Къалэнхэм полъэщ

2 июня, 2025 - 09:26
Урысей Федерацэм Мэкъумэш хозяйствэмкIэ и министерствэм илъэс блэкIам иригъэкIуэкIа лэжьыгъэхэм къарикIуахэмрэ 2025 гъэм къапэщылъ къалэнхэмрэ щытепсэлъыхьащ иджыблагъэ Мэзкуу щызэхаша зэIущIэм. Абы хэтащ УФ-м и Правительствэм и УнафэщIым и къуэдзэ Патрушев Дмитрий, мэкъумэш хозяйствэмкIэ министр Лут Оксанэ, къэралым и щIыналъэхэм я унафэщIхэр, Федеральнэ Зэхуэсымрэ Къэрал Думэмрэ, министерствэхэмрэ ведомствэхэмрэ, жылагъуэ зэгухьэныгъэхэмрэ еджапIэхэмрэ я лIыкIуэхэр, хьэрычэтыщIэхэр. 
Къэбэрдей-Балъкъэрым къыбгъэдэкIыу зэIущIэм и лэжьыгъэм хэтащ республикэм мэкъумэш хозяйствэмкIэ и министр Сыжажэ Хьэсэн. 
ВидеоIэмал зэпыщIэныгъэхэр къигъэсэбэпри, зэхуэсым кърихьэлIахэм захуигъэзащ УФ-м и Правительствэм и УнафэщI Мишустин Михаил икIи жиIащ къэралым и мэкъумэш-промышленнэ комплексыр лъэпкъ экономикэм хэхъуэ къезытхэм зэрахэтыр, ерыскъымкIэ къэралым и шынагъуэншагъэр къызэрызэригъэпэщыр, хамэ къэралхэм жыджэру зэрадэлажьэр. 
Патрушев Дмитрий къыщыпсэлъам жиIащ Урысей Федерацэм и АПК-м блэкIа илъэсыр хэхъуэ иIэу зэриухар. Псалъэм къыдэкIуэу, къэралым и мэкъумэшыщIэхэм гъавэу псори зэхэту тонн мелуани I30-м нэблагъэ кърахьэлIэжащ. Iэщ гъэхъун IэнатIэм лымкIи гъэшымкIи хэхъуэ иIащ. ЕрыскъыхэкIым теухуауэ Патрушевым къыхигъэщащ промышленнэ индексым абыкIэ илъэс блэкIам проценти I03,5-рэ, псыхэкIхэмкIэ - проценти I09-м щIигъу зэрыхъуахэр.
Лут Оксанэ нэхъыбэу зэтригъэщIар ерыскъымкIэ къэралым и шынагъуэншагъэр къызэгъэпэщынымкIэ къапэщылъа къалэнхэр къанэ щымыIэу зэрагъэзэщIарщ. ЖыпIэнурамэ, гъавэмкIэ, лымкIэ, бдзэжьеймкIэ, дагъэ щIэхуамкIэ, фошыгъумкIэ ди цIыхухэр зрикъун зэрыдиIар, уеблэмэ языныкъуэхэмкIэ фIыуэ зэрыщIигъуар. ГъэшымкIэ, кIэртIофымкIэ, хадэхэкIхэмкIэ зэхуагъэувыжа къалэнхэм пэгъунэгъу хъуащ. 
Къэбэрдей-Балъкъэрыр и гугъу тщIымэ, республикэм и АПК-ми ехъулIэныгъэхэр къигъэлъэгъуащ нэгъабэ. Мэкъумэш продукцэу къыщIигъэкIам и индексыр проценти I06,6-рэ хъуащ, ахъшэкIэ къапщтэмэ, сом меларди II0,7-рэ и уасэ къалъэщащ. Абы нэмыщI, псори зэхэту къыщIагъэкIа продукцэм и процент 34-р мэкъумэш IуэхущIапIэхэм, процент 43,8-р - унагъуэхэм, процент 22,2-р - фермерхэмрэ уней IуэхущIапIэхэмрэ къалъос. 
ХЬЭЩЫКЪУЕЙ Олег.
  • 71 просмотр
Поделиться: