УФ-м и Президент Путин Владимир республикэм щохьэщIэ

    Нобэ, шыщхьэуIум и 20-м, Къэбэрдей-Балъкъэрым къеблэгъащ Урысей Федерацэм и Президент Путин Владимир. КъБР-м и Iэтащхьэ КIуэкIуэ Казбекрэ  хьэщIэ лъапIэмрэ лэжьыгъэ IуэхукIэ зэIущIэ ирагъэкIуэкIащ. 

   УФ-м и Президентыр щыIащ  Джэрмэншык дэт «Агро 07»  хадэгъэкI IуэхущIапIэм. Абы и унафэщI Тумэ Рашид Президентыр щыгъуазэ ищIащ пхъэщхьэмыщхьэу кърахьэлIэм и бжыгъэмрэ абы зэрелэжь щIыкIэхэмрэ. Путин Владимир и псалъэм къыщыхигъэщащ ирагъэлъэгъуахэр игу зэрырихьар, Къэбэрдей-Балъкъэрым щрагъэкIуэкI лэжьыгъэм и мыхьэнэм и инагъым и гугъу ищIащ. «Республикэр зэрыпсэур, абы щыпсэу цIыхубэм и зэфIэкIыр здынэсыр, ахэр зэрыпсэу щIыкIэр зэзгъэщIэну Iэмал сиIэн папщIэ  сыкъебгъэблэгъати, иджы а псор зэрыслъэгъуар си гуапэщ. Псом япэ мэкъумэшым щызэвгъэхъулIахэм папщIэ сынывэхъуэхъуну сыхуейщ. Адрей щIыналъэхэр къывдэплъеину, щапхъэ къыфтрахыну яхуэфащэщ, адрейхэр къэнауэ, гъавэр 8-кIэ зэрыбэгъуам фIыкIэ укъегъэуIэбжь. Нэхъыщхьэращи, пхъэщхьэмыщхьэхэмрэ хадэхэкIхэмрэ иджырей IэмэпсымэхэмкIэ фолэжь, абы и фIыгъэкIэ ахэр нэхъыфIуи хъума мэхъу», - жиIащ Путин Владимир КIуэкIуэ Казбек щыхуэза зэIущIэм. 

  «Псом япэ ди щIыналъэм укъызэреблэгъам щхьэкIэ фIыщIэшхуэ пхузощI, - жиIащ КIуэкIуэ Казбек. - Сыт и лъэныкъуэкIи зыкъызэрытщIэбгъакъуэри, ди лэжьыгъэм Iуэху пщIыуэ щыгъуазэ зэрызыпщIари ди гуапэщ». 

    КIуэкIуэ Казбек Президентыр щыгъуазэ ищIащ дызэрыт илъэсым и япэ Iыхьэм зэфIагъэкIа лэжьыгъэмрэ ар къэзыгъэлъагъуэ бжыгъэ нагъыщэхэмрэ. Псалъэм папщIэ, промышленнэ хозяйствэм зыхуигъэувыжа къалэнхэр проценти  115,9-рэ игъэзэщIакIэщ,  мэкъумэшым а бжыгъэр проценти 103,9-м нос, ухуэныгъэ лэжьыгъэхэм - проценти 109,8-м. Инвестицэхэм я бжыгъэр сом мелард 19,6-м ноблагъэ. Илъэс блэкIам еплъытмэ, ар проценти 103-м фIокI. Илъэсым и япэ Iыхьэм республикэм зыщагъэпсэхуащ турист мин 794-м.  

      Путин Владимир республикэм и зыужьыныгъэр, абы щекIуэкI лэжьыгъэр зэрыт щытыкIэм арэзы къищIащ.