Налшык къалэм и гимназие №14-м щеджэ, илъэс 14 зи ныбжь Куэцэ Инал пщафIэ Iэзэщ. Иджыблагъэ ар ирагъэблэгъащ «Пятница» телеканалым и «Кондитер. Дети» проектым икIи абы и суперфиналым пхыкIащ. Абы къыхуагъэфэщащ мы теленэтыным и саугъэт Фрайди пандэр. Инал игъэхьэзыр IэфIыкIэхэм Къэбэрдей-Балъкъэрым щыпсэу куэд щIоупщIэ икIи ягу ирохь.
Куэцэ зэкъуэшхэу Иналрэ Идаррэ я цIэр зэхэзымыхар мащIэу къыщIэкIынщ. Газетеджэхэм мызэ-мытIэу и гугъу ныфхуэтщIащ нэхъыщIэ Идар. Ар «Голос. Дети», «Детская новая волна-2022» телепроектхэм хэта икIи ехъулIэныгъэхэр къыщызыхьа уэрэджыIакIуэ цIэрыIуэщ. Нобэ фэдгъэцIыхуну Инал илъэс 11 зэрыхъурэ пщэфIэным дехьэх. Нэхъыбэу абы игъэхьэзырыр IэфIыкIэхэрщ. Езым зэхигъэзэгъа пкъыгъуэхэмкIэ ещI макарон лIэужьыгъуэу 50-м нэблагъэ. КъыжыIапхъэщ, ар бгъэхьэзырыну нэхъ гугъуу дуней псом къызэрыщалъытэр.
«Кондитер. Дети» проектыр зей, пщафIэ Iэзэ Агзамов Ренатрэ къэпщытакIуэ гупым хэтхэмрэ щаIущIэм, Инал езым игъэхьэзыра «Фисташка-малина» мусс тортыр яритащ. Налшык икIа ныбжьыщIэм, пщэфIэным теухуауэ иIэ зэфIэкIхэмкIэ къэпщытакIуэхэр къигъэуIэбжьат. КъыжыIапхъэщ, «Пятница» телеканалым и «Вундеркинды» программэми Инал нэхъапэIуэкIэ зэрыхэтар.
- Си анэр къыщалъхуа махуэм згъэгуфIэн мурадкIэ куржы дэлэн хуэзгъэхьэзырат. Абдежщ псори къыщежьар, - жеIэ Инал. - Япэу згъэхьэзыра шей дефэр - профитролым ещхь, «шу»-кIэ зэджэ франджы IэфIыкIэрщ. Зэ щIыгъуэкIэ ар къызэрызэхъулIар згъэщIэгъуащ, - жеIэ Инал. - Абы къыкIэлъыкIуащ макарон, эклер, тарт, торт, трайф, пирожнэ, круассан, нэгъуэщI IэфIыкIэхэкIхэр. Псом хуэмыдэу зыхэслъхьэ щымыIэу сфIэфIщ франджы шей дефэ макароныр.
Дэзыхьэх сыт хуэдэ Iуэхугъуэми тегушхуэныгъэ хэлъу зыхуэзыгъасэ щIалэ цIыкIум пщафIэ IэщIагъэм хуеджэну мурад ищIащ. И зэфIэкIхэм хигъэхъуэну, зиужьыну хущIэкъуурэ, курс, мастер-класс куэдым пхыкIащ, Урысеймрэ Европэмрэ я шеф-кондитер зыбжанэм я деж мыщхьэхыу щеджащ Инал. Абыхэм ящыщщ Кислицын Александр, Никандровэ Верэ, Овандэ Ханс сымэ, нэгъуэщIхэри. Илъэс 14 фIэкIа мыхъуми, Инал пщафIэ Iэзэщ. И унагъуэм исхэр, и егъэджакIуэхэр къыщалъхуа махуэхэм, махуэшхуэхэм ирихьэлIэу саугъэтхэмкIэ егъэгуфIэ. КъинэмыщIауэ, псапэ зыпылъ Iуэхухэми хэтщ. Сабийхэр хъумэным я дунейпсо махуэм ирихьэлIэу, Инал сабий хуэмыщIахэм ядоIэпыкъу.
ЕхъулIэныгъэ къызыпэкIуэм теухуауэ абы жеIэ:
- Зыгуэрым зыхуэбгъэсэн папщIэ, еш умыщIэу ухущIэкъун хуейщ. Нэхъыщхьэращи, уи зэманым ущымысхьу а Iуэхум гукIи псэкIи упэрытыпхъэщ. Згъэхьэзыр IэфIыкIэ псори си рецептщ. Хьэзыру зыгуэр къасщтэми, Iэмал имыIэу солэжьыжри, сысей гуэр абы щIызогъуж. Фошыгъум къишэ зэраныгъэм сыщыгъуазэщи, зэпымыууэ ар си IэфIыкIэхэм нэхъ мащIэу зэрыхэслъхьэным и ужь ситщ. Апхуэдэу IэфIыкIэхэр зэрыслъхьэр тхылъымпIэ коробкэхэрщ, щIыуэпсым и къабзагъэм пластикыр зэран зэрыхуэхъум къыхэкIыу.
ПщэфIэным, уэрэд жыIэным дахьэх зэкъуэшхэм спортми зэман къыхуагъуэт. Иналрэ Идаррэ а псоми тезыгъэгушхуэр аращ.
- Дэтхэнэ зы адэ-анэми хуэдэу, щIалэ цIыкIухэр зы Iуэхугъуэ гуэрым дихьэхыу щытлъагъукIэ, зэрытхузэфIэкIкIэ дадоIэпыкъу. ФIыуэ ялъагъу, дэрэжэгъуэ къе-
зыт IэщIагъэр къыхахмэ зэрызаузэщIынур къыдгуроIуэри сыткIи защIыдогъакъуэ, - жеIэ зэкъуэшхэм я анэ Батыр Мадинэ. - Лэжьыгъэмрэ сабиищымрэ здэпхьыну мытыншми, зэкъуэшхэм я ехъулIэныгъэхэр, езы цIыкIухэри абыхэм зэрыщыгуфIыкIыр щыслъагъукIэ, къаруущIэ къысхелъхьэ.
Сочэ къалэм хьэрычэтыщIэхэм папщIэ къыщызэрагъэпэща урысейпсо зэхуэсым ирагъэблэгъащ Инал. ХьэщIэу здэкIуа а Iуэхум балигъыпIэ имыувауэ хэтар езым и закъуэщ. Инал хьэрычэтыщIэ, ресторатор зыбжанэ зригъэцIыхуащ. Абы щIалэщIэр хуигъэушащ, зэман дэкIмэ, ресторан хьэрычэт Iуэхум иужь ихьэу дуней псом щыцIэрыIуэ ресторатор хъуну.
Инал и зэфIэкIхэм дрогушхуэ, и ехъулIэныгъэхэм хигъэхъуэну, и хъуэпсапIэхэм лъэIэсыну ди гуапэщ!