Кавказым и къэфакIуэхэмрэ уэрэджыIакIуэхэмрэ ягъэдэхащ бадзэуэгъуэм и 13 - 14-хэм Белоруссием и Витебск къалэм щызэхэта «Славянский базар в Витебске-2024» лъэпкъыбэ макъамэ фестивалыр.
Хабзэ хъуауэ, гъэ къэс дуней псом и артист нэхъ цIэрыIуэхэр щызэхуос а зэхыхьэм. Иджырейм къэрал 40-м щIигъу зэхуишэсащ. Ар къызэрызэрагъэпэщрэ мы гъэм илъэс 33-рэ ирокъу. Мыгъэрей фестивалым и программэр нэхъ гъэщIэгъуэну икIи щIэщыгъуэу зэхагъэуващ. Абы хагъэхьащ «Kavkaz Music Fest» зэныбжьэгъугъэ фестивалри. Витебск и утыкум зыкъыщагъэлъэгъуащ Кавказым (Шэшэным, Ингушым, Къэбэрдей-Балъкъэрым, Къэрэшей-Шэрджэсым, Адыгейм, Осетие Ищхъэрэ-Аланием, Дагъыстэным) и вагъуэ нэхъ цIэрыIуэхэм. «Славянский базар» фестивалым Къэбэрдей-Балъкъэрым и цIэкIэ хэтащ Тут Заур, Нэхущ Чэрим, Текуев Амур, Апэнэс Астемыр, «Кабардинка» къэрал академическэ къэфакIуэ ансамблыр.
Кавказ Ищхъэрэм и артист пажэхэу Тут Заур, Царикати Феликс, Хъыжьрокъуэ СулътIан, Текуев Амур, Каримов Ренат, Межиевэ Маккэ, Байкаев Мурад, Апэнэс Астемыр, Албот Марьянэ, Нальгиевэ Лемэ фестивалым и утыкум IэгуауэшхуэкIэ щрагъэблэгъащ. Гур хэзыгъахъуэт зи уэрэд жыIэкIэр куэдым фIыуэ ялъагъу артистхэм «Всем салам!» уэрэдыр зэрызэдагъэзэщIам укIэлъыплъыныр, зыхуэбгъадэ хъун щымыIэ «Кабардинка» къэрал ансамблым и къэфакIуэхэм утыкур къыдагъэбжьыфIэу.
«Кабардинка» къэрал академическэ къэфакIуэ гупым ягъэдэхащ «Лъэпкъ зэкъуэшыныгъэр сыт хуэдэ къулеигъэми йофIэкI» кIэух концертыр. ЛъапэпцIийуэ ди цIыхубэ къафэ гъуазджэм и дахагъэр зыгъэлъагъуэ ди къэфакIуэхэр щIэщыгъуэ ящыхъунтэкъэ?! Псом хуэмыдэу къыу хужьым хуэдэ пщащэ зэкIужхэм я къэфэкIэр! Республикэм и лIыкIуэхэр фестивалым зэрыхэтам щыхьэт техъуэ щIыхь тхылъкIэ, удз гъэгъарэ саугъэтхэмкIэ ягъэлъэпIащ.
2022 гъэм Налшык япэу щагъэлъэгъуауэ щытащ «Kavkaz Music Fest» междунарднэ макъамэ фестивалыр, Къэбэрдей-Балъкъэрым и къэралыгъуэр илъэси 100 зэрырикъум и щIыхькIэ. Абы и продюсер икIи къызэгъэпэщакIуэ Хьэцей Тимур зэрыжиIэмкIэ, илъэситху хъуауэ ар зыдэлажьэ «Славянский базар» фестивалырщ абы хуэзышар. И къалэн нэхъыщхьэр зызымыхъуэжу къонэж – Кавказым щыпсэу лъэпкъхэм я щэнхабзэр нэгъуэщIхэм къегъэцIыхуныр, адрейхэм ейми зыщыгъэгъуэзэныр.
«Kavkaz Music Fest» фестивалыр «Славянский базар в Витебске» зэхыхьэм къызэрыщхьэщыкIыр иужьрейм махуэ зыщыплI зэрыхухахымрэ артист нэхъ мащIэ зэрыхэтымрэщ, щIыналъэ къэс зы уэрэджыIакIуэрэ къэфакIуэ гупрэ. Зэхыхьэм жэщитI-махуитIкIэ зэпымыууэ я нэгу зыщрагъэужьащ балигъхэми сабийхэми. IэпщIэлъапщIэхэм я къалэм къыщащэхуащ ятIэ гъэжьам, пхъэм, фэм, абджым, щэкIым къыхэщIыкIа хьэпшыпхэр, цIыхубзхэм зэрызагъэдахэ цIуугъэнэхэр, лъэпкъ фэилъхьэгъуэхэр, сабийхэр зэрыджэгу хьэпшыпхэр.
Фестивалым и къыхуеджэныгъэ хъуащ Газманов Олег игъэзэщIа «Это всё для вас» уэрэдыр. Мариинскэ театрым и оперэ уэрэджыIакIуэхэу Серовхэ Андрейрэ Натальерэ зэдагъэзэщIащ Симонов Константин и усэ цIэрыIуэм къытращIыкIа «Жди меня и я вернусь!» уэрэдыр, Белоруссиер щхьэхуит къызэращIыжрэ илъэс 80 зэрырикъум и щIыхькIэ.
Мыри узыщыгуфIыкIынщ: «Славянский базар» зэхыхьэм къикIуа илъэс 33-рэ гъуэгуанэм къриубыдэу япэу Iэ щытрадзащ фестивалитIыр зэшэлIэным теухуа зэгурыIуэныгъэм. ЩэнхабзэмкIэ «Витебск» центрымрэ «Славянский базар в Витебске» лъэпкъыбэ фестивалымрэ я унафэщI Лапицкий Глеб къыхигъэщащ зэхыхьэм и къалэн нэхъыщхьэр лъэпкъ зэныбжьэгъугъэр зэрыарар.
