Спорт хъыбархэр

 Зы дыжьынрэ домбеякърэ

Тамбов къалэм и «Тамбов» спорт комплексым щекIуэкIащ алыдж-урым бэнэкIэмкIэ 32-нэ урысейпсо зэхьэзэхуэ. Ар я фэеплъу щытащ бэнакIуэ цIэрыIуэхэу щыта Артюхинхэ Евгенийрэ Сергейрэ икIи абы щызэпеуащ къэралым и щIыналъэ 23-м я спортсмен 230-м щIигъу. 
Къэбэрдей-Балъкъэрым и лIыкIуэхэм ящыщу килограмм 97-рэ зи хьэлъагъэхэм я деж щыбанэ Хьэхъуэкъу Темырлан етIуанэ увыпIэр къихьащ. ЩIалэм и тренерыр Абазэ Тимофейщ. КIыщ Муратрэ Къардэн Анзоррэ я гъэсэн КIыщ Аслъэнбэч етIуанэ щыхъуащ килограмм 72-рэ зи хьэлъагъхэм я деж. 
 

Ангелинэ и зэфIэкIхэр

Японием и къалащхьэ Токио каратэмкIэ иджыблагъэ щекIуэкIа (WSKF) 17-нэ дунейпсо чемпионатым япэ увыпIэр къыщихьащ КъБР-м и Iуащхьэмахуэ щIыналъэм щыщ Лазаренкэ Ангелинэ. 
Урысей Федерацэм и командэ къыхэхам хэту гупхэм я зэпеуэм абы дыщэ медаль щызыIэригъэхьащ, апхуэдэ щIыкIэкIи, ди лъахэгъу хъыджэбзыр дуней псом и чемпион хэнейрэ хъуащ.
 Командэхэм я зэпеуэм нэмыщI, щхьэзакъуэ зэхьэзэхуэхэми Ангелинэ къыщыхэжаныкIащ икIи домбеякъ медалитI къыщихьащ. Абы и тренерхэр Этезов Владимиррэ Сэбаншы Муратрэщ. 

Дыжьын медаль къехь

Совет Союзым и ЛIыхъужь Халидов Зайнди и фэеплъу Шэшэным и Шали къалэм киокушинымкIэ щекIуэкIа урысейпсо зэхьэзэхуэм етIуанэ увыпIэр къыщихьащ Къэбэрдей-Балъкъэрым щыщ Адамян Оганес. 
2012 - 2013 гъэхэм къалъхуахэр зыхэт гупым, килограмм 45-рэ зи хьэлъагъхэм я деж зыкъыщызыгъэлъагъуэ ныбжьыщIэм зэIущIиплI иригъэкIуэкIати, щым щытекIуащ, ауэ финалыр фIихьащ УФ-м и командэ къыхэхам хэт спортсмен лъэщым.
Зэхьэзэхуэм хэтащ ди къэралым и щIыналъэхэм ящыщу 7-м я спортсмен 200-м щIигъу. Къэбэрдей-Балъкъэрым щыщу абы хэтащ «АНСАР» спорт клубым и гъэсэнхэр. Ди спортсменхэм ядэлажьэр Къэрмокъуэ Амурбэчрэ Будаев Казбекрэщ.

Иджырей зэхьэзэхуэр ирагъэкIуэкIащ «ТекIуэныгъэ» Сабий-ныбжьыщIэ спорт зэхьэзэхуэхэмкIэ урысейпсо фестивалым ипкъ иткIэ.