КIуэ пэтми я щIэупщIэр хохъуэ ятIагъуэ гъэжьам (керамикэм) къыхэщIыкIа хьэпшыпхэм. КъызэрыщIэкIымкIэ, куэди щIэхъуэпсырт а IэщIэгъэр зрагъэгуъэтыну. Ар къилъытауэ арагъэнщ апхуэдэ школ ди республикэм япэу къыщызэIузыха ХьэцIыкIу Миланэ.
Хуэбгъэфащэ зэрыхъунумкIэ, хъыджэбзым и Iуэхур йофIакIуэ, абы езым и лэжьыгъэмрэ школым щегъэджэнымрэ ехъулIэу зэдехь. ЦIыхум и гум фIэфI Iуэху ищIэмэ, къехъулIэу жаIэ. Армырамэ, и щхьэ тригъэуну хъыджэбзым къригъэжьа Iуэхур пIалъэ кIэщIкIэ IэщIагъэ зэрыхуэхъуар дауэ къызэрыбгурыIуэнур? Пэжу, Миланэ и лэжьыгъэм щытепсэлъыхькIэ, гурэ псэкIэ зэрыбгъэдэтыр зыхомыщIэнкIэ Iэмал имыIэу, и нэхэр мэлыд. Абы дызэса хьэпшыпхэм щIыкIэ щIэщыгъуэ къахуигъуэтащ, а IэщIагъэм хуиIэ еплъыкIэм зрегъэужь, и IэрыкIхэм къыщIэупщIэм я бжыгъэм къыхохъуэ.
Миланэ КъБКъУ-м и филологие факультетыр, КъБКъАУ-р къиухащ. Иджыри студенту абы «Университетская жизнь» газетым щылэжьэн щIидзат, абы щыгъуэщ сурэт техыным гу щыхуищIари.
Ар япэу ятIагъуэм щыдихьэхар 20I5 гъэращ. Дихьэхар Iуэхут, ятIагъуэр щаупIэ, щагъэджэрэз стIол хъурей цIыкIум хуэдэ къащэхуну ягъуэтыртэкъыми, и щхьэгъусэм къигупсысри, зэрыжьыщIэ машинэм хэлъ пкъыгъуэхэр къигъэсэбэпурэ, хуищIат. ЯпэщIыкIэ а стIол хъуреймкIэ Миланэ унэм щылэжьащ, и IэрыкIхэр зэрищIыр Интернетым кърилъхьэу. ИтIанэ, абы къыпэджэжыр куэд щыхъум, зезыгъэсэну хуейхэр къыщылъаIуэм, и Iуэхум зригъэубгъуну тегушхуащ. ИджыкIэ Миланэ и закъуэкъым ятIагъуэ кIыщым щылажьэр, абы и деж япэ дыдэу къэкIуауэ щыта Шаваевэ Эллэ нэхъ цIыкIухэм ядолажьэ, кIэфий зэмылIэужьыгъуэхэр сабийхэм я гъусэу Исаенкэ Маринэ ещI, сабийхэм джэгукIэ зэмылIэужьыгъуэхэр ирагъэлъагъу КIэрэф Альбинэрэ Iэщын Миланэрэ.
А лъэщапIэм зыщызыгъэсэну къакIуэхэр ныбжькIэ ягуэш. Илъэсищым щегъэжьауэ блым нэсхэр нэхъыбэу ятIэкIэ ягъэджэгу, хьэпшып цIыкIуэфэкIуэхэр ирагъэщI. Нэхъ балигъхэм мастер – класс зэмылIэужьыгъуэхэр драгъэкIуэкI. Ахэр махуэшхуэ гуэрхэм е гъэм и теплъэгъуэхэм теухуауэ щытынкIэ мэхъу. Зэрылажьэ ятIагъуэр Москва дэт керамикэ заводым кърагъэш. Ику иту мазэм школым ятIагъуэу килограмм 28-рэ къыщагъэсэбэп. ЯтIагъуэм хьэпшып гуэр къыхэпщIыкIын папщIэ зэмани къаруи ухуейщ. ЯпэщIыкIэ ятIэр IэтIэлъатIэ хъуху зыIащIэ, итIанэ къыхащIыкIынум и теплъэр ящI, ар щагъажьэкIэ хьэку пщтырым къыщымычэн щхьэкIэ и джабэхэр пIащIэIуи IувыIуи пщIы хъунукъым. Хьэпшыпым кIэрылъыну пкъыгъуэ цIыкIухэр щхьэхуэу ящI, абы къыкIэлъыкIуэу тхыпхъэхэр тращIэри ялэж. А псори зэфIэкIа иужь хьэпшыпыр тхьэмахуэм нэблагъэкIэ езы-езыру ягъэгъущри, итIанэщ хьэкум щрагъэувэр. Абы яужьи ар занщIэу къэбгъэсэбэп хъунукъым, ар махуэ зыбжанэкIэ ягъэупщIыIужри, аргуэру хьэкум щагъажьэ.
Мы IэщIагъэр къызэрежьэрэ куэд щIами, зыужьыныгъэ игъуэтащ. ИкIи къыжыIапхъэщ ар тыншу къэзылъытэхэр зэрыщыуэр. Ди къэралым ис керамистхэр ИнтернеткIэ зэрызэрыщIэм, зэрызэчэнджэщым и фIыгъэкIэ мы Iуэхур къощIэрэщIэж. IэрыкI хьэпшыпхэм я жармыкIэу илъэс къэс къалэшхуэхэм щрагъэкIуэкIыр сэбэп мэхъу.
Миланэ и лэжьыгъэхэр зэщхьщ икIи зэщхькъым. Макъамэм, лъагъуныгъэм, плъыфэхэм хуэгъэпса лэжьыгъэ и куэдщ Миланэ. КъызыхэкIа лъэпкъым теухуауэ хъыджэбз IэпэIэсэм жиIэм ущымыгуфIыкIынкIэ Iэмал иIэкъым.
«ЗызыщIэж и гъуэгу нэхъ тыншу къыхихыжыфу къысщохъу. Сэ адыгэ дунейм сыщыщу, адыгэ гупсысэкIэ сиIэу зыкъызолъытэж. А фIэщхъуныгъэм дамэ къыстрегъакIэ. Си анэдэлъхубзэр фIы дыдэу солъагъу, ар куэдым гугъуу къалъытэ, ауэ ар бзэм и беягъым зэрифIыгъэм егупсысыр мащIэщ. Псом хуэмыдэу сфIэфIщ щызэбдзэкIкIэ бзэр зэрыджэгур. Ди адыгэ хабзэхэр дунейм узэрыхэзэгъэн Iэмал телъыджэщ, зызужьауэ къалъытэ нобэрей гъащIэм ди хабзэр йокIупс. ФIыгъуэ мылъытэщ дызыхэпсэукI щIыуэпсыр. Налшык къалэ ущыпсэуну сыт и лъэныкъуэкIи щIыпIэ тыншу къызолъытэ», - щыжеIэ Миланэ и интервьюхэм ящыщ зым.
КъищынэмыщIауэ, хъыджэбзыр адыгэ тхыпхъэ-щIыпхъэхэм, абыхэм я щIагъыбзэм дахьэх.
Махуэ къэс мащIэ-мащIэу зи зэфIэкI, къэухь зезыгъэужь хъыджэбзым иджыри и хъыбарыфI куэд зэрызэхэтхынур шэч къызытомыхьэнщ. Ди гуапэу и ехъулIэныгъэщIэ, зыужьыныгъэ дыпоплъэ.
