НаIуэу зэрыщытщи, Браун Евэ фюрерым бын къыхуилъхуакъым. АрщхьэкIэ I98I гъэм Франджым и цIыху Лоре Жан-Мари жиIащ и адэр Гитлер Адольфу, и анэр Люберже Шарлоттэу. Пэжи пцIыи… Хэт зыщIэр?
… Зыгъэпсэхугъуэ зэман къратати, нэмыцэдзэм и ефрейтор Адольф Лилль (Франджы) и щIыпIэ нэхъ хьэлэмэтхэм я сурэт ищIт. Зэгуэр абы къыбгъэдыхьащ нэмыцэбзэкIэ мыIейуэ псалъэ хъыджэбз. ЗэрыцIыхуахэщ.
Уэ, дауи, сурэтыщI ухъуну ущIэхъуэпс къыщIэкIынщ?, - щIэупщIащ хъыджэбзыр.
- СыщIохъуэпс икIи ар къызэхъулIэнущ. Сэ къызэмыхъулIэн щыIэкъым,-итыжащ жэуап щIалэм.
А тIур зэхуэзэ хъуащ. Абы и Iэужьу I9I8 гъэм гъатхэпэм и 25-м дунейм къытехьащ Жан-Мари щIалэ цIыкIур. И къуэр и Iыхьлыхэм къахуигъанэри, Шарлоттэ мыгувэу Париж кIуащ ахъшэ къилэжьыну. I922 гъэм литограф Лоре Клеман дэкIуащ, и унэцIэр езым и къуэм къригъэщтэну арэзы къищIри. Абы щыгъуэми, Шарлоттэ фIы дыдэу ищIэрт и къуэм и адэр зэры-Алодьфыр. ЖыIэн хуейщ езы Гитлери цIыхубзыр зэрыщымыгъупщар. ПIалъэ-пIалъэкIэрэ щыгъын фIыцIэкIэ хуэпа цIыхухэм Шарлоттэ къыхуахьырт ахъшэрэ ерыскъыгъуэ хэплъыхьахэмрэ.
АрщхьэкIэ властыр щыIэрыхьа I933 гъэм Адольф къызэпиудащ Шарлоттэ къыхуиIэ пыщIэныгъэр: абы и расэ теорием къезэгъыртэкъым и япэ лъагъуныгъэр. Иджы абы и гуращэр зыт: дунейм и тепщэ хъунырт - адрей псори мыхьэнэншэт.
И къуэр илъэс I5 ирикъуа иужьщ Шарлоттэ абы и адэ дыдэр хэтми щыжриIар Ар иджыри щыгугъырт зэгуэр бжэм къытеуIуэу Адольф къыщIыхьэу, «Сэ фэ фыслъагъуну сыкъэкIуащ!» къажриIэну. АрщхьэкIэ Гитлер жыжьэ щыIэт.
А цIыхубзым и гум щIыхьат икIэм-икIэжым Германиер зэрыхагъэщIари, езы Гитлер зэрызиукIыжари. Иджы абы гурыфIыгъуэу къыхуэнэжар фIыуэ илъагъу и къуэрт. КъыдэкIуэтея иужь, Жан-Мари бизнесым хыхьащ, ауэ и Iуэху къыщикIакъым. Апхуэдэу щыхъум, техникэ училищэр къиухри, гъущI гъуэгум мехникыу щылэжьащ. И ныбжьыр илъэс 30-м иту фыз къишащ. Абырэ и щхьэгъусэмрэ щIалитхурэ хъыджэбзиплIрэ зэдагъуэтащ.
Гитлер зэрикъуэр хэIущIыIу ищIыну ар щытегушхуар I98I гъэрщ. И къекIуэкIыкIар къыщыгъэлъэгъуауэ къыдигъэкIа тхылъыр критикхэм ауанкIэ щIагъэнащ: ар Гитлер зэрикъуэм щыхьэт техъуэу зы дэфтэр нэхъ мыхъуми щыIэтэкъым.
ЕтIуанэрауэ, Жан-Мари I939 гъэм Мажино и линием и деж нацистхэм щапэщIэтат, нэмыцэхэм Франджыр яубыда иужь, ЗыпэщIэсэныгъэ зэщIэхъееныгъэм хэтат, езым и IэкIэ фашист 22-рэ иукIат, нэмыцэ эшелони 3 щхьэпригъэдзат. И адэм езэуэжауэ къыщIокI…
- Сэ нэхъ щIыпIэ шынагъуэ дыдэхэм сагъэкIуэну сылъаIуэрт. Си адэр лъыкIэ зыщызгъэгъупщэну сыхуейт. Фашизмэм сытеплъэ хъуртэкъым,- игу къигъэкIыжырт иужькIэ Лоре.
Критикхэм емыдаIуэу, тхылъыр тыкуэнхэм псынщIэ дыдэу щызэбгырахащ. Лоре цIэрыIуэ хъуащ.. Генетикхэм къахутащ Жан-Мари Гитлер зэрещхьыкъабзэр икIи абы и къуэу къызэрыщIэкIынур. Тхыдэджхэм жаIащ и щIалэгъуэм щыгъуэ фюрерыр расэ идеологием зэрытемытар. Гитлер ищIа сурэтхэм къыхагъуэтащ Шарлоттэ и теплъэм ещхь дыдэ. Мис а «дыдэхэм» яужькIэ Iуэхур нэхъ белджылы хъуащ.
Лоре и бынхэр игъэсащ, иригъэджащ, илъэс 67-рэ и ныбжьу гуузым илIыкIащ: къешынэуауэ къыщIэкIынущ етIощIанэ лIэщIыгъуэм дунейм нэхъ бзаджэнаджэ дыдэу тетауэ къалъыта цIыхум къызэрилъхуар. Абы и бынхэр нэхъ жыжьэж кIуащ: хуеякъым Гитлер я адэшхуэу зэрыщытым тепсэлъыхьыхэну. Хэбгъэзыхьмэ, щIэныгъэм и иджырей IэмалхэмкIэ ар зэрыпэжыр шэчыншэу сэтей къащIмэ, Гитлер и «Майн кампф» тхылъым къыпэкIуэ гонорархэр (ар иджыри къэрал зыбжанэм тиражышхуэкIэ къыщыдагъэкI) къазэрыIэрыхьэфынуми, дихьэхакъым. Зэрыбынхэм я цIэкIэ Жан-Мари и къуэрылъху Альбер жиIащ:
- Дэ дыхуейкъым ахъшэ фIей къеIытхыну.
