АдыгэбзэкIэ къыдопсалъэ

Франджы тхакIуэ Антуан де Сент-Экзюпери и «Пащтыхьыкъуэ ЦIыкIу»-р («Маленький принц») зэман псоми пэджэж тхылъщ. Абы къыщыбгъуэтынущ махуэ къэс дызрихьэлIэ упщIэ куэдым я жэуапхэр. Гупсысэ нэхъыщхьэу абы щыпхрышар лъагъуныгъэмрэ ныбжьэгъугъэмрэ я мыхьэнэр нэсу къызыгурымыIуам пщIэрэ дзыхьрэ щытепщэ дунейми къызэрыгуэкI цIыхухэми я дежи бгъэдыхьэкIэ тэмэм зэрахуимыIэфынурщ. «Нэхъыщхьэ дыдэр нэкIэ къыхуэлъагъунукъым, - жеIэ Экзюпери, - набдзэгубдзаплъэр, жыжьаплъэр гум и закъуэщ…» ТхакIуэм и псалъэхэм щыхьэт тохъуэ и IэдакъэщIэкIри.

Философие гупсысэ шэщIа зыщIэлъ «Пащтыхьыкъуэ ЦIыкIу» таурыхъыр дунейм къытехьауэ щытащ илъэс 80 ипэкIэ - 1943 гъэм и мэлыжьыхьым ар Нью-Йорк къыщыдэкIащ. Абы лъандэрэ ар зэрадзэкIащ бзэ 537-кIэ. УрысыбзэкIэ ар япэу дунейм къытехьауэ щытащ 1959 гъэм. Иджыблагъэ ар адыгэбзэкIи балъкъэрыбзэкIи къыщыдэкIащ Котляровхэ Мариерэ Викторрэ я тхылъ тедзапIэм. «Пащтыхьыкъуэ ЦIыкIу»-р адыгэбзэкIэ къигъэпсэлъащ Къармэ Iэсият, балъкъэрыбзэкIэ - Геккиев Магомет.

«Тхыгъэр адыгэбзэкIи балъкъэрыбзэкIи зэрадзэкIа нэужь, бзэщIэныгъэлIхэм я пащхьэ итлъхьащ. Абыхэм къыхагъэщащ Къармэри Геккиеври Iуэхум зэрехъулIар, зэщхьэщыкIыныгъэ лъэпкъ ямыIэу, купщIэр мыкIуэду фIы дыдэу зэрызэрадзэкIар», - жиIащ Котляров Виктор. Мыбдежым сэри къыщыхэзгъэщыну сыхуейт усакIуэ Къармэ Iэсият егъэлеяуэ адыгэбзэ дахэкIэ «Пащтыхьыкъуэ ЦIыкIур» къызэригъэпсэлъар. Iэсият мыр и япэ зэдзэкIыгъэкъым, куэдым зэращIэщи, ар а Iуэхум хуэIэкIуэлъакIуэщ. А бзылъхугъэм и бзэм и шэрыуагъым, къулеягъым щыгъуазэхэм ар абы зэрыпэлъэщынум шэч къытрахьэну къыщIэкIынтэкъым, ауэ сэ, Къармэм Iурылъ адыгэбзэм и куууагъыр здынэсыр сщIэ пэтми, тIэкIу сыкъигъэгузэват, и IэфIыр къригъэблыIуэрэ, «щIикъуантIэIуэмэ» жысIэри. Си гузавэм и щхьэусыгъуэ нэхъыщхьэр зыхуэгъэзар сабийхэрт - а цIыкIухэм я бзэр имылъахъэу къеджэфу щытын хуейти. АрщхьэкIэ Iэсият и Iэзагъэр текIуащ: «Пащтыхьыкъуэ ЦIыкIур» абы къигъэпсэлъащ адыгэбзэ къабзэкIэ, лантIэкIэ, шэрыуэкIэ. Аращи, уи гум жьы дригъэхуу укъоджэ тхылъым.

Тхылъым таурыхъ цIэрыIуэр бзитIкIэ къыщыхьащ - лъэпкъыбзэкIи урысыбзэкIи. Ар гъэщIэрэщIащ тхыгъэр зи IэдакъэщIэкIым ищIа сурэтхэмкIэ.