Парламентым щагъэлъапIэ

Хабзэ дахэ зэрыхъуауэ, ­КъБР-м и Парламентым Илъэ­сы­щIэм ирихьэлIэу щагъэ­лъэ­пIащ лэжьыгъэкIэ ехъу­лIэ­ны­гъэш­хуэ зиIэхэр. 

ЗэIущIэхэр къыщызэIуихым, республикэм и хабзэубзы­ху IуэхущIапIэм и УнафэщI Егоровэ Татьянэ къыхигъэщащ Къэ­бэрдей-Балъкъэрым и про­мыш­леннос­тыр, мэкъумэшыр, туризмэр, гъуэ­гу IэнатIэр кIуэ пэтми зэре­фIакIуэм гу лъумы­тэнкIэ Iэмал зэримыIэр, абы пэшым щIэс дэтхэнэми и гуа­щIэ хэлъу къызэрилъытэр.
- Ди щIыналъэм и зыужьыныгъэм теухуа лэжьыгъэшхуэ иужь­рей илъэсхэм йокIуэкI, Iэмалы­щIэхэр ди гъащIэм куэду къыхохьэ. Хьэрычэт Iуэху мащIэмрэ ­ку­ры­тымрэ заубгъуащ. Ехъу­лIэ­ныгъэхэр щыдиIэщ экономикэм, щIыналъэм езым и хэхъуэ­хэр нэхъыбэ зэрыхъуам и фIыгъэкIэ, цIыхухэм я гъащIэр нэхъыфI зыщIыну Iуэху куэд зэ­фIокI - школыщIэхэр, сыма­джэ­щ­хэр, поликлиникэхэр, щэн­хабзэмкIэ Iуэ­ху­щIапIэхэр ухуэ­ныр, щыIэхэр ­зыхуей хуэгъэзэныр, щIыпIэхэр зэIузэпэщ щIыныр, нэгъуэщI­хэри, - жиIащ Егоровэ Татьянэ. - Нобэ къедгъэблэгъахэр а ехъулIэ­ныгъэхэм холIыфIыхь, къыхэзгъэщыну сыхуейт дзэ Iуэху хэхам зи къалэн щызыгъэзащIэу къэзыгъэзэжахэри абыхэм зэрахэтыр. Гулъытэншэ тщIакъым ди спорт­смен ныбжьыщIэхэри, дунейпсо мыхьэнэ зиIэ зэхьэзэхуэхэр къэ­зыхьыфахэр. Абыхэм ди республикэм и мызакъуэу, къэрал псом я пщIэр яIэтащ. Къыхэгъэ­щыпхъэщ, зи гугъу сщIы спор­тс­менхэр псори Урысей Федерацэм щIыхь зиIэ и тренер, КъБР-м и Парламентым и депутат Ахъмэт Амир и гъэсэну зэрыщытыр. Дэтхэнэ зыми фIыщIэ фхудощI, фи IэщIагъэм, Хэкум фыхуэпэжу, вгъэлъапIэу IэнатIэ мытыншхэм фызэрыпэрытым щхьэкIэ.
КъБР-м и Парламентым и Уна­фэщIыр пэшым щIэсхэм ехъуэхъуащ илъэсыщIэм ехъулIэныгъэщIэхэр яIэну, узыншэну, бэIу­тIэIуншэу езыхэри я Iыхьлыхэри псэуну. 
КъБР-м и Парламентым а махуэм щагъэлъэпIащ дохутырхэр, егъэджакIуэхэр, щэнхабзэм, хъы­­барегъащIэ IэнатIэхэм, спортым я лэжьакIуэхэр, къалэ, къуа­жэ зэмылIэужьыгъуэхэм я Iэтащхьэхэр. 
Хабзэубзыху IуэхущIапIэм и ЩIыхь тхылъыр зыхуагъэфэщахэм ящыщу я цIэ къиIуапхъэу къы­щIэкIынщ «Хэкум и хъу­ма­кIуэхэр» щIыналъэ фондым и уна­фэщIым и къуэдзэхэу Мзо­къуэ Тембулэт, ПщыхьэщIэ Зульфия, Шормэн Алим сымэ, IуэхущIа­пIэм и щIыналъэ коорденаторхэу Къазий Заремэ, Пщы­хьэ­щIэ Ахь­мэд, Федоренкэ Алек­сандр. Ахэр зэпымыууэ ядоIэ­пыкъу дзэ Iуэху хэхам щыIэхэмрэ абыхэм я унагъуэхэмрэ, жыджэру республикэм и гъащIэм хэтщ.

«Къэбэрдей-Балъкъэр» телеканалым хуагъэфэща ЩIыхь тхы­лъыр иратыжащ телевиденэмрэ радиомрэ я унафэщI Ко­наревэ Наталье. КъищынэмыщIауэ, апхуэдэ гулъытэ хуащIащ «Къэбэрдей-Балъкъэр» телеканалым и лэжьакIуэхэу Гемуевэ Марзият, Жылокъуэ Люсаннэ, Карповский Владимир сыми. 

Щэнхабзэм хэлъхьэныгъэу хуащIыр къалъытэри, КъБР-м и ­Парламентым и ЩIыхь тхылъыр хуагъэфэщащ «Тэрч къэзакъ­-хэр» къэрал IуэрыIуатэ ансамблым и артист-уэрэджыIакIуэ нэхъыжь, КъБР-м щIыхь зиIэ и артист Ракитинэ Иринэ, КъБР-м и Парламентым ЩэнхабзэмкIэ, жылагъуэм зегъэужьынымрэ ­хъыбарегъащIэ IуэхухэмкIэ и комитетым и унафэщI, КъБР-м и цIыхубэ артист Текуев Амырбий.
Апхуэдэуи ягъэлъэпIащ 2025 гъэм тхэквандомкIэ Европэм ­чемпион щыхъуа, Урысейм и гуп къыхэхахэр спортым щыхуа­гъэхьэзыр IуэхущIапIэм и спортсмен-инструктор Багъ Идар, ­КъБР-м и гуп къыхэхахэр спортым щыхуагъэхьэзыр и IуэхущIапIэм и спортсмен, мы гъэм тхэквандомкIэ цIыхухъухэми цIыхубзхэми я дунейпсо зэхьэзэхуэм дыжьын медалыр къыщызыхьа, илъэс 21-м зи ныбжьыр фIэмыкIахэм я дунейпсо зэпеуэм щытекIуа, 2025 гъэм атлет нэхъыфI дыдэу къалъыта Бекъул Миланэ, Къэбэрдей-­Балъкъэр гуманитар-техникэ колледжым щIэс, зэ­хэзымыххэм ­папщIэ 2025 гъэм тхэквандомкIэ ирагъэкIуэкIа ­Сурдлимп джэгу­хэм текIуэныгъэ къыщызыхьа Сатушы Мадинэ, нэ­гъуэщIхэри.