Шуджэгу ирагъэкIуэкIащ

   Дунейпсо Адыгэ Хасэм и унафэкIэ жэпуэгъуэм и япэ щэбэтыр Адыгэшым и махуэу ягъэувауэ щытащ 20I9 гъэм. Абы техуэуи нэхъ гувауи, адыгэхэр щыпсэу республикэхэм шы гъэхъуным епха гъэлъэныгъуэхэр, зэхьэзэхуэхэр щрагъэкIуэкI. Къэрэшей-Шэрджэсым щылажьэ Шууей Хасэм и жэрдэмкIэ, ВакIуэ-Жылэ къуажэм «Шуджэгу» зэхьэзэхуэ щызэхэтащ жэпуэгъуэм и 10-11-хэм. 
  Къэбэрдей-Балъкъэрым, Адыгэ республикэм, Краснодар крайм икIа шухэр екIуэлIащ Шуджэгум. Щхьэусыгъуэр езы дауэдапщэ щIэщыгъуэрауэ щытми, абы и фIыгъэкIэ щIыналъэ зэгъунэгъухэм шы щызезыхуэ щIалэхэр зэIуощIэ, апщIондэху ди лъэпкъ хъугъуэфIыгъуэм кIэлъызэрахьэу щыта хабзэхэр къащIэж. Шуджэгум хэтынухэр япэщIыкIэ Жьакуэ къуажэм щызэхуэсащ. Абдежым сатыритIу зэбгъурыт шууей гуп дахэу къыщежьэри, ВакIуэ-Жылэ екIуэлIахэщ. 
  «Шым и пщIэр, и фIыр, и лъэкIыныгъэхэр къэгъэлъэгъуэнращ мы дауэдапщэм и къалэн нэхъыщхьэри, Тхьэм зы илъэси дэмыкIыу шуджэгур ирыдигъэгъэкIуэкI, адыгэ фащэкIэ хуэпа адыгэлIхэр адыгэшым пыщIауэ ену щигъэт!» - иухащ Къэрэшей-Шэрджэсым къыщыдэкI «Черкес хэку» газетым и журналист Лыхь Тимур мы Iуэхугъуэм теухуа и тхыгъэр.