Дзэ Iуэху хэхам щыIэхэм я дэIэпыкъуэгъу

«Искож» хьэблэм щаухуа, Щэнхабзэ зыужьыныгъэмкIэ центрым щекIуэкIащ «Дыдейхэр губгъуэм къиднэркъым» зыфIаща концертыр. Ар къызэригъэпэщащ дзэ Iуэху хэхам (СВО) и ветеранхэм я зэгухьэныгъэм.

Концертыр траухуащ дзэ Iуэху хэхам щыIэ лIыхъужьхэм, абыхэм къулыкъу къадэзыщIа, зи къалэн зыгъэзащIэу хэкIуэда щIалэхэм.      Центрым и пэIущIэ пэшым щылэжьащ «Волонтерская рота Боевого братства», «Молодая гвардия Единой России», «Движение Сила в правде» зэгухьэныгъэхэм я лIыкIуэхэр. Хуейхэр хэтащ дзэ Iуэху хэхам щыIэхэм папщIэ Iэпщэхъу гъэхьэзырыным, хъархэр зэIущэным теухуа мастер-классхэм.

«Волонтёрская рота» штабым и унафэщIым и къуэдзэ Волков Валерэ къыхигъэщащ Хэку лъагъуныгъэм теухуа зэхыхьэ куэдым зэрыхэтыр, дзэ Iуэху хэхам  хэкIуэдахэм я фэеплъыр яхъумэну, нэхъыжьхэм пщIэ хуащIыным мыхьэнэшхуэ зэриIэм щIалэгъуалэр щIапIыкIыну зэрамурадыр.

Щэнхабзэ зыужьыныгъэмкIэ центрымрэ Налшык ГъуазджэхэмкIэ и сабий школ №1-мрэ я артистхэм, Будённовск щыщу ирагъэблэгъа «Растрелянный город» гупым ягъэдэхащ пшыхьыр. СВО-м хэкIуэда лIыхъужьхэм я адэ-анэхэм фIыщIэ тхылъхэмрэ медалхэмрэ иратыжащ а махуэм.

КъыжыIапхъэщ дзэ Iуэху хэхам и ветеранхэм я щIыналъэ зэгухьэныгъэр мазитI ипэкIэ къызэрызэрагъэпэщар икIи мы зэхыхьэр япэу зэраублар, дяпэкIи абы къыпащэну зэрамурадыр.