Лэжьыгъэхэр зыпагъэуркъым

Урысейм и щIыналъэхэм щагъэзащIэ «ЩIыуэпс» къэрал пэхуэщIэм и сэбэпкIэ зэфIагъэувэж хэщIыныгъэ ин зыгъуэта псэущхьэхэмрэ къуалэхэмрэ я бжыгъэр. Ди республикэр къапщтэмэ, бгъэхэр нэхъ мащIэ зэрыхъуар нэрылъагъущ. Нэхъапэхэм ахэр шыгъуэгу хадэхэм ящхьэщытт, цIыхур зыкъуэхуамэ, джэдкъаз бынхэм яхэуэу. ХъупIэхэри арат - къуршыбгъэ инхэм къыпакIухьыртэкъым Iэщ цIыкIухэм. Апхуэдэ хэщIыныгъэхэр къадэкIуащ щIыуэпсым игъуэт зэхъуэкIыныгъэхэми  цIыхум абы ирих лейхэми.

ЩIэныгъэлIхэр Iуащхьэмахуэ лъапэ и мэзылъэ, къуршылъэ щIыпIэхэм зэрыщылэжьам ипэкIи и гугъу фхуэтщIат, мы илъэсми а лэжьыгъэхэм пащащ икIи щIэныгъэлIхэм зэрыжаIамкIэ, нэрылъагъуу Iуэхур ипэкIэ мэкIуатэ. Къапщтэмэ, нобэ абыхэм ящIэ Къэбэрдей-Балъкъэрым, Осетие Ищхъэрэ-Аланием я бгылъэхэмрэ мэзхэмрэ щыпсэу бгъэ лIэужьыгъуэхэмрэ абыхэм я бжыгъэр зыхуэдизымрэ. Апхуэдэ къэхутэныгъэхэр абыхэм къащегъэпсынщIэ къуалэбзухэр здэщыIэм къыщыщIэдзауэ абыхэм яшхымкIэ иухыжу къэзыгъэлъагъуэ, тезых Iэмэпсымэ ехьэжьахэм. Нэхъапэхэм щIэныгъэлIхэр илъэс псокIэ къемыкIуалIэу абыхэм яужьым иту щытащ, иджы езыхэр хэмытми, ахэр зыхуеину хъыбархэр Iэмэпсымэхэм зэхуахьэс. «Экологие» пэхуэщIэр къызэрыхалъхьэу, ар ядиIыгъащ Урысейм и «Роснефть» IуэхущIапIэм. Абы и мылъкукIэ щIэныгъэлIхэмрэ лэжьыгъэ IуэхукIэ гъуэгу теувэ гупхэмрэ къызэригъэпэщащ я щыгъынхэм къыщыщIэдзауэ зыхуеину псомкIи.

Лэжьыгъэхэр зэпагъэунукъым, Кавказым и щIыналъэхэм бгъэхэр щыбэгъуэжыху. Мы зэманым нэхъыбэ хъужу хуежьащ къуршыбгъэхэр, къашыргъэхэр, хъупIэбгъэхэр.

Шэрэдж Дисэ.