ХъумпIэцIэдж пцIыупс

Псысэ

Зэрыщхьэхынэм и зэранкIэ гупым къызыхахуа хъумпIэцIэджыр макIуэ, удз кIырхэм пхыпщу. КъоувыIэ, зеплъыхь, пшхы хъун щимылъагъум, и башыр зыщIегъакъуэри адэкIэ йожьэж. Мо хуабэм и Iур  игъущIыкIауэ псы Iуфэм Iуохьэ, ауэ псы уэрышхуэм бгъэдыхьэн мэшынэ - хэхуэмэ! И щхьэр Iушэ хъуащ псымкIэ плъэурэ. Щогугъ зыгуэр къыхурихьэхынкIэ. Апхуэдэурэ здэкIуэм, зищIысыр имыщIэ зы абрагъуэ гуэр къыIэщIолъагъуэ. Мэшынри, удз къуагъым зыкъуедзэ, зэрызигъэхъейуэ къыщIэпхъуэжын хьэзыру. Еплъыпэмэ, жызум Iэрамэт. МэгуфIащэ, лъыр и щхьэм доуейри, къомэх. Псы уэр къытракIа иужьщ зыкъыщищIэжар. И нэр къызэтрихмэ, къызыхэзыхуауэ щыта хъумпIэцIэдж гупыр къыщхьэщытщ.

- Сыт фэ къомыр фызыхуейр, хэт къывэджар?!- хъумпIэцIэджыр мэкIий, зи псы IэфIым щIэфыну пIащIэ жызумыр къытрахынкIэ мэшынэри.

- Укъэмэхати, дыбдэIэпыкъунщ жытIэри дыкъэувыIащ.

Мыдрей ар идэркъым:

- Сыт фыкъыщIыздэIэпыкъунур, сэ езыр си щхьэ сыдоIэпыкъужыф.

Мес, мор флъагъурэ? - ещI и щхьэр жызумымкIэ. - Мис ар къыпысчри мыбы нэс къэсхьащ. Сешати, тIэкIу зызгъэпсэхуну сыгъуэлъауэ фэ фыкъэсащ!

Ар щыжиIэм, псори къоуIэбжь,  пелуан къахэкIам щошынэри йокIуэт. ИтIанэ, хъумпIэцIэджхэм я нэхъыжьыр къыхокIри, къолъэIу иращIар къахуигъэгъуу, къахыхьэжыну, и жызумри къадигуэшыну. Гупсысэ хуэдэу заулкIэ хъумпIэцIэджыр щотри,  итIанэ арэзы мэхъу.

- Ауэ, Iейуэ сешащи, - жеIэ зигъэтхьэмыщкIафэу,- зэкIэ хьэлъэ сеIэжыфынукъым.

- Уэ къызэрыпхьари куэдщ, адэкIэ дэ нэтхьынщ, - жаIэри псори жызум къудамэм йожэ.

Асыхьэтым, щIыр ягъэхъейрэ жыпIэу, цыжьбанитI абыхэм къащхьэщолъадэ. ХъумпIэцIэджхэм я псэр IукIауэ щIым зыхаудыгъуэ.

- Жыжьэ къипха мыр? - йоупщI зы цыжьбанэр адрейм.

- Ыы, модэ нэс къислъэфащ, адэкIэ схуэхьыжыртэкъыми, къэзгъанэри уэ сыныпкIэлъыкIуащ, - къетыж жэуап мыдрейм.

Зэпаубыдри, иралъэфажьэ жызум Iэрамэр.

Iуэхур зыIутыр къызыгурыIуа хъумпIэцIэджхэм зыкъаIэтыжри къэзыгъэпцIам и дежкIэ мажэ, я IэштIым цIыкIухэр ягъэдалъэу. Мыдрей цIыкIури и лъэ къызэрихькIэ мажэ, мажэ и пцIыр япэ иту.