Спорт хъыбархэр

Урысейпсо зэпеуэм зыхуагъэхьэзыр

Дагъыстэным иджыблагъэ щекIуэкIащ Кавказ Ищхъэрэм алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэ. Абы щызэпеуащ КИФЩI-м и спортсмену 300-м щIигъу, я ныбжькIэ илъэс 16-м щIимыгъуауэ.

Къэбэрдей-Балъкъэрым и бэнакIуэхэм медаль 15 зэхьэзэхуэм къыщахьащ. Зыхэта гупхэм щытекIуащ Хьэбылэ Идар, Чыл Имран, Хъущт Сэлим сымэ.

Дыкъынэ Русланрэ Щынахъуэ Данилрэ дыжьын медалхэр къахьащ.

Семэн Хъалид, Нот Алим, Хьэкул Къаплъэн, Ажэгъуей Амир, Чыл Амырхъан, Бахъуэ Азрэт, Жылэхьэж Къантемыр, Шыдакъ Сэлим, Джатэгъэжь Темболэт, ФIыцIэхъу Темырлан, Емкъуж Сулеймэн сымэ ещанэ хъуахэщ.

Зэхьэзэхуэм къыщыхэжаныкIахэр псори хэтынущ мы гъэм гъатхэпэм Башкирием и къалащхьэ Уфа щекIуэкIыну урысейпсо зэпеуэм.

Ди командэр зэхьэзэхуэм хуагъэхьэзыращ Индрей Жантемыр, Хьэкъул Мурат, Чыл Аслъэн, Къарэ Хьид, Къардэн Анзор, Щокъарэ Мурат, Жыкъуэ Залымхъан, Табыхъу Тимур, Урысмамбэт Алим, Умар Тимур, Къурмэн Мурат, КъуийцIыкIу Инал, Хъуран Мурат, Умархэ Валерэрэ Залымрэ сымэ.

Тренер узэщIакIуэр ящыгъупщэркъым

Шэджэм къалэм СпортымкIэ щIалэгъуалэмрэ сабийхэмрэ я уардэунэм щекIуэкIащ Къэбэрдей-Балъкъэрым кекусинкаймкIэ и япэ тренер Капов Юрэ и фэеплъ республикэ зэхьэзэхуэ. Абы щызэпеуащ Ставрополь крайм, Ингушым, Къэрэшей-Шэрджэсым, ди республикэм я спортсмену I70-м щIигъу, медалу комплект 35-м щIэбэну.

Зэхьэзэхуэм кърихьэлIащ щIыпIэ администрацэм, жылагъуэ, спорт зэгухьэныгъэхэм я лIыкIуэхэр, Каповым и благъэ-Iыхьлыхэр, спортым дихьэххэр. ГъэщIэгъуэну икIи удэзыхьэхыу екIуэкIа зэпеуэхэм щытекIуа каратист ныбжьыщIэхэм медалхэр, щIыхь тхылъхэр, кубокхэр иратащ.

Капов Юрэ Къэбэрдей-Балъкъэрым каратем зыщиужьыным и гуащIэ хилъхьащ икIи спорт тхыдэм и цIэр къыхэнащ. Абы игъэсащ спортсмен цIэрыIуэ куэд, я нэхъыбэр езыхэр нобэ тренер хъужахэу, ди республикэм имызакъуэу, къэралым и нэгъуэщI щIыналъэхэми щылажьэу.