Гъэ еджэгъуэщIэм ирихьэлIэу, УФ-м и Президент Путин Владимир Iэ щIидзащ «ЕгъэджакIуэхэм зэрызыщIагъакъуэ Iэмалхэм къыдыщIагъухэр» унафэ №498-м. ЕгъэджакIуэхэм яхуэфащэ пщIэр цIыхухэм ягу къэзыгъэкIыж мы дэфтэр щхьэпэм къыхилъхьэ жэрдэмхэм иджы хабзэубзыхухэр йолэжь.
Шэч хэмылъу, ди егъэджакIуэхэр хуэныкъуэт къэралым къыбгъэдэкI апхуэдэ гулъытэ. Хъыбарыр псынщIэ дыдэу зэIэпахауэ щытми, иджы набдзэгубдзаплъэу дахэвгъаплъэ узыщыгугъ хъуну зэхъуэкIыныгъэхэм .
Президентым Iэ щыщIидза махуэм щегъэжьауэ къару егъуэт унафэм. Ауэ абы зи гугъу ищI языныкъуэ щытыкIэхэм зыщихъуэжынур илъэс ныкъуэ хуэдиз дэкIа нэужьщ. МазихкIэ Правительствэм ЕгъэджакIуэм и удостоверенэм и жыпхъэр игъэхьэзырынущ, хабзэм зэхъуэкIыныгъэ хилъхьэнурэ, ахэр цIыхухэм зэралъэIэсыну гъуэгухэм елэжьынущ.
ХабзэщIэм егъэджакIуэр щытыкIэ щхьэхуэм ирегъэувэ, IэщIагъэм цIыхубэм дежкIэ и мыхьэнэр нэхъ лъагэу иIэту. Къэралым и пщэ делъхьэж дэтхэнэ зы гъэсакIуэми и къэухьым зригъэужьыну Iэмал иритыну, и хуитыныгъэм къыщхьэщыжыну, шэсыпIэ хэхахэмкIи къегъэгугъэ. УпщIэхэм я нэхъыбэр зэкIуэлIэж улахуэм и инагъым теухуауэ унафэщIэм зыри къыщыкIуэркъым, сыту жыпIэмэ, абы и инагъыр щIыналъэ къэс щхьэхуэу щаубзыху.
ЗэхъуэкIыныгъэ нэхъ ину къалъытэ илъэс 25-кIэ егъэджакIуэу лэжьа псоми «лэжьыгъэм и ветеран» фIащыну къызэрыхалъхьар. Иджыри къэс а илъэс бжыгъэмкIэ улэжьауэ щытми, къэралым, Президентым е ЕгъэджэныгъэмкIэ министерствэм укъызэрыхигъэщ тыгъэ къыпхуамыгъэфэщамэ, а цIэ лъапIэр къуату щытакъым. Иджы Правительствэм ар зратыпхъэхэмрэ зэрыратыну щIыкIэмрэ епхауэ, хабзэр ихъуэжынущ.
КъинэмыщIауэ, дэфтэрым ипкъ иткIэ, егъэджакIуэхэр хуитщ:
- мазэм зэ е нэхъыбэрэ къэрал, щIыналъэ музейхэм пщIэншэу зыщаплъыхьыну;
- и лэжьыгъэм епха упщIэ къэувмэ, и Iуэхур юристым пщIэншэу зэфIигъэкIыну;
- и IэнатIэм Iуту, узыншагъэм е и гъащIэм зэран хуэхъункIи хъуну псоми щахъумэну;
- къэрал мылъкукIэ къызэрагъэпэща, егъэджэныгъэм епха интернет хэщIапIэхэр къигъэсэбэпыну;
- егъэджакIуэ щIалэхэм зы илъэскIэ къакIэлъыплъыну ущиякIуэ къратынущ;
- IэщIагъэм щиIэ зэфIэкIымрэ и щIэныгъэмрэ зэрыхигъэхъуапхъэ IэмалхэмкIэ къызэрагъэпэщынущ;
- егъэджакIуэхэм я бынхэр сабий IыгъыпIэхэм адрейхэм япэ къащтэнущ;
Щхьэхуэу тепсэлъыхьыпхъэщ «Лэжьыгъэм и ветеран» хъуну егъэджакIуэхэм абы къаритыну шэсыпIэхэм. Мы цIэр зыхуагъэфэщахэм я улахуэм худыщIагъу ахъшэр щIыналъэ къэс щхьэхуэу щаубзыхунущ. Ар ахъшэу щытыныр Iэмалыншэу ягъэувыркъым. Псалъэм и хьэтыркIэ, зы республикэм улахуэ къыщыхудыщIагъункIи мэхъу. Адрейм псэупIэ-коммунальнэ уасэхэр щыщхьэщахынкIи хъунущ. Ещанэм транспортым е хущхъуэхэм я уасэр щыIахынукъым. Е цIыхубэм хуащIэ Iуэхутхьэбзэ щхьэхуэхэр егъэджакIуэхэм нэхъ хуиту къаIэрыхьэнкIи хъунущ.
Сытми, «лэжьыгъэм и ветеран» цIэр зэрыфIащым езыр-езыру улахуэм хигъахъуэуи, пенсэр нэхъыбэ ищIуи щыткъым. А псори щIыналъэ къэс унафэ щхьэхуэкIэ щызэрагъэзэхуэнущ.
ЕгъэджакIуэу илъэс 25-кIэ лэжьауэ, ауэ школым IукIыжахэм хабзэщIэм ипкъ иткIэ «лэжьыгъэм и ветеран» цIэр иратынрэ ирамытынрэ иджыри наIуэкъым.
Музейхэм пщIэншэу кIуэну зэрыхуитми мардэ гуэр иIэщ. «Мазэм зэ нэхърэ мынэхъ мащIэу», - апхуэдэущ унафэм къызэрыщыкIуэр.
ЩытыкIэм зихъуэжу уи фIэщ нэхъ зыщIыр егъэджакIуэхэм дэфтэр къызэрыратынурщ, абы и жыпхъэр хьэзыр зэрыхъуу, къагъэлъэгъуа шэсыпIэхэр зэратыну щIыкIэри наIуэ хъуну къыщIэкIынщ.
«Юрист дэIэпыкъуныгъэ пщIэншэ» жыхуаIэм и гугъу тщIымэ, абы и мыхьэнэ нэхъыщхьэр егъэджакIуэм и хьэкъым къыщхьэщыжын зэригъуэтыпхъэрщ. Школ унафэщIхэм, сабийхэм я адэ-анэхэм, къадэлажьэхэм, ирагъаджэ сабийхэм егъэджакIуэр щыхагъэзыхь, хуэфащэр къыщылъамыгъэс, зыгъэпуд къыщрапэс куэдрэ къохъу. КъинэмыщIауэ, куэдрэ къохъу къэралым кърит хуитыныгъэхэр лэжьакIуэм щыщабзыщI. ХабзэщIэм унафэ зыIэщIэлъхэм къалэн ящещI дэтхэнэ зы льготэм теухуауи ар зылъысыпхъэхэр щыгъуазэ ящIыну.
Къэралыр дэIэпыкъуэгъу хъуфынут, абы и унафэр зыгъэзащIэ цIыху щхьэхуэхэм я къалэныр гурэ псэрэ халъхьэу ягъэзащIэтэмэ.
