Медаль 19 къахь
Кавказ Ищхъэрэм самбэмкIэ пашэныгъэр къыщыхьыным хуэунэтIа зэхьэзэхуэ Владикавказ къалэм щекIуэкIащ иджыблагъэ. Зэхьэзэхуэм хэтащ КИФЩI-м и спортсмену, щIалэхэри хъыджэбзхэри зэгъусэу, 400-м нэблагъэ, я ныбжькIэ илъэс 16-м щIимыгъуауэ. Апхуэдэуи, абы щекIуэкIащ зэзауэ зыхэт самбэмкIэ зэпеуи.
Къэбэрдей-Балъкъэрым и бэнакIуэхэм зэхьэзэхуэм хъарзынэу зыкъыщагъэлъэгъуащ икIи медаль зэхуэмыдэу 19 абы къыщахьащ.
ЩIалэхэм ирагъэкIуэкIа зэпеуэхэм я хьэлъагъ елъытауэ зыхэта гупхэм япэ увыпIэхэр щаубыдащ Бозий Жамболэт (кг 42-рэ), Къудей Беслъэн (кг 64-рэ), Щоджэн Къантемыр (кг 88-рэ) сымэ. Тэшу Рэмэзанрэ (кг 49-рэ) Калошин Дмитрийрэ (кг 88-рэ) етIуанэ хъуахэщ. Домбеякъ медалхэр къахьащ Хьэмырзэ Аслъэнбэч (кг 42-рэ), Къумыкъу Ренат (кг 46-рэ), Сокъур Самир (кг 53-рэ), Къарэмызэ Арсен (кг 64-рэ) сымэ.
Хъыджэбзэхэм я зэхьэзэхуэм япэ увыпIэр къыщихьащ Бышэн Изабеллэ (кг 54-рэ). Акимовэ Дарье (кг 48-рэ), Бобровэ Адэ (кг 65-рэ), Черновэ Дарье (кг 65-рэ) сымэ ещанэ хъуахэщ.
Зэзауэ зыхэт самбэмкIэ зэпеуэм дыщэ медаль къыщихьащ Къудей Беслъэн (кг 64-рэ). ЕтIуанэ хъуахэщ Ахъмэт Радионрэ (кг 71-рэ) Уэзрокъуэ Азрэтрэ (кг 88-рэ). Домбеякъ медалхэр къахьащ Шублакъуэ Амир (кг 64-рэ), Бад Тигран (кг 88-рэ), Гордиенкэ Семен (кг 88-рэ) сымэ.
Спортсменхэр зэхьэзэхуэм хуагъэхьэзыращ ПшынащIэ Мурат, Къарэмышэ СулътIан, ПшынащIэ Руслан, ЩоджэнцIыкIу Азэмэт, Жанкъазий Мухьэмэд, Хъупсырджэн Резуан, Ким Руслан, Соблыр Рустам, Рахманов Валерэ, Новиковэ Антонинэ, Мырзэ Казбек, Тхьэкъуахъуэхэ Сэлимрэ Исхьэкърэ, Гаввэ Дмитрий сымэ.
Аланэ къыпэлъэщын къахэкIакъым
Урысей Федерацэм атлетикэ хьэлъэмкIэ пашэныгъэр къыщыхьыным хуэунэтIа зэхьэзэхуэ Екатеринбург къалэм щекIуэкIащ. Абы щызэпеуащ ди къэралым и щIыналъэхэм ящыщу 43-м я спортсмену 250-м щIигъу икIи ахэр гуп 20-у гуэшауэ щытащ.
Къэбэрдей-Балъкъэрым и щIыхьыр зэхьэзэхуэм щиIэтащ Скрипко Аланэ икIи килограмм 76-рэ зи хьэлъагъхэм я деж дыщэ медаль къыщихьащ: рывокымкIэ килограмм 95-рэ зи хьэлъагъ штангыр къиIэтащ, толчокымкIэ – килограмми 115-рэ, тIури зэхэту – килограмм 210-рэ. Ди хъыджэбзым илъэс 19 - 20 зи ныбжь гупырщ зыхэтар.
Иджы, зэхьэзэхуэм кърикIуахэр зэхалъхьэжа нэужь, Скрипко Аланэ УФ-м и командэ къыхэхам хагъэхьащ икIи мы гъэм накъыгъэм и 2-м Мысырым щекIуэкIыну дунейпсо зэхьэзэхуэм и зэфIэкIхэр щигъэлъэгъуэнущ. Абы и тренерыр Шэкэм Михаилщ.
