МафIэсым щIидзагъэххэщ

Дызэрыщыгъуазэщи, илъэс къэс дуней псо мэзым щIыпIэ-щIыпIэкIэ къыщылыб мафIэсхэм хэщIыныгъэшхуэ къытхуехь. Ар псэущхьэ, къэкIыгъэ, хьэуа, цIыху гъащIэ ирехъу. ЩIымахуэм дыкъиутIыпща къудейуэ, гъатхэм гу щыдмыхуауэ къытщыхъуми, Урысейм и мэзхэр мафIэм ес, къызэрыщIэкIымкIэ.

«Урысейм мафIэсхэм щIадзагъэххэщ. Уеблэмэ гъэм и зы зэман мычэму, зэпымычу ису жыпIэ хъунущ. Псалъэм папщIэ, 2021 гъэм и иужьрей мафIэсыр дыгъэгъазэ мазэм дгъэункIыфIауэ щытащ. 2022 гъэм и япэ мафIэсыр щIышылэм и 2-м Приморьем къыщылыбащ. Урысейр къэралышхуэщ, климат и лъэныкъуэкIэ лIэужьыгъуэ зыбжанэу зэхэлъщ. Зы щIыпIэм щыщIымахуэкIэ, адрейм щыгъэмахуэщ. Аращ ар къызыхэкIыр. Иджыпсту дызыIутыр нэгъуэщIщ – мэкъумэш лэжьыгъэм хухаха щIым къыщыхъу мафIэсхэм мэзым зремыгъэдзынырщ. Дауэ дымыщIами, вэн-сэным зэран хуэдгъэхъу хъунукъым», - жеIэ Рослесхозым и унафэщI Советников Иван. 
Гу лъытапхъэщ мафIэсхэр нэхъ зыхуэлъэ щIыналъэхэр зыхуэныкъуэ техникэкIэ зэрызэщIэузэдар, и чэзум насыпыншагъэр къахутэу ягъэункIыфIыжыну Iэмал зэраIэр. 
««ЩIыуэпс» лъэпкъ Iуэхум илъэсиплI хъуауэ дыхэтщ. Абы иIэщ мэзым къыщыхъуа мафIэсхэр къэзыхутэ, зэрагъэункIыфIыж техникэкIэ къэралыр къызэрызэрагъэпэщ унэтIыныгъэ. А программэм ипкъ иткIэ щIыналъэ зыбжанэ мафIэсхэм хуэхьэзырщ. Ауэ, ди жагъуэ зэрыхъунщи, нэхъ щIыналъэшхуэхэм ящыщу Якутия, Красноярск, ИркутскымкIэ ди гур зэгъауэ схужыIэнукъым, зыхуэчэмыр куэдщ. Дызыщыгугъыр – авиацэ и лъэныкъуэкIэ щыIэ техникэрщ. Абыи уигъэгувэнкIэ хъунущ. Сыту жыпIэмэ, авиатехникэр щIыналъэхэм яIэкъым, федеральнэ унафIэм щIэту, мафIэс здэщыIэм яутIыпщу аращи, кIыхьлъыхьщ и Iуэхур.  ФIым дыщыгугъынщ зи лэжьыгъэм фIыуэ хэзыщIыкI мафIэсгъэункIыфIхэр ди куэдщи. Абыхэм я бжыгъэр кIуэ пэтми хохъуэ. Дауэ мыхъуами, мы унэтIыныгъэм къэралым гулъытэшхуэ къыхуещIри, щIыуэпс насыпыншагъэхэм дапэлъэщыну дыкъегъэгугъэ!», - къыхигъэщащ унафэщIым.