхэм ягъэувыжащ лэжьакIуэ мини  4,2-рэ, илъэсым зэрыщIидзэрэ - минитIым щIигъу. КIуэкIуэ Казбек администрацэхэм я унафэщIхэм къалэн ящищIащ а Iуэхум набдзэгубдзаплъэу хущытыну.