Къуэдз Денизэ хуэдэ яхэтакъым
Кавказ Ищхъэрэм стIолыщхьэ теннисымкIэ пашэныгъэр къыщыхьыным хуэунэтIа зэхьэзэхуэ Ставрополь къалэм щекIуэкIащ. Абы щызэпеуащ УФ-м и щIыналъэхэм ящыщу 8-м я спортсмену, щIалэхэри хъыджэбзхэри зэхэту, 100-м щIигъу, я ныбжькIэ илъэс 16-м щхьэдэмыхауэ.
Зэхьэзэхуэм и япэ махуэм гупхэм ирагъэкIуэкIа зэпеуэм Къэбэрдей-Балъкъэрым и командэм етIуанэ увыпIэр къыщихьащ. Абы хэтащ Къуэдз Денизэ, Пхъэней Алинэ, Жабоевэ Iэминэ, Теунэ Алянэ, Iэрэмыс Снежанэ сымэ.
ЩIалэхэм я командэм хэта Хьэнэ Батыр, КъуэщIысокъуэ Iэнур, Архипцев Артем, Хочуев Сэлим сымэ ещанэ увыпIэр къахьащ.
Щхьэзакъуэ зэпеуэхэм Къуэдз Денизэ етIуанэ щыхъуащ.
ЩIалэхэмрэ хъыджэбзхэмрэ зэгъусэу ирагъэкIуэкIа зэпеуэм Къуэдз Денизэрэ Нескин Евгенийрэ (КъШР) етIуанэ хъуащ. Хъыджэбзэхэр зэгъусэу я зэпеуэм Къуэдз Денизэрэ Уталисовэ Таснимэрэ (Ставрополь край) домбеякъ медалхэр къахьащ. Мыбдежым Пхъэней Алинэ Къанэмэт Алия (КъШР) и гъусэу ещанэ хъуахэщ.
Ди хъыджэбзхэм я тренерыр Хъыдзэдж Беллэщ, щIалэхэм – Темыркъан Заурщ.
Зэхьэзэхуэхэм къарикIуахэр зэхалъхьэжа нэужь, Къуэдз Денизэ Iэмал игъуэтащ мы гъэм Кстовэ къалэм щекIуэкIыну урысейпсо зэхьэзэхуэм хэтыну.
ВагъуэщIэхэр
«ВагъуэщIэхэр» фIэщыгъэр зэрихьэу Санкт-Петербург къалэм щекIуэкIащ ныбжьыщIэхэм алыдж-урым бэнэкIэмкIэ я зэхьэзэхуэ. Абы щызэпеуащ ди къэралым и щIыналъэхэм ящыщ куэдым я бэнакIуэу 400-м щIигъу, Къэбэрдей-Балъкъэрым икIауэ 9 яхэту.
И хьэлъагъ елъытауэ зыхэта гупым япэ увыпIэр къыщихьащ Алимжанов Амырхъан (кг 23-рэ).
Биттиров Рустам (кг 26-рэ), Къэзэр Амир (кг 29-рэ), Бабаев Алан (кг 32-рэ), Айтеков Мухьэмэд (кг 38-рэ), Эльдиев Бэчхъан (кг 52-рэ) сымэ ещанэ увыпIэхэр къахьащ.
ЩIалэхэм я тренерыр Таумурзаев Мурадинщ.
КъарэцIыкIум щапхъэ ярегъэлъагъу
Кавказ Ищхъэрэмрэ Урысей Ипщэмрэ спорт гимнастикэмкIэ цIыхубзхэм я чемпионат Дон Iус Ростов къалэм щекIуэкIащ. Абы щызэпеуащ спортсмен 80-м щIигъу.
Къэбэрдей-Балъкъэрым и щIыхьыр иIэту зэхьэзэхуэм хэтащ УФ-м спортымкIэ и мастер, КъБР-м СпортымкIэ и министерствэм Олимп джэгухэм хэтыфынухэр щагъэхьэзыр и спорт еджапIэм и гъэсэн КъарэцIыкIу Ранетэ икIи ехъулIэныгъэфI дыдэхэр щызыIэригъэхьащ.
Ди пщащэ цIыкIум абы дыщэ медалу 4-рэ зы дыжьынрэ къыщихьащ: многоборьемрэ нэгъуэщI унэтIыныгъэхэмкIэ.
КъарэцIыкIу Ранетэ и тренерыр Продуновэ-Исметовэ Еленэщ.
