Гъуэныбэ Iэуес дуней псом тIэуней щытокIуэ

26 октября, 2024 - 07:32

Албанием и къалащхьэ Тиранэ къикIыу хъыбар гуапэ иджыблагъэ къытIэрыхьащ. Алыдж-урым бэнэкIэмкIэ пашэныгъэр къэхьыным теухуауэ абы щекIуэкIа дунейпсо зэхьэзэхуэм Къэбэрдей-Балъкъэрым и бэнакIуэ Гъуэныбэ ­Iэуес япэ увыпIэр щиубыдащ.

Урысей Федерацэм и командэ къыхэхам хэту килограмм ­87-рэ зи хьэлъагъхэм я деж щыбанэ ди щIалэр зэпеуэм и кIэух зэIущIэм щыхуэзащ Нидерландым щыщ Стеркенбург Марсель икIи и IэзагъкIэ фIыуэ ефIэкIыу дыщэ медалыр абы къыфIихьащ. Апхуэдэ щIыкIэкIи, зи ныбжьыр илъэс 23-м щIимыгъуахэм я зэ­пеуэу, иужьрей илъэситIым екIуэкIам Гъуэныбэр зэкIэлъыпыту тIэуней щытекIуащ. 
Къэбэрдей-Балъкъэрым и Iэтащхьэ КIуэкIуэ Казбек гулъы­тэншэу къигъэнакъым ди щIалэм и ехъулIэныгъэр: «Сохъуэхъу Гъуэныбэ Iэуесрэ ар зи гъэсэнхэмрэ, текIуэныгъэщIэхэмрэ зэфIэкI инхэмрэ спортым щаIэну си гуапэщ», - щитхащ езым и ­телеграм-каналым республикэм и лIыщхьэм. 

ХЬЭЩЫКЪУЕЙ Олег.
  • 44 просмотра
Поделиться:

Читать также:

07.05.2025 - 12:53 → ТIуми медаль зырыз
30.04.2025 - 16:50 → Монголием кIуэнухэри яхэтщ
16.04.2025 - 15:29 → Чемпионым и саугъэтыр къахь
16.04.2025 - 13:23 → Медалхэр зэщIакъуэж
13.04.2025 - 12:08 → Аслъэнбэч фIыщIэ хуращI