Гальперин Григорий Къэбэрдей-Балъкъэрым уэрэдымрэ къафэмкIэ и ансамблым къыщыкIуам, псом япэ дыдэу къызэрыщIидзар адыгэхэмрэ балъкъэрхэмрэ я IуэрыIуатэ къулейр иджынырщ. Репетицэхэр щрагъэкIуэкIкIэ, лъэпкъ къафэхэм фIыуэ хэзыщIыкI нэхъыжьхэр къригъэблагъэрт. Колхозхэм щыкIуэкIэ - Гальпериныр лIыжьхэм кIыхьу ябгъэдэст.
Абы япэу игъэува къафэм - «Отдых на полевом стане» - и къэIуэтэкIэм щIэ гуэр зэрыхэлъым цIыхухэм занщIэу гу лъатащ. НэхъапэIуэхэм къэфакIуэхэр зы хабзэм тету зэкIэлъхьэужьу къихьэрэ щIалэхэмрэ хъыджэбзхэмрэ лъэныкъуэ зырызкIэ зэпыIукIуэтрэ тIурытIу е щырыщу къыдэкIыурэ къызэдэфэу щытамэ, балетмейстерыщIэм зызыужьа нобэрейм и тепхъуэр лъэпкъ къафэхэм «триубгъуат». Абы фащэхэм нэгъуэщI теплъэ иритат - цIыхухъухэм цей, пщащэхэм бостей кIыхь ящыгъамэ, иджы хъыджэбзхэм я фащэр нэхъ кIэщIт, я щхьэм телъ IэлъэщIми лъэпкъым и хабзэ къигъэлъагъуэрт.
Апхуэдэ зэхъуэкIыныгъэхэм псори зэхуэдэу арэзы ищIакъым. ИтIанэми, Iэзэу гъэува къафэхэм щхьэж гупсэхуу еплъа нэужь, Гальпериным и лэжьыгъэр зэрыгъэщIэгъуэным зыми шэч къытрихьэжакъым.
Къапщтэмэ, аратэкъым Гальпериныр ткIийуэ зытет хабзэхэм я гъунэр, абы псом хуэмыдэу нэхъ къехъулIэхэм ящыщт къафэм и теплъэр лъэныкъуэ куэдкIэ зэрызэхиухуэнэфыр. Къафэм хэлъ гупсысэр зэрыкуум и нэщэнэт ар.
«Къафэ»-р гъэувыным балетмейстер куэд елэжьащ. Ауэ Григорий абыи щIэ гуэрхэр хилъхьэн хузэфIэкIат, и дахагъэри щIэращIагъэри нэхъ куууэ къызэрыщигъэлъэгъуэным елIалIэу. Къафэм и теплъэр къохъулIэн щхьэкIэ Iэпкълъэпкъым хэлъын хуей IэтIэлъатIагъэмрэ жанагъымрэ гу ялъригъатэрт балетмейстерым и къэфакIуэхэм. Адыгэ къафэр, ихъуэж къыхэмыхуэу, Григорий къигъэщIэращIэрт.
Апхуэдэ лъагъуныгъэ гъуазджэм хуищIат абы зэрыцIыкIу лъандэрэ. И адэ Юрий циркым и оркестрым и дирижерти, Гальперин нэхъыщIэр щIэх-щIэхыурэ актерхэм яхэплъэрт, унэм кIуэжа иужьи илъэгъуахэр езыми ищIыжыну тегушхуэрт.
Мыгувэу ар циркым и артист хъуащ - кIапсэм ирикIуэу Iэзэу къафэрт. Григорий къафэмкIэ Ленинград школым щеджащ, ардыдэм и оперэ театр цIыкIум щылэжьащ. ИужькIэ ар Свердловск макIуэ, хореографие училищэм классикэ къафэхэр щедж. ЕджапIэр къиухри, Гальпериныр оперэмрэ балетымкIэ Луначарскэм и цIэр зезыхьэ театрым щылэжьэу щIидзащ. Гупышхуэ зыхэхуам абы щегъэув и япэ къафэхэр. Куэд дэмыкIыу къэунэхуащ уэрэдымрэ къафэмкIэ Урал дзэ округым и ансамблыр. Абы ар и япэ балетмейстер мэхъу.
«Кадрильная пляска». Арат Григорий ансамблым и гъусэу япэу игъэува къафэм зэреджэр. Абдеж щегъэжьауэ ар а гъуазджэм зыIэпишэпащ, лъэпкъ къэфэкIэхэм къызэрымыкIуэу гъунэгъу хуэхъуащ. Зи хъэтI зиIэж унафэщI гумызагъэуи зыкъыщигъэлъэгъуащ абы мы ансамблым. Нэхъ иужьыIуэкIэ Ищхъэрэ цIыхубэ хорым абы утыку къыщрехьэ «Северный перепляс» къафэр. Ауэ урыс хореографием и налкъуту куэдым къалъытар «Люб-трава» къафэрщ, Омск цIыхубэ хорым зыщелэжьарщ. «Акъыл жан зыхэлъ къафэщ!... Аращ хореографие хъужыр!», - жиIат Моисеев Игорь а къафэр щилъэгъуам.
Гальперин Григорий Къэбэрдей-Балъкъэрым зэрыщылэжьа илъэсхэри купщIафIэт. Зэпымыууэ зригъэужьащ абы игъэув къафэхэм. Куэдым яфIэфIу щытащ Къэбэрдей-Балъкъэрым уэрэдымрэ къафэмкIэ и ансамблым щигъэува «ЛIыжьхэр», «Фермэм» гушыIэ къафэхэр. Къафэ къудей мыхъуу ахэр спектакль щIыкIэм тетт. Аракъэ гъуазджэ нэс жыхуаIэр?!
ИкъукIэ лэжьыгъэшхуэ иригъэкIуэкIащ Гальпериным. Абы и нэIэм щIэту къэфакIуэ ахъырзэман къахэщIыкIат КъБР-м щIыхь зиIэ и артист Алэкъей Мухьэмэд, Къуэдзокъуэ Людмилэ, Чэрты Лидэ сымэ, нэгъуэщI куэдми.
