Ухуэныгъэхэр зэрекIуэкIыр къапщытэ

18 ноября, 2025 - 12:21
УФ-м и Правительствэм и вице-премьер Чернышенкэ Дмитрий зыхэта зэIущIэр теухуауэ щытащ къэралым щIэныгъэ щрагъэгъуэт IуэхущIапIэхэр щыухуэнымрэ щыIэхэр къэгъэщIэрэщIэжынымрэ ехьэлIауэ мы гъэм ирагъэкIуэкI лэжьыгъэхэм. Абы щытепсэлъыхьащ дызэрыт илъэсым зыхуагъэувыжа пIалъэм тету ахэр зэфIэгъэкIа хъунымкIэ щыIэ Iэмалхэмрэ абыхэм языныкъуэр етIанэгъэ ягъэIэпхъуэнкIэ шынагъуэу халъагъуэхэмрэ. 
ЗэIущIэм наIуэ къыщащIа планым къызэрыхэщымкIэ, 2025 гъэм школу, сабий саду, щIэныгъэ нэхъыщхьэрэ курытрэ щрагъэгъуэт еджапIэу зы минрэ ныкъуэм щIигъур къызыхуэтыншэу зэрагъэпэщыжыну, ухуэныгъэщIэу 58-рэ ятыну щытащ. Ахэр щызэфIэкIынум ехьэлIауэ пIалъэ ягъэувахэм щхьэкIэ къэмынэу, лэжьыгъэхэр мы гъэм къыщызэтеувыIэнкIэ шынагъуэ зыхалъагъуэ объекту 28-м я спискэр УФ-м ЕгъэджэныгъэмкIэ и министерствэм зэхигъэуващ. 
  Чернышенкэ Дмитрий къыхигъэщащ пэхуэщIэхэр зэрагъэзащIэр щIыналъэхэм я унафэщIхэм я нэIэ щIагъэтын зэрыхуейр. «Я Iуэхухэр зыIутыр къыджаIэ къудей мыхъуу, щIыналъэхэм я Iэтащхьэхэм я къалэнщ ухуэныгъэхэр зи пщэрылъхэм унафэ быдэхэр хуащIыну, ахэр зэрагъэзащIэм ткIийуэ кIэлъыплъыну, лэжьыгъэхэр зэрекIуэкIыр щIэмычэу къапщытэну, ныкъусаныгъэ гуэрхэр къыкъуэкI хъумэ, щыIэ пIалъэхэм къриубыдэу ахэр ягъэзэкIуэжын хуэдэу», - жиIащ УФ-м и вице-премьерым. 
ЗэIущIэм къыщыхагъэщащ языныкъуэ ухуэныгъэхэм ехьэлIауэ ныкъусаныгъэхэр зэрыщыIэр. Псалъэм папщIэ, курыт еджапIэщIэу яухуэхэм ящыщу 77-рэ, къызыхуэтыншэу зэрагъэпэщыж объектхэм ящыщу 55-рэ дызыхуэкIуэ илъэсым ягъэIэпхъуащ. ИпэIуэкIэ щIыналъэхэм хъыбар ирагъэщIауэ щытащ мы гъэм и фокIадэм иужькIэ ныкъусаныгъэхэр здэщыIэ, щыIэ пIалъэхэм къыкIэрыху ухуэныгъэхэр етIанэгъэ ягъэIэпхъуэ зэрымыхъунур. Я лэжьыгъэхэм зэрыпэмылъэщыр щIэзыхъумэну хущIэкъуа щIыналъэхэри щыIэщ. 
УФ-м егъэджэныгъэмкIэ и министр Кравцов Сергей къыхигъэщащ егъэджэныгъэм епха ухуэныгъэхэм ехьэлIауэ щIыналъэхэм хуагъэува пIалъэхэр зыгъэIэпхъуэхэм, лэжьыгъэхэр и чэзум зымыгъэзащIэхэм илъэс къакIуэ хуаутIыпщыну ахъшэм зэрыкIэрачынур.
Дызэрыт илъэсым зэрыщIидзэрэ Къэбэрдей-Балъкъэрым и курыт еджапIэу 10-м я бжэхэр япэу къызэIуахащ, абыхэм къадэкIуэу, нэгъуэщI еджапIэхэри жыджэру зэрагъэпэщыж. Псалъэм папщIэ, иужьрей илъэсхэм егъэджэныгъэ объекту 72-рэ зыхуей хуагъэзащ, дызыхуэкIуэ илъэсищми, ахъшэ къаутIыпщу щытмэ, объекту 65-рэ иджыри зэрагъэпэщыжыну я мурадщ. 
Нэгъабэ, къэрал программэм къыщыгъэлъэгъуа пIалъэхэи ипэ къихуэу, КъБР-м и Iэтащхьэ КIуэкIуэ Казбек и унафэкIэ сабий саду 2 къызыхуэтыншэу зэрагъэпэщыжащ. НэгъуэщI программэхэм хагъэхьахэм ящыщу иджыри сабий саду 2 зыхуей хуагъэзащ. Мы гъэм апхуэдэ лэжьыгъэхэр нэгъуэщI садитIми щрагъэкIуэкI. ДызыхуэкIуэ илъэсым апхуэдэ объекту 6, 2027 гъэм - объекту 9 абыхэм иджыри храгъэубыдэнущ. 
БАТОКЪУЭ Наурыз.
  • 39 просмотров
Поделиться: