Блашэ Темырлан ШОС-м и чемпионщ

Урысей Федерацэм КикбоксингымкIэ и федерацэм иджыблагъэ зэхилъхьэжащ жэпуэгъуэм и 25 - 29-хэм Мэзкуу областым и Раменскэ къалэм щекIуэкIа, ШОС-м хэт къэралхэм я чемпионат зэIухамрэ пашэныгъэр абы къыщыхьынымкIэ екIуэкIа зэIущIэхэмрэ къарикIуахэр.

Чемпионатым хэтащ къэрал 16-м я спортсмену 700-м щIигъу икIи ахэр щIэбэнащ «К1», «фулл-контакт», «лоу-кик», «лайт-контакт», «поинтфайтинг», «щхьэзакъуэ зэпеуэ» лIэужьыгъуэхэмкIэ ягъэува   саугъэтхэм.

Урысей Федерацэм и командэм зэхьэзэхуэм япэ увыпIэр щиубыдащ. ЕтIуанэ хъуащ Белоруссием и спортсменхэр, ещанэр Индием и командэрщ.

Ди гуапэ зэрыхъущи, Урысей Федерацэм и командэм хэту зэхьэзэхуэм зыкъыщагъэлъэгъуащ Къэбэрдей-Балъкъэрым щыщ щIалэхэми.

Килограмм 51-рэ зи хьэлъагъхэм я деж «лоу-кик» лIэужьыгъуэмкIэ зэхьэзэхуахэм япэ увыпIэр къыщихьащ Индрокъуэ Алан. Апхуэдэ хьэлъагъ дыдэ зиIэхэм, ауэ балигъхэм я деж етIуанэ щыхъуащ Гъубжокъуэ Рустам.

Зэхьэзэхуэхэм я кIэухыу кикбоксингымкIэ профессионалхэм ирагъэкIуэкIа  зэпеуэм «фулл-контакт» лIэужьыгъуэмкIэ япэ увыпIэр къыщихьащ Блашэ Темырлан. Судьяхэм зэакъылэгъуу текIуэныгъэр адыгэ щIалэм иратащ, абы къыпэщIэта Калачян Мнацакан етIуанэ увыпIэм ягъакIуэри. Апхуэдэ щIыкIэкIи, ШОС-м хэт къэралхэм кикбоксингымкIэ я чемпион хъуащ Блашэр. Темырлан щызауэр килограмм 60 зи хьэлъагъхэм я дежщ.

Къыхэдгъэщынщи, Блашэм мыр и япэ ехъулIэныгъэкъым. 2021 гъэм Урысей Федерацэми Европэми пашэныгъэр къыщыхьыным хуэунэтIауэ екIуэкIа зэхьэзэхуэхэм щытекIуащ, 2022 гъэм Урысейм и Кубокыр къихьащ Темырлан. УФ-м спортымкIэ и мастерщ, къэралым и командэ къыхэхам хэтщ.

Зэпеуэм щызэуа ди щIалэхэм и тренерыр Сасыкъ Анзорщ.