Нэхъ цIыху тынш гъуэтыгъуейт

УсакIуэ цIэрыIуэ Гъубжокъуэ Лиуан и къалэмыпэм къыщIэкIащ поэзием и лъагапIэм хабжэ усэ купщIафIэ куэд. Гъубжокъуэр гъащIэ мащIэу щытами, лъэпкъ литературэм хэлъхьэныгъэшхуэ хуищIащ. Абы и IэдакъэщIэкIщ «Шэрэдж толъкъунхэр», «Насыпгуэш», «Жэщ гупсысэхэр», «Зэманым и джэрпэджэж», «ДыгъапIэ», «Иужьрей уафэхъуэпскI» усэ тхылъхэр. Абыхэм я фIыпIэр щызэхуэхьэсауэ 2008 гъэм къыдэкIащ «Усэхэмрэ поэмэхэмрэ» сборникыр. 
ТхакIуэ Елгъэр Кашиф усакIуэм теухуауэ итхауэ щыта гукъэкIыжхэм фыщыдогъэгъуазэ.

«ИгъащIэ лъандэрэ дызэрыцIыхуу, ди гъуркIи ди цIынэкIи дызэрыщIэу дыкъызэдекIуэкIа пэтми, Лиуан сэрэ нэхъри нэхъ зэгъунэгъуж, ди натIэ зэтыпа щыхъуар а тхьэмыщкIэр дунейм щехыжынум и пэ къихуэ илъэсипщIырат - зэгъусэу зы лэжьапIэ пэшым дыздыщIэсащ, цIыху зыплIытху дыхъууи, езымрэ сэрэ ди закъуэуи. Ди пэшхэр нэхъыбэIуэ тхуащIауэ зыщыдгуэшым, хэт и гъусэу щIэсыну нэхъ къищтэрэ жаIэу щыщIэупщIэхэм, сэ занщIэу жэуап стащ: «Езыр арэзымэ, Лиуан сэрэ зы пэш дыщIэвгъэтIысхьэ». Дунейм ехыжам и гуэныхь сыту сщIын? «Хьэуэ» къыхигъэкIакъым абыи. Сэ сщIэрт Лиуан тутыныр зэрыфIэфIыр, езыми ищIэрт сэ тутын Iугъуэр сызэрижагъуэ бзаджэр. Ауэ сэ мыри сщIэрт: Лиуан укIытэ зиIэ, нэмыс зыхэлъ цIыхут, абы, зэрыжаIэу, езым нэхърэ зы хьэнтхъупс шынакъкIэ нэхъ мыхъуми, нэхъыжьым пщIэ хуищIырт, фIэлIыкIырт. Ди тхакIуэ нэхъыжьхэм ялъагъуу ар тутын зэремыфэри, утыкуакIуэу, зигъэжьэшхуэу зэрыщымытри зыщIэр си закъуэтэкъым. УдэгъуэгурыкIуэну, удэлэжьэну абы нэхърэ нэхъ цIыху тынш гъуэтыгъуейт. Езыр Iэсэт, сабырт. 
ЗызыгъэусакIуэшхуэу, сэ схуэдэ дэнэ щыIэ жиIэу Iэджэ къыщIыхьэрт ди лэжьапIэм. Лиуан нэхъ къегъэщIылIар усыгъэрти, абы и деж къекIуалIэрт зыгуэр зыуцIырхъа дэтхэнэ зы «классикри». Апхуэдэхэм ятхар зэрымыхъуар я фIэщ пщIын щхьэкIэ, дамэкъуэ куэд пкъутэн хуей хъурт. Ауэ мис абыхэми зэрепсэлъэн бзэ IэфI Iурылът Лиуан - я жагъуэ зэ-римыщIыным пылъу, кIыхьу, хэбгъэзыхьмэ, кIыхьлIыхьу ябгъэдэст абыхэм. 
Гъубжокъуэ Лиуан гъуэгу сытригъэуващ, сэбэп къысхуэхъуащ жызыIэн куэд яхэту къыщIэкIынщ блыщI гъэхэм къыщыщIэдзауэ ди литературэм къыхыхьахэм. Сэ слъагъурт ар усакIуэ ныбжьыщIэхэм ядэлажьэу зэрыщыта щIыкIэр. Езым и усыгъэхэм зэрахуэгумызагъэм хуэдабзэу, ар щIалэгъуалэм я тхыгъэхэми кIэрыст, зыхуей хуигъазэрт. Ари щыщт Лиуан и хьэлэлыгъэм, и псэ къабзагъэм, и хьэл-щэн дахэм. И усэхэми апхуэдэут ар къызэреджэр: Iэсэу, сабыру, езым псэкIэ къигъэщIа, и Iэпкълъэпкъ пщыкIутIым къыхэкIа и тхыгъэр цIыхухэми я деж апхуэдэу зэрынихьэсыным хущIэкъурт. А хьэлым итащ ар къигъэщIа илъэс бжыгъэ мащIэми».