Мырзэкъан Азэмэт Америкэми щытокIуэ

«UFC 316» зэхьэзэхуэм хыхьэ зэIущIэу США-м и Нью-Джерси штатым щыIэ Ньюарк къалэм щекIуэкIам щытекIуащ Къэбэрдей-Балъкъэрым щыщ зэуакIуэ лъэщ Мырзэкъан Азэмэт. 

Адыгэ щIалэм къыпэщIэтащ Бразилием и спортсмен Рибейрэ Брендсон, ауэ зэIущIэм и япэ раундым ар нокауткIэ абы къыфIихьащ. Апхуэдэ щIыкIэкIи, Мырзэкъаным и текIуэныгъэхэм пищащ: иджы ММА-м 15-рэ, UFC-м - 5-рэ щытекIуащ, абыхэм ящыщу 11-м зэхьэзэхуэм хухаха ­зэманхэр и кIэм нимыгъэсу. Езыр зэи къыхагъэщIакъым. 
Абы нэмыщI, Азэмэт зэкIэлъыпыту къихьа текIуэныгъэхэм я бжыгъэм­-кIэ (5) етIуанэ увыпIэм кIуащ, куржы зэуакIуэ лъэщ Топурие Илие лъэщIы­хьэжу. Япэм щыт Олберг Карлос зэкIэлъхьэужьу 8-рэ текIуащ, 5-р нокауткIэ къихьащ. Рибейрэ и зэIущIэхэр зэкIэлъыпыту тIэу къыхуэхьауэ аращ, ещанэм ар нигъэсакъым ди къэбэрдей щIалэм.
«ЦIыху дапщэ къыспэщIамыгъэувэу щытми, псори хэзгъэщIэну гуш­хуэныгъэ схэлъщ. Нобэ си хьэрхуэрэгъуам фIыщIэ хузощI. РаундитхукIэ сызэуэну, турнирым и зэIущIэ нэхъыщхьэм сыхэтыну сыхуейщ», - яжриIащ журналистхэм Мырзэкъаным. 
Фигу къэдгъэкIыжынщи, Азэмэт зауэ Iэпщэрыбанэ спортымкIэ дуней псом и абсолютнэ чемпионщ, а спорт лIэжьыгъуэмкIэ УФ-м щIыхь зиIэ и мастерщ, «Brave» лигэм щытекIуащ.