КъыхэкIыр нэхъыбэ мэхъу

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Урысейм и Федеральнэ налог къулыкъущIапIэм и управленэу КъБР-м щыIэм и унафэщI ГубэщIыкI Аслъэн.Ахэр тепсэлъыхьащ мы илъэсым и блэкIа мазитхум налогхэр зэрызэхуахьэсам, ар зэрыхуагъэфэщам нэхърэ нэхъыбэу къызэрыхэкIам. 

Къапщтэмэ, 2024 гъэм и щIышылэ - накъыгъэ мазэхэм Къэбэрдей-Балъкъэрым и бюджет зэхэлъым сом меларди 8,8-рэ къыхэхъуащ, ар блэкIа илъэсым и апхуэдэ пIалъэм еплъытмэ, сом мелард 1,2-кIэ нэхъыбэщ (процент 16,1-рэ). Процент 14,2-кIэ е сом мелуан 855-кIэ нэхъыбэ хъуащ республикэ бюджетым налогыу халъхьар. Бюджетым щымыщ фондхэм яIа хэхъуэр хуэдэ 1,5-кIэ нэхъыбэ хъуащ.
Нэхъ еужьэрэкIыу зызыужьыр туризм IэнатIэращ (хэхъуэр - процент 151,4-рэ), шхапIэхэр (151,1%), ухуэныгъэр (148,9%), сату Iуэхур (134,1%), мэкъумэш IэнатIэр (130,8%).
КIуэкIуэ Казбек къыхигъэщащ ар УФ-м и Президент Путин Владимир иригъэкIуэкI экономикэ политикэм, лъэпкъ, федеральнэ, щIыналъэ проектхэмрэ программэхэмрэ зэрагъэзащIэм къыпэкIуа IуэхуфIыу зэрыщытыр. «КъищынэмыщIауэ, апхуэдэ хэхъуэхэр щIыдиIэр налог зытхэм дазэрыдэлажьэ щIыкIэм зэрызедгъэхъуэжарщ, иджырей технологиехэм я      Iэмалхэр къызэрагъэсэбэпырщ, налог зытхэмрэ ар къы­хэзыххэмрэ зэгурыIуэу зэрызэдэлажьэрщ», - жиIащ КIуэ-кIуэм.
Къэбгъэлъагъуэмэ, мы илъэсым и пэщIэдзэм налог зыт-хэм Iуэхур тэмэму къызэрыгурагъаIуэм къыхэкIыу, налог мардэ хэхам тету къыхэкIхар процент 37,3-кIэ нэхъыбэ хъуащ.
КъБР-м и Iэтащхьэм къыхигъэщащ республикэ бюджетым къыхэхъуэ налогыр гъэбэгъуэным, ар зытхэм къэралым яхуи­щIэ Iуэхутхьэбзэхэр егъэфIэкIуэным унафэщIхэр дяпэкIи иужь зэритынур